Read Nguna Togoa Etafe North 1 SAMUEL 20 Bible Online

1 SAMUEL 20 - Nguna Togoa Etafe North bible

1 SAMUEL 20

¹Go David e sava m̃elu dua ki Naioth ni Ramah, go e umai po noa narae ni Yonathan, e naga, Kinau a po mari nasava? Go nasava e pei namarinaleosaana aginau narae ni tamam̃a, waina e do laaga namauriana aginau?

²Go nae e noa ki nia, e naga, Ega madu uvea; p̃a wo da mate mau: p̃a leo, tamagu e da mari te navatuna mau, tea warua kite tea kiki, go e da noakisai au asa: go ekasana tamagu ega wo dasuru ki naleo wanogoe paki nau.? E da dapala nogoe mau.

³Ma David e pasasokisoki kasua, po naga, Tamam̃a e atae m̃ata ki nia naga a po pap̃ai nasaup̃iaana namatam̃a; go e naga, Yonathan ega ta atae tea wanogoe mau, mase e pe rogokitesa: ma e pei lomau Yehovah e mauri doko, go naatam̃a e mauri doko, ma aga wo lua natuagu paka sikai maau go ega wo pei namateana.

⁴Ragi wanogoe Yonathan e noa ki David, e naga, Tea waina nap̃op̃om̃a e masauna, io tea wanogoe aga wo manigo mari a.

⁵Go David e noa ki Yonathan, e naga, P̃a leo, matamai e pei atelagi vau, go e pei naga a marisa karai dasake sikoti nawota po ganikani: ma p̃a suasua naga aga vano, naga aga dokoloku namalasi pa pa paki ragi melu ni wasa.

⁶Waina tamam̃a e pe vunusi naga a pe vuoli ragi wanogoe, p̃a naga, David e pavara ni p̃arua ki nau naga aga suasua ki nia ega vaki Bethlehem, natokoana aneana: nalakena namatarau aneana maga mamau puti eu do mari naviriana ni sara natau tokora wanogoe.

⁷Waina e pe noa dapala nea, E p̃ia; go tea suasua anigo ega wo peani natam̃ateana: ma waina e pe maeto, ragi wanogoe p̃a wo atae naga e midoakisoki tea sa nap̃op̃ona.

⁸Nalakena tea wanogoe p̃a dodomi tea suasua anigo; nalakena ku piragi tea suasua anigo paki navasasokiana sikai ki Yehovah, kinau ma nigo: ma waina namarinaleotageleana e pe toko au doko, p̃a tum̃am̃a maripunue au; nalakena ekasana p̃a viragi au pano punusi tamam̃a?

⁹Go Yonathan e naga, Ega madu uvea ki‐go: nalakena waina a pe atae naga tamagu e midoakisoki naga tea sa ega vakilina ki‐go, ragi wanogoe a pe wo da noakisai ko asa mau kite?

¹⁰Go David e noa ki Yonathan, e naga, Sei ega wo noakisai au asa waina tamam̃a e pe vasa kasua ki‐go?

¹¹Go Yonathan e noa ki David, e naga, P̃a umai go toroga tave pano paki namalasi. Go ero dua dave paki namalasi pano.

¹²Go Yonathan e noa ki David, e naga, Yehovah, Sup̃e ni Israel, ega noasokisoki; ragi waina aga wo pusuusu paki tamagu alagoro ragi sikai maau waia matamai, kite wasa, p̃a leo, waina te nawiaana paki David e pe toko, go aga wo da dip̃aki lua naata sikai paloti punusi ko, po noakisai ko asa mau kite?

¹³Yehovah ega mari tea tapala nogoe paki Yonathan, po moro sokari a, waina tamagu e pe masau naga ega mari sa ki‐go, go a pe ta noakisai ko asa mau, po dip̃aki lua ko naga p̃a vae natam̃ateana pano: go Yehovah ega sikoti ko dakiusi waina e po sikoti tamagu.

¹⁴Go waina a ko mauri doko, p̃a visei ki nau nadodomiana ki Yehovah naga aga ta mate mau:

¹⁵Go nadodomiana anigo ega ta makoto mau ki tea ni nasum̃a aginau pa pa pa: ega ta dika, ega ta makoto mau, ragi waina Yehovah ega taelua tea kokona maga mamau puti ki David pa dua ki narae ni maramana.

¹⁶Go Yonathan e mari navasasokiana sikai paki tea ni nasum̃a ki David, po naga, Go Yehovah ega wo datagovi a ki nam̃elearu ni tea kokona maga ki David.

¹⁷Go Yonathan e mari David e moro pasasokisoki nalakena nadodomiana aneana paki nia: nalakena e dodomi a dapala e dum̃ana dodomi naatana.

¹⁸Go Yonathan e noa ki nia, e naga, Matamai e pei atelagi vau: go ega wo pei tea ataeana naga ku puoli, nalakena malo tasake anigo ega wo p̃alo doko.

¹⁹Go p̃a toko naaleatia dolu, go edaku ki nia p̃a m̃araverave siwo pano paki tokora waina ku dokoloku asa ragi waina nawosiana wanogoe e doko, go p̃a toko tokora wanogoe doko pisari vatu Esel.

²⁰Go aga wo dipe ki nalua dolu taleva kakana sikai, dakiusi waina a pe tipe wotu sikai.

