Read Nguna Togoa Etafe North 1 SAMUEL 2 Bible Online

1 SAMUEL 2 - Nguna Togoa Etafe North bible

1 SAMUEL 2

¹Go Hannah e dapasavasa, po naga, Nap̃op̃ogu e laelaea Yehovah, Nakasuaana aginau e pei tea sikeana pakilagi doko Yehovah: Nawokagu e pei tea mariana e p̃elewelea dap̃au tea kokona ki nau maga; Nalakena a laelaea namautipauriana anigo.

²Te naata e da doko mau waina e dapu dakiusi Yehovah; Tea p̃ota sikai e dika: Go te vatu laketoko e da doko mau waina e dakiusi Sup̃e anigida.

³Navasa‐leomadaga‐ana ega nopu; Navasa‐p̃op̃ovakilagi‐ana ega ta dave nawoka mau; Nalakena Yehovah e pei Sup̃e sikai ni naataeana, Go pae asa namariana maga eu pei tea rowogiana.

⁴Naasu maga ki naatam̃oli kasua maga eu pei tea marip̃oriana, Go tea maga waina eu dapilagona eu pei tea tasokiana ki nakasuaana.

⁵Tea maga waina eu puka eu dum̃ada pei tea vasadapuiana raki navinaga; Go tea maga waina eu pitolo eu makoto ki navitoloana: Tea tim̃o e pisola paka larua; Go tea waina e peani piakiki eu laapa e manainai.

⁶Yehovah e maripunue, go e moro maripauri: E piragi siwo paki Sheol, go e moro piragi sake.

⁷Yehovah e mari natikaana, go e moro mari nasogolapaana: E piragi pakitano, go e moro piragi pakilagi.

⁸E sike tea tika m̃elu nam̃otam̃ota, Go e dape dakati tea rogokitesa m̃elu natap̃ata, Po mari ra euga tasake sikoti tea maraki maga, Po peani pioli ki malo tasake ni nasamasamaana: Nalakena tip̃a maga ni maramana eu pei tea ki Yehovah, Go e lawokilaketoko maramana ara.

⁹Ega wo pavaigoro nam̃ele natua ni tea vei lomau aneana maga, Ma tea sigisigileo maga euga wo pano puoli namaligo; Nalakena te naata sikai ega ta marimatua mau ki nakasuaana.

¹⁰Tea maga waina eu do pululu ki Yehovah euga wo pei tea marip̃oroworosiana; Nae ega wo pei tovae doko nakoroatelagi dip̃a ra: Yehovah ega wo pasap̃otae namatap̃ago maga ni maramana; Go ega wo dua nawota aneana nakasuaana, Po sike pakilagi ki naatam̃oli aneana Waina e puvurai ki nia.

¹¹Go Elkanah e paki Ramah pano paki nasum̃a aneana. Go piakiki wanogoe e magi Yehovah suasua narae ni Eli, tea viri.

¹²Go Eli natuna naanoai maga ero pei tea p̃arop̃aro maga; ero da atae Yehovah mau.

¹³Go natomariana ki tea viri maga waina eu mari a paki narei, e pei naga ragi waina te naata e pitua ki naviriana, tea suasua ki tea viri maga e umai, ragi waina nap̃okasi e do pei tea veniana, e puati tagau ni ara dolu e doko nam̃elearuna;

¹⁴Go e pupugi a pan, kite ketel, kite boiler, kite pot; go tea mamau puti waina tagau e dakani a sake, tea viri e dape a, e pei aneana. Go eu mari dapala nogoe Shiloh paki tea ni Israel maga mamau puti waina eu rumai paki tokora wanogoe.

¹⁵Ma pea ki eu dap̃ara ki nap̃eletia, tea suasua ki tea viri e umai, po noa ki naata waina e pitua ki naviriana, e naga, P̃a tua tea viri nap̃okasi naga ega veni a; nalakena e masau tea mata pae ako, e da masau tea veniana.

¹⁶Go waina naata wanogoe e pe noa ki nia, e pe naga, Euga wo dap̃ara ki nap̃eletia ega vea, go p̃a wo edaku dape tea waina nap̃op̃om̃a e masauna; ragi wanogoe ega wo pasadara, po naga, Ee, ma p̃a wo dua au asa ragi waia: go waina ku pe karai, go aga wo dape lua kasua ki nia.

¹⁷Go namarinaleosaana ki natureai maga eu p̃arua liu narae ni Yehovah: nalakena naatam̃oli maga eu midoaki p̃alo ki navituaana ki Yehovah.

¹⁸Ma Samuel e suasua narae ni Yehovah, e pei piakiki, po pei tea tasokiana ki efod ni linen.

¹⁹Go p̃ilana e maneana mari sugoro kiki sikai, go e piragi a umai dua e asa sara natau, ragi waina e sikoti anawota sake umai naga ega vitua ki naviriana ni sara natau.

