Read Nguna Togoa Etafe North 1 SAMUEL 26 Bible Online

1 SAMUEL 26 - Nguna Togoa Etafe North bible

1 SAMUEL 26

¹Go tea ni Sif eu rumai punusi Saul Cibeah, eu naga, David e da dum̃ana dasuru ki nia tava ni Hakilah, waina e leana dip̃a maso maladi kite?

²Go Saul e duleana, po siwo pano paki masop̃alo ni Sif, go naatam̃oli matadoaana manu dolu ni Israel eu sikoti a pano, naga euga laaga David masop̃alo ni Sif.

³Go Saul e sike tap̃aup̃au aneana maga tava ni Hakilah, waina e leana dip̃a maso maladi, nadigi ni napua. Ma David e doko masop̃alo doko, go e punusi naga Saul e dausi a paki masop̃alo.

⁴Nalakena tea wanogoe David e dip̃aki lua tea leo pavaraka maga pano, go e atae naga Saul e po umai lomau.

⁵Go David e duleana, po umai paki tokora waina Saul e sike tap̃aup̃au aneana asa: go David e punusi tokora waina Saul e one asa, nara ma Abner natu ni Ner tea maraki ni taua aneana: go Saul e one m̃aleoputo ni tokora waina kariot maga eu doko asa, go narei eu sike tap̃aup̃au adeada maga dalivirigoro e.

⁶Go David e noa ki Ahimelek, naatam̃oli ni Heth, go ki Abishai, natu ni Seruiah, tai ni Yoab, e naga, Sei ega wo sikoti au pano punusi Saul tokora ni nam̃enakiana? Go Abishai e naga, Kinau aga wo sikoti ko siwo pano.

⁷Go tea wanogoe David ma Abishai ero umai punusi narei p̃ogi: go kuga leo, Saul e do maturu one m̃aleoputo ni tokora waina kariot maga eu doko asa, go naio aneana e pei tea lawokiana natano pisari nap̃auna: go Abner ma narei eu do one dalivirigoro e.

⁸Go Abishai e noa ki David, e naga, Sup̃e e po pitua ki tea kokona ki‐go paki nam̃elearum̃a naaleatia waia: go tea wanogoe a pavara ni ko, p̃a suasua naga aga lawo puluti a ki naio paka sikai maau paki natano, go aga wo da moro lawo e sala kerua mau.

⁹Go David e noa ki Abishai, e naga, P̃a ta mari sa ki nia mau: nalakena sei e mariatae sai ki nam̃elearuna dip̃a tea vuvuraikiana ki Yehovah, go ega wo da pei tap̃aro asa mau?

¹⁰Go David e naga, Yehovah e mauri doko, Yehovah ega wo atugi a; kite naaleatia aneana ni namateana ega wo pakilina; kite ega wo siwo pano paki navakalo po mate.

¹¹Ega madu uvea ki nau naga aga sai ki nam̃elearugu dip̃a tea vuvuraikiana ki Yehovah: go ragi waia, a pavara ni ko, p̃a vuati naio waina e doko pisari nap̃auna, go lasa ni noai, go toroga vano.

¹²Go tea wanogoe David e puati naio wanogoe go lasa ni noai waina e doko pisari nap̃au ni Saul; go ero puati ra pano, go te naata sikai e da punusi a mau, kite atae a mau, go te naata sikai e da leleo mau: eu mamau puti maturu; nalakena namaturuana warua sikai e pae Yehovah umai po dowo ara.

¹³Go David e pano paki taleva kerua, po lawodu uvea nam̃asua ni tava; go namalopa warua e doko namawota kakada:

¹⁴Go David e pioso paki narei, go paki Abner natu ni Ner, e naga, Abner ku da do pasadara mau kite? Go Abner e pasadara, po naga, Nigo ku pei sei waina ku pioso paki nawota?

¹⁵Go David e noa ki Abner, e naga, Nigo ku da pei m̃aau sikai kite? Go sei e dakiusi ko doko Israel? Go tea wanogoe nasava e pei nalakena ku da pavaigoro nawota anigo mau? Naatam̃oli sikai e sili umai naga ega mari sa ki nawota anigo.

¹⁶Tea wanogoe waina ku mari a e da p̃ia mau. Yehovah e mauri doko, go nimu ku pataka ni namateana, nalakena ku da pavaigoro nawota animu mau, tea vuvuraikiana ki Yehovah. Go ragi waia p̃a vunusi tokora waina naio ki nawota e doko asa, go lasa ni noai waina e pea doko pisari nap̃auna.

¹⁷Go Saul e atae nadaleo ni David, go e naga, Tea waia e pei nadaleom̃a, natugu David, kite? Go David e naga, E pei nadaleogu, nawota aginau, nawota O.

¹⁸Go e naga, Nalakena nasava nawota aginau e do sava dausi tea suasua aneana? Kinau a po mari nasava? Kite nasava waina e sa waina e doko nam̃elearugu?

¹⁹Go tea wanogoe, a pavara ni ko, nawota aginau ega rogo navasaana maga ki tea suasua aneana. Waina e pe vei Yehovah waina e pulevule nap̃op̃om̃a dip̃a au, go nae ega suasua dape navituakiana sikai: ma waina e pe vei naatam̃oli natuna maga, nara euga vei tea vasasakiana narae ni Yehovah; nalakena naaleatia waia eu kopasi lua au pano naga aga ta peani te naveanipiolikiana ki Yehovah mau, eu naga, P̃a vano po magi sup̃e p̃ota maga suasua.

²⁰Go tea wanogoe nadagu ega ta pei tea takiana paki natano mau, uvea ki narae ni Yehovah: nawota ni Israel e po dave umai naga ega laaga kutu sikai, dakiusi waina naatam̃oli e do palako ki p̃ilake tava warua maga.

²¹Ragi wanogoe Saul e naga, Kinau a po mari naleo sa: p̃a liliu umai natugu David: go aga wo da moro mari sa ki‐go mau, nalakena namauriana aginau e pei tea wia namatam̃a naaleatia waia: p̃a leo, a po mari naveilalaana, go a sasap̃o p̃arua.

²²Go David e pasadara, po naga, P̃a vunusi naio, nawota O! P̃a suasua naga natureai sikai ega surata umai po puati liliua ki nia.

²³Go Yehovah ega lagati dua sara naata namarinaleoleanaana aneana, go naveilomauana aneana: nalakena Yehovah e pitua ki‐go paki nam̃elearugu masoso, go a karai sai ki nam̃elearugu dip̃a tea vuvuraikiana ki Yehovah.

²⁴Go p̃a leo, dapala waina namauriana anigo e pei tea wia namatagu naaleatia waia, dapala nogoe namauriana aginau ega vei tea wia namata ni Yehovah, go nae ega taulua au pa dua ki sara narogokitesaana.

²⁵Go Saul e noa ki David, e naga, P̃a vei tea vasam̃atakiana, natugu David: nigo p̃a wo mari tea waina e kasua, go p̃a wo marimatua lomau. Go David e pae napua aneana pano, go Saul e moro liliu paki kiana.