Read Nguna Togoa Etafe North 1 SAMUEL 27 Bible Online

1 SAMUEL 27 - Nguna Togoa Etafe North bible

1 SAMUEL 27

¹Go David e noa nap̃op̃ona, e naga, Aga wo mate te nap̃ogi pae nam̃elearu ni Saul: tea waina e maginau p̃ia liu e dika, ma naga aga sava pano paki navanua ki Filistine maga; go Saul ega wo doropusi au, po da moro laaga au mau usuraki kokoi maga mamau puti ni Israel: go dapala nogoe aga wo sava dua ki nam̃elearuna.

²Go David e duleana, po duagoto pano, nara ma naatam̃oli p̃onotia latesa waina eu sikoti a, po punusi