Read Nguna Togoa Etafe North 1 SAMUEL 21 Bible Online

1 SAMUEL 21 - Nguna Togoa Etafe North bible

1 SAMUEL 21

¹Go David e umai paki Nob punusi Ahimelek tea viri: go Ahimelek e umai sua David, e do duruuru, go e noa ki nia, e naga, Ekasana ku sikim̃a umai, go te naata sikai e da sikoti ko mau?

²Go David e noa ki Ahimelek tea viri, e naga, Nawota e po dip̃aki nau nawosiana sikai, go e po noa ki nau, e naga, Te naata sikai ega ta atae te navatuna mau nalo ni nawosiana waina a dip̃aki lua ko asa, go nalo ni tea waina a dip̃aki‐go asa: go a po pasa dawona ki natureai maga paki tokora sikai.

³Go tea wanogoe nasava e doko waina ku do leo parati ki nia? P̃a tua au bred euga lima paki nam̃elearugu, kite te navatuna waina e doko.

⁴Go tea viri e pasadara David, po naga, A da peani bred m̃oli mau, ma bred tapu e doko; ma tea sikai maau natureai maga eu pe tu uvea ki nagoroi.

⁵Go David e pasadara tea viri wanogoe, po noa ki nia, e naga, Lomau eu mauti gami ki nagoroi naaleatia dolu; ragi waina a dave umai lasa maga ki natureai maga wanogoe eu dapu, ma e pei nasurataana m̃oli sikai; go masoso lasa adeada maga eu da dapu p̃arua liu kite?

⁶Go tea viri e dua e bred tapu: nalakena bred p̃ota e dika ma bred tokorae e sikina doko, waina e pei tea tapeluaana ki narae ni Yehovah, naga bred vitinu ega toko oli a naaleatia waina eu dape lua e asa pano.

⁷Go naatam̃oli sikai ni tea suasua maga ki Saul e doko tokora wanogoe naaleatia wanogoe, e pei tea mautiana narae ni Yehovah; go nagisana Doek, tea ni Edom, nap̃au ni tea leo parati ki maga ni navata maga waina eu pei agi Saul.

⁸Go David e noa ki Ahimelek, e naga, Go naio sikai, kite lova, e da doko tokora waia doko mau waina ku do leo parati ki nia kite? Nalakena a da dape lova aginau umai, kite nalikau aginau maga, nalakena nawosiana ki nawota e pei tea waina a mari m̃araverave asa.

⁹Go tea viri e naga, Lova ki Coliath, Filistine wanogoe waina ku maripunue a nap̃aloa ni Elah, p̃a leo, tea wanogoe e doko nea, e pei tea vivisiana ki nakulukulu e doko nataku ni efod: waina ku pe masau dape tea wanogoe, p̃a tape a: nalakena tea p̃ota e dika, ma tea wanogoe e sikina doko. Go David e naga, Tea waina e dakiusi a, e dika sa; p̃a tua au asa.

¹⁰Go David e duleana, po sava pano naaleatia wanogoe nalakena e matau ki Saul, go e pa punusi Akish, nawota ni Cath.

¹¹Go tea suasua maga ki Akish eu noa ki nia, eu naga, Tea waia e da pei David, nawota ni navanua kite? Go eu da lega pilele ki nasaleana maga dum̃ada paki da nalo kakana kite, doko do naga, Saul e maripunue aneana manu maga, Go David aneana tivilia maga?

¹²Go David e midoakisoki navasaana maga wanogoe nap̃op̃ona, go e mataku p̃arua ki Akish, nawota ni Cath.

¹³Go e doa namariana aneana naraeda, go e doko raki da doko po doropa sorosoro, go e do karasi namata maga ni namata‐pua, go e doropusi nataniuna e sara siwo nalolu nasina.

¹⁴Go Akish e noa ki tea suasua aneana maga, e naga, Kuga leo, ku punusi naga naatam̃oli waia e doropa: go nalakena nasava ku piragi a umai punusi au?

¹⁵Kinau a dika ki naatam̃oli doropa, naga ku piragi naatam̃oli waia umai naga ega toropa naraegu kite? Naatam̃oli waia ega wo sili po doko nasum̃a aginau kite?