Read Nguna Togoa Etafe North 1 SAMUEL 18 Bible Online

1 SAMUEL 18 - Nguna Togoa Etafe North bible

1 SAMUEL 18

¹Go e pakilina, ragi waina e pasa ki sua Saul, naga naata ni Yonathan e puluti naata ni David, go Yonathan e dodomi a dapala e dum̃ana dodomi naatana.

²Go Saul e piragi a e sikoti a doko naaleatia wanogoe, go e da suasua naga ega moro liliu paki nasum̃a ki tamana mau.

³Go Yonathan ma David ero dum̃ada pasasoki ra, nalakena e dodomi a dapala e dum̃ana dodomi naatana.

⁴Go Yonathan e sawolua sugoro aneana waina e suni a, po dua David asa pilake nalikau aneana maga, lova aneana, go naasu aneana, go tasoki aneana.

⁵Go David e dave pano paki sara tokora waina Saul e dip̃aki lua e paki asa, go e mari manumatua: go Saul e lawo ki nia e dap̃au naatam̃oli maga ni navakalo, go e pei tea wia pa narae ni narei mamau, go narae ni tea suasua maga ki Saul.

⁶Go e pakilina, ragi waina eu liliu umai edaku ki waina David e p̃okati Filistine maga, naga nagoroi maga eu dave m̃elu dua ki natokoana maga mamau puti ni Israel umai, naga euga sua nawota Saul, eu laelaea po do lega po do sale, pilake timbrel go tea woka naleo ni nalegaana maga.

⁷Go nagoroi maga eu dum̃ada lega pilele paki da ki nalaelaeaana adeada, po naga, Saul e po atugi aneana manu laapa, Go David aneana tivilia laapa.

⁸Go Saul e maeto p̃arua, go navasaana wanogoe e mari a e dogokitesa; go e naga, Eu po dua David tivilia laapa, ma eu po dua au manu laapa m̃oli: go e mariatae moro peani nasava ma namarakiana e sikina?

⁹Go namata ni Saul e sa ki David naaleatia wanogoe go pa pa pa.

¹⁰Go e pakilina matamai ki nia naga naatana sa sikai pae Sup̃e e puvua umai doko Saul, go e peanoasai doko ekopu ni nasum̃a aneana: go David e p̃okati harp ki nam̃elearuna, dapala waina e mari a sara naaleatia: go Saul e puati naio aneana e doko nam̃elearuna.

¹¹Go Saul e lawo ki naio wanogoe; nalakena e naga, Aga wo lawo puluti David paki namalo nasum̃a. Go David e daleva ki nia paka rua.

¹²Go Saul e matau ki David, nalakena Yehovah e sikoti a doko, go e m̃elu dua ki Saul pano.

¹³Nalakena tea wanogoe Saul e dip̃aki lua e m̃elu dua ki nia pano, po mari a e pei tea maraki dap̃au naatam̃oli manu sikai; go e do dave pano po do sili umai narae ni narei.

¹⁴Go David e mari manumatua ki napua aneana maga mamau puti; go Yehovah e sikoti a doko.

¹⁵Go ragi waina Saul e punusi naga e mari manumatua, e matau ki nia.

¹⁶Ma Israel mamau go Yudah eu dodomi David; nalakena e do dave pano po do sili umai naraeda.

¹⁷Go Saul e noa ki David, e naga, P̃a leo, aga wo dua ko natugu nagoroi takalapa Merab naga ega wo pei nagoroi anigo: ma navatuna sikai maau, p̃a maginau piviari, po magi Sup̃e marimari. Nalakena Saul e dum̃ana midoaki nia, Nam̃elearugu ega ta doko asa mau, ma nam̃elearu ni Filistine maga ega toko asa.

¹⁸Go David e noa ki Saul, e naga, Kinau a pei sei, go namauriana aginau e pei nasava, go namatarau ki tamagu doko Israel, naga aga wo purum̃a paki nawota?

¹⁹Ma e pakilina ragi waina e pei ragi kakana naga Merab, Saul natuna nagoroi, ega vei tea vituakiana paki David, ma e pei tea vituakiana paki Adriel, naatam̃oli ni Meholath, naga ega vei anagoroi.

²⁰Go Mikal, Saul natuna nagoroi, e dodomi David: go eu noakisai Saul asa, go tea wanogoe e mari Saul e laelaea a.

²¹Go Saul e naga, Aga wo dua e asa, naga ega vei nasasa sikai raki nia, go naga nam̃elearu ni Filistine maga ega tip̃a e. Go tea wanogoe Saul e noa ki David, e naga, Naaleatia waia p̃a wo pei napurum̃a aginau sala kerua.

²²Go Saul e dip̃aki tea suasua aneana maga, po naga, Kuga vasa panako paki David, po naga, P̃a leo, nawota e maro ako, go tea suasua aneana maga mamau puti eu dodomi ko: go tea wanogoe p̃a vei napurum̃a ki nawota.

²³Go tea suasua maga ki Saul eu pasa navasaana maga wanogoe nadaliga ni David. Go David e naga, Nimu ku midoaki nia naga e masalesale paki nau naga aga vei napurum̃a ki nawota, waina a pei tea tika, go tea midoakip̃alokiana kite?

²⁴Go tea suasua maga ki Saul eu noa ki nia asa, eu naga, David e pasa dapala nogoe.

²⁵Go Saul e naga, Kuga wo pasa paki David dapala nea, kuga wo naga, Nawota e da masau te navakokotoana mau, ma e masau nawili vea p̃onotia sikai ki Filistine maga, naga ega vei nasikoana ki tea waina eu pei tea kokona maga ki nawota. Go Saul e midoaki nia naga ega mari David ega rowo ki nam̃elearu ni Filistine maga.

²⁶Go ragi waina tea suasua aneana maga eu noakisai David navasaana maga wanogoe, David e midoaki m̃ata ki nia naga ega vei napurum̃a ki nawota. Go naaleatia maga eu ko da nopu mau;

²⁷Go David e duleana po pano, nara ma naatam̃oli aneana maga eu mamau, po maripunue naatam̃oli ni Filistine p̃onotia dua; go David e piragi nawili vea adeada umai, go eu pitua ki puti ra paki nawota, naga David ega vei napurum̃a ki nawota. Go Saul e dua e natuna nagoroi Mikal naga ega vei anagoroi.

²⁸Go Saul e punusi po atae naga Yehovah e sikoti David doko; go Mikal, Saul natuna nagoroi, e dodomi a.

²⁹Go Saul e matau ki p̃arua liu ki David; go Saul e pei tea kokona ki David sara ragi.

³⁰Go tea maraki maga ni Filistine maga eu dave pano: go e pakilina naga sara ragi waina eu dave pano, naga David e moro mari manumatua do liu tea suasua maga mamau puti ki Saul; go tea wanogoe nagisana e pei tea dodomadaganiana.