Read Nguna Togoa Etafe North 1 SAMUEL 23 Bible Online

1 SAMUEL 23 - Nguna Togoa Etafe North bible

1 SAMUEL 23

¹Go eu noa ki David asa, eu naga, P̃a leo, Filistine maga eu do mari navakalo dip̃a Keilah, go eu do panako pae malo wokalesue maga.

²Nalakena tea wanogoe David e pusuusu paki Yehovah, po naga, Kinau aga vano po atugi Filistine maga wanogoe kite? Go Yehovah e noa ki David, e naga, P̃a vano, po atugi Filistine maga, po mauti Keilah.

³Go naatam̃oli maga ki David eu noa ki nia, eu naga, P̃a leo, au mataku doko tokora waia Yudah: go auga wo moro mataku p̃arua liu waina tu pe wo paki Keilah pano dip̃a naatam̃oli maga ni navakalo ki Filistine maga.

⁴Go David e moro pusuusu paki Yehovah. Go Yehovah e pasadara e, po naga, P̃a tuleana, p̃a siwo paki Keilah pano; nalakena aga wo pitua ki Filistine maga paki nam̃elearum̃a.

⁵Go David ma naatam̃oli aneana maga eu paki Keilah pano, po mari navakalo paki Filistine maga, po digo lua katel adeada maga, po atugi ra ki naatugiana warua. Go dapala nogoe David e mauti naatatoko maga ni Keilah.

⁶Go e pakilina, ragi waina Abiathar, natu ni Ahimelek, e sava pano punusi David doko Keilah, naga e dape efod sikai doko nam̃elearuna po siwo umai.

⁷Go eu noa ki Saul asa, naga David e umai paki Keilah. Go Saul e naga, Sup̃e e pitua ki nia paki nam̃elearugu; nalakena e pei tea kokoroana nalakena e sili paki natokoana sikai ni namatapua maga go ni tea walagoto maga.

⁸Go Saul e soso saisai ki narei mamau puti raki navakalo, naga euga siwo paki Keilah pano po kelugoro David go naatam̃oli aneana maga.

⁹Go David e atae naga Saul e midoaki p̃ai namarisakiana dip̃a e; go e noa ki Abiathar tea viri, e naga, P̃a tape efod wanogoe umai.

¹⁰Go David e naga, Yehovah O, Sup̃e ni Israel, tea suasua anigo e dogo lomau naga Saul e laaga naga ega umai paki Keilah, naga ega mari sa ki natokoana nalakena kinau.

¹¹Naatam̃oli maga ni Keilah euga wo pitua ki nau paki nam̃elearuna kite? Saul ega wo siwo umai dapala waina tea suasua anigo e dogo e kite? Yehovah O, Sup̃e ni Israel, a pavara ni ko, p̃a noakisai tea suasua anigo asa. Go Yehovah e naga, Ega wo siwo umai.

¹²Go David e naga, Naatam̃oli maga ni Keilah euga wo pitua ki gami ma naatam̃oli aginau maga paki nam̃elearu ni Saul kite? Go Yehovah e naga, Euga wo pitua ki‐go.

¹³Ragi wanogoe David go naatam̃oli aneana maga, eu alagoro pei p̃onotia latesa, eu duleana po m̃elu dua ki Keilah pano, po paki tokora maga waina eu mariatae paki asa pano. Go eu noa ki Saul asa, naga David e sava m̃elu dua ki Keilah pano; Go e dum̃ana midoaki nia naga, Aga toko. Go e da dave pano mau.

¹⁴Go David e m̃enaki doko tokora kasua ni nasiliana doko masop̃alo, e doko navanua waina e pei tava, masop̃alo ni Sif. Go Saul e laaga asa sara naaleatia, ma Sup̃e e da pitua ki nia paki nam̃elearuna mau.

¹⁵Go David e punusi naga Saul e dave umai naga ega laaga namauriana aneana: go David e doko masop̃alo ni Sif doko Horesh.

¹⁶Go Yonathan, natu ni Saul, e duleana po pa punusi David doko Horesh, po mari nam̃elearuna e kasua doko Sup̃e.

¹⁷Go e noa ki nia, e naga, P̃a ta mataku mau: nalakena nam̃elearu ni tamagu Saul ega wo da pa parati ki‐go mau; go nigo p̃a wo pei nawota dap̃au Israel, go kinau aga wo pei kerua kakam̃a; go tea wanogoe ma tamagu Saul e atae a.

¹⁸Go nara dua ero dum̃ada pasasoki ra narae ni Yehovah: go David e m̃enaki doko Horesh doko, go Yonathan e paki nasum̃a aneana pano.

¹⁹Ragi wanogoe tea maga ni Sif eu sake umai punusi Saul doko Cibeah, eu naga, David e da dum̃ana dasuru ki nia sikoti gami doko tokora kasua ni nasiliana Horesh, tava ni Hakilah, waina e doko masop̃alo taleva ni sauth kite?

²⁰Go tea wanogoe, nawota O, p̃a siwo umai, pataka ni namasauana mamau ni nap̃op̃om̃a naga p̃a siwo umai; go nawosiana aginami ega wo pei naga auga vitua ki nia paki nam̃elearu ni nawota.

²¹Go Saul e naga, Kuga vei tea vasam̃atakiana ki Yehovah; nalakena ku maritadodomi au.

²²Kuga vano, a pavara ni mu, po atae parati ki, po atae, po punusi tokora aneana waina e do sili asa, go sei waina e punusi a e doko asa: nalakena e pei tea noaana paki nau naga nae e do mari manumatua.

²³Go nalakena tea wanogoe kuga vunusi po atae sara tokora maga waina e do dum̃ana dasuru ki nia asa, go kuga moro dape navasaana lomau umai punusi au, go tuga wo mamau pano: go ega wo pakilina, waina e pe toko navanua, naga aga wo laaga parati ki nia m̃aleoputo ni manu maga mamau puti ni Yudah.

²⁴Go eu duleana po pea ki Saul pano paki Sif: ma David go naatam̃oli aneana maga eu doko masop̃alo ni Maon doko Arabah, maso maladi paki sauth.

²⁵Go Saul ma naatam̃oli aneana maga eu pano po laaga asa. Go eu noa ki David asa: nalakena tea wanogoe e siwo umai paki vatu waina e doko masop̃alo ni Maon. Go ragi waina Saul e dogo tea wanogoe, e sava dausi David masop̃alo ni Maon.

²⁶Go Saul e surata pano taleva sikai ni tava warua, go David ma naatam̃oli aneana maga eu surata pano taleva kerua ni tava warua: go David e mari m̃araverave naga ega sava pano nalakena e matau ki Saul; nalakena Saul go naatam̃oli aneana maga eu dalivirigoro David go naatam̃oli aneana maga naga euga vuati ra.

²⁷Ma tea tautauana sikai e umai punusi Saul, e naga, P̃a mari m̃araverave po umai; nalakena Filistine maga eu rumai marimari navanua.

²⁸Go tea wanogoe Saul e liliu po da moro sava dausi David, go e pano po mari dip̃a Filistine maga: nalakena tea wanogoe eu soso tokora wanogoe ki Sela‐hammahlekoth.

²⁹Go David e sake pae tokora wanogoe pano, po m̃enaki doko tokora kasua ni nasiliana doko En‐kedi.