Read Nguna Togoa Etafe North 1 SAMUEL 24 Bible Online

1 SAMUEL 24 - Nguna Togoa Etafe North bible

1 SAMUEL 24

¹Go e pakilina ragi waina Saul e doropusi Filistine maga po liliu, naga e pei tea noaana paki nia, eu naga, P̃a leo, David e doko masop̃alo ni En‐kedi.

²Go Saul e piragi lua naatam̃oli matadoaana manu dolu pae Israel mamau, po pano laaga David go naatam̃oli aneana maga pae napatira ni naninani mila maga.

³Go e umai paki tokora ni loga ni shiip pisari napua, tokora waina valea sikai e doko asa; go Saul e sili asa naga ega tave. Go David ma naatam̃oli aneana maga eu doko em̃ago mau ni valea wanogoe.

⁴Go naatam̃oli maga ki David eu noa ki nia, eu naga, P̃a leo, naaleatia waia waina Yehovah e noa ki‐go asa, e naga, P̃a leo, aga wo pitua ki tea kokona ki‐go paki nam̃elearum̃a, go p̃a wo mari paki nia tea waina ku midoaki m̃ata ki nia. Go David e duleana, po masi kotovi panako namatap̃ago ni sugoro kovagoro ki Saul.

⁵Go e pakilina edaku ki nia naga nap̃op̃o ni David e dogokitesa nalakena e masi kotovi namatap̃ago ni sugoro kovagoro ki Saul.

⁶Go e noa ki naatam̃oli aneana maga, e naga, Ega madu uvea ki nau naga aga mari naleo wanogoe paki nawota aginau, tea vuvuraikiana ki Yehovah, naga aga sai ki nam̃elearugu dip̃a e, go nae e pei tea vuvuraikiana ki Yehovah.

⁷Go tea wanogoe David e dip̃agoro naatam̃oli aneana maga ki navasaana maga wanogoe, go e da suasua ki da naga euga tuleana dip̃a Saul. Go Saul e duleana m̃elu dua ki valea po pano.

⁸David e moro edaku duleana po dave m̃elu dua ki valea wanogoe pano, po soso Saul, po naga, Nawota aginau, nawota O. Go ragi waina Saul e leo kitaku, David e kolo po suai natano.

⁹Go David e noa ki Saul, e naga, Nalakena nasava ku do daki dorogo paki navasaana maga ki naatam̃oli maga waina eu do naga, P̃a leo, David e do laaga naga ega mari sa ki‐go?

¹⁰P̃a leo, naaleatia waia namatam̃a ero punusi takana waina Yehovah e pitua ki‐go masoso paki nam̃elearugu doko valea: go naata seara eu noa ki nau naga aga maripunue ko: ma namatagu e mari malemale ko; go a naga, Aga wo da sai ki nam̃elearugu dip̃a nawota aginau mau; nalakena nae e pei tea vuvuraikiana ki Yehovah.

¹¹Go tamagu, p̃a vunusi, io p̃a vunusi namatap̃ago ni sugoro kovagoro anigo e doko nam̃elearugu: nalakena waina a masi kotovi namatap̃ago ni sugoro kovagoro anigo, ma a da maripunue ko mau, p̃a atae po punusi naga tea waina e sa kite e pei natapiriana e da doko nam̃elearugu mau, go a da mari naleo sa paki‐go mau, ma ku do laaga namauriana aginau naga p̃a wo dape lua e.

¹²Yehovah ega vasap̃otae namawota kakagida, go Yehovah ega maginau sikosiko paki‐go: ma nam̃elearugu ega wo da doko ako mau.

¹³Naluluakia ki tea matua tuai maga e doko noa, e naga, Nasigisigileoana e do m̃elu pae tea sigisigileo: ma nam̃elearugu ega wo da doko ako mau.

¹⁴Nawota ni Israel e dave umai paraki sei? Ku do sava dausi sei? Ku do sava dausi koria mate sikai, kite kutu sikai?

¹⁵Go tea wanogoe Yehovah ega wo pei tea vasap̃otae, po pasap̃otae namawota kakagida, po punusi, po maginau pululu, po daulua au m̃elu dua ki nam̃elearum̃a.

¹⁶Go e pakilina edaku ki ragi waina David e pasa sua navasaana maga wanogoe paki Saul, naga Saul e naga, Tea waia e pei nadaleom̃a, natugu David? Go Saul e sike nadaleona po dagi.

¹⁷Go e noa ki David, e naga, Nigo ku leana liu au: nalakena ku mari tea wia paki nau, ma kinau a mari tea sa paki‐go.

¹⁸Go naaleatia waia tea wia waina ku mari a paki nau, e pei tea ataeana: nalakena ragi waina Yehovah e pitua ki nau paki nam̃elearum̃a, ku da maripunue au mau.

¹⁹Nalakena waina naata sikai e pe vap̃ai tea kokona ki nia, ega wo suasua ki nia naga e pe wo dum̃ana pano po doko p̃ia doko kite? Go tea wanogoe Yehovah ega lagati dua ko tea wia nalakena tea waina ku mari a paki nau naaleatia waia.

²⁰Go p̃a leo, ragi waia a atae naga p̃a wo pei nawota lomau, go naga namarakiana ni Israel ega wo pei tea lawosokiana nam̃elearum̃a.

²¹Nalakena tea wanogoe p̃a vasasokisoki paki nau ragi waia pae nagisa ni Yehovah, naga p̃a wo da daelua naworaworagu edaku ki nau, go naga p̃a wo da mari puoli ki nagisagu m̃elu dua ki nasum̃a ki tamagu.

²²Go David e pasasokisoki paki Saul. Go Saul e paki kiana pano; ma David go naatam̃oli aneana maga eu sake paki tokora kasua ni nasiliana.