²¹Go p̃a leo, aga wo dip̃aki lua natureai sikai pano, po naga, P̃a vano po pap̃ai nalua maga wanogoe. Waina a pe noa ki natureai wanogoe, a pe naga, P̃a leo, nalua maga eu doko taleva waia e umai: ragi wanogoe p̃a vuati ra, po umai; nalakena e pei natam̃ateana paki‐go, go namarisakiana e dika, Yehovah e mauri doko.

²²Ma waina a pe noa ki natureai wanogoe dapala nea, a pe naga, P̃a leo, nalua maga eu do liu ko pano: ragi wanogoe, p̃a vano; nalakena Yehovah e po dip̃aki lua ko pano.

²³Go nalo ni naleo waina toro tum̃agida noa ki gida asa, p̃a leo, Yehovah e doko namawota kakagida, nigo go kinau, pa pa po du mau du.

²⁴Go dapala nogoe David e dokoloku namalasi: go ragi ni atelagi vau, nawota e dasake naga ega kanikani.

²⁵Go nawota e dasake malo tasake aneana doko taleva ni namalo nasum̃a dakiusi sara ragi; go Yonathan e duleana, go Abner e dasake doko nap̃irikia ni Saul: ma malo tasake ki David e p̃alo doko.

²⁶Ma Saul e da noa te navatuna naaleatia wanogoe: nalakena e midoaki nia naga, Navatuna sikai e pakilina ki nia, e da dautau; alagoro e da dautau lomau.

²⁷Go e pakilina matamai ki nia, edaku ki atelagi vau, naga malo tasake ki David e p̃alo doko: go Saul e noa ki natuna Yonathan, e naga, Ekasana natu ni Yesse e da umai ganikani mau, nanova go masoso?

²⁸Go Yonathan e pasadara Saul, po naga, David e pavara ni p̃arua ki nau naga ega vaki Bethlehem pano:

²⁹Go e naga, P̃a suasua naga aga vano, a pavara ni ko asa; nalakena namatarau aginami eu peani naviriana sikai natokoana wanogoe; go taigu e pitip̃aki naga aga vaki asa: go waina ku pe midoaki m̃ata ki nau, go p̃a suasua naga aga vano, a pavara ni ko asa, go aga va punusi taigu maga. Nalakena tea wanogoe e da umai paki wede ki nawota mau.

³⁰Go namaetoana ki Saul e pavaga dip̃a Yonathan, go e noa ki nia, e naga, Nigo, natu ni nagoroi mari dagele go p̃auluulu, kinau a da atae mau naga ku matadoa natu ni Yesse raki namaliereana anigo, go raki namaliereana ni nam̃alam̃alaana ki p̃ilam̃a kite?

³¹Nalakena ragi waina natu ni Yesse e mauri doko maramana, p̃a wo da pei tea lawosokiana mau, nigo go namarakiana anigo. Go tea wanogoe p̃a tip̃aki lua ragi waia, po paraki nia umai punusi au, nalakena ega wo mate lomau.

³²Go Yonathan e pasadara tamana Saul, po naga, Nalakena nasava ega wo pei tea maripunueana? E mari nasava?

³³Go Saul e dutua ki naio aneana naga ega lawo e: go tea wanogoe Yonathan e atae m̃ata ki naga tamana e midoakisoki naga ega maripunue David.

³⁴Go Yonathan e duleana m̃elu dua ki wede ni nakaniana, e maeto p̃arua, go e da gani te navinaga mau naaleatia kerua ni atelagi: nalakena e dogokitesa nalo ni David, waina tamana e mari namaliereana paki nia.

³⁵Go e pakilina malip̃ogi ki nia naga Yonathan e dave pano paki namalasi ragi tatutakiana waina nara ma David ero pea datuta ki nia, go natureai sikai e sikoti a pano.

³⁶Go e noa ki natureai aneana wanogoe, e naga, P̃a sava pano, po moro pap̃ai nalua maga waina aga wo dipe ki da. Go ragi waina natureai wanogoe e ko do sava, e dipe ki nalua sikai e do liu sa pano.

³⁷Go ragi waina natureai wanogoe e pakilina tokora ni nalua waina Yonathan e dipe ki nia asa, Yonathan e pioso paki natureai wanogoe, po naga, Nalua wanogoe e da do liu ko pano kite?

³⁸Go Yonathan e pioso paki natureai wanogoe, po naga, P̃a mari m̃araverave, p̃a sava kasua, p̃a ta doko mau. Go natureai wanogoe ki Yonathan e pila saisai ki nalua maga, po umai punusi nawota aneana.

³⁹Ma natureai wanogoe e da atae te navatuna mau: Yonathan ma David ero sikida atae tea wanogoe.

⁴⁰Go Yonathan e dua natureai wanogoe nalikau aneana maga, po noa ki nia, e naga, P̃a vano, po dape ra paki natokoana pano.

⁴¹Go ragi waina natureai wanogoe e pano sua, David e duleana m̃elu dua ki tokora sikai waina e paki Sauth, po dowo dap̃olosiwo paki natano, go e paka tolu suai natano: go ero dum̃ada dum̃ili ra, go ero dum̃ada dagisi ra, pa pa David e m̃asoresore.

⁴²Go Yonathan e noa ki David, e naga, P̃a vae natam̃ateana pano nalakena toro dua pasasokisoki pae nagisa ni Yehovah, toro naga, Yehovah ega wo doko namawota kakagida, go namawota ni naworaworagu go naworaworam̃a, pa pa po du mau du. Go e duleana po m̃elu pano: go Yonathan e paki natokoana pano.