²⁰Go Eli e pasa p̃ia ki Elkanah go anagoroi, po naga, Yehovah ega tua ko nawora pae nagoroi waia nalakena navavaraniana waina e datago paki Yehovah asa. Go eu moro liliu paki nasum̃a adeada pano.

²¹Go Yehovah e umai punusi Hannah, go e diena, po dape natuna naanoai dolu go natuna nagoroi dua. Go piakiki wanogoe Samuel e atum̃aki narae ni Yehovah.

²²Go Eli e po matua p̃arua; go e do dogo tea mamau puti waina natuna naanoai maga ero do mari a paki Israel mamau, go naga ero do one sikoti nagoroi maga waina eu pei tea suasua maga namata ni tap̃aup̃au ni nasaisaiana.

²³Go e noa ki da, e naga, Ekasana koro do mari tea tapala nogoe? Nalakena a po dogo namariana sa animu maga pae narei mamau waia.

²⁴Go natugu maga, e da pei narogorogoana wia waina a dogo e: nimu koro mari narei ki Yehovah eu dapiri.

²⁵Waina te naata sikai e pe mari naleo sa dip̃a tea p̃ota, Sup̃e e pe wo pasap̃otae a: ma waina te naata sikai e pe mari naleo sa dip̃a Yehovah, sei e pe wo maneana pavara? Ma ero da dogo parati ki nadaleo ni tamada mau, nalakena e pei namasauana ki Yehovah naga ega mari sa ki da.

²⁶Go piakiki wanogoe Samuel e atum̃aki po doko nasaup̃iaana ki Yehovah go ki naatam̃oli maga.

²⁷Go naatam̃oli ki Sup̃e sikai e umai punusi Eli, po noa ki nia, e naga, Yehovah e noa dapala nea, Kinau a dum̃agu maripakasa ki nau paki tea ni nasum̃a ki tamam̃a, ragi waina eu doko Ityipt po pei naviti maga nasum̃a ki Faraoh kite?

²⁸Go kinau a matadoa e ki nawora mamau ni Israel naga ega vei tea viri aginau, go naga ega sake paki wede ni naviriana aginau pano, go naga ega tap̃ara ki tea ni nap̃o wia, go naga ega suni efod sikai naraegu kite? Go a dua tea ni nasum̃a ki tamam̃a navituaana tap̃arakiana maga mamau puti ki Israel natuna maga kite?

²⁹Ekasana ku midoaki sa ki naviriana aginau, go navituaana aginau, waina a pitip̃aki asa nasum̃atokoana aginau; po dodomadagani natum̃a maga p̃arua do liu au, po dum̃amu mari mu kuga m̃anopunopu ki tea wia liu ni navituaana maga mamau puti ki narei aginau Israel?

³⁰Nalakena tea wanogoe, Yehovah Sup̃e ni Israel e naga, Kinau a pea noa lomau naga tea ni nasum̃a anigo, go tea ni nasum̃a ki tamam̃a, euga wo surata naraegu pa pa po du mau du: ma ragi waia Yehovah e naga, Ega toko uvea ki nau; nalakena tea maga waina eu dodomadagani au, kinau ma aga wo dodomadagani ra, go tea maga waina eu midoaki p̃alo ki nau, nara euga wo pei tea dododaoana.

³¹P̃a leo, naaleatia maga euga wo umai, go aga wo daelua narum̃a, go naru ni tea ni nasum̃a ki tamam̃a, naga te namariki sikai ega wo da doko nasum̃a anigo doko mau.

³²Go p̃a wo leo punusi narogokitesaana ni nasum̃atokoana aginau doko nawiaana waina Sup̃e ega wo dua Israel asa: go te namariki sikai ega wo da doko nasum̃a anigo doko mau, pa pa po du mau du.

³³Go naatam̃oli anigo waina aga wo da daelua e pa dua ki wede ni naviriana aginau, ega wo pei tea mautiana naga namatana eroga m̃odave go naga nap̃op̃ona ega rogokitesa: go naworawora mamau puti ni nasum̃a anigo euga wo mate ragi ni naveinatureai‐ana adeada.

³⁴Go tea waia ega wo manigo pei navaivaiana ki tea waina ega wo pakilina ki natum̃a naanoai dua, Hofni go Finehas; naaleatia sikai maau eroga wo dua mate.

³⁵Go aga wo maginau sike tea viri lomau sikai, waina ega wo mari pataka ni tea waina e doko nap̃op̃ogu go namidodoana aginau: go aga wo maneana lawo‐ki‐laketoko nasum̃a waina ega toko mau doko; go nae ega wo surata narae ni tea vuvuraikiana aginau pa pa po du mau du.

³⁶Go ega wo pakilina, naga sara naata waina eu pei tea toropusiana doko nasum̃a anigo, euga wo umai po suai natano naraena, raki matele sikai ni silver go matele sikai ni bred, go euga wo naga, A pavara ni ko p̃a tua au nawosiana sikai ki tea viri maga, naga aga kani te matele sikai ni bred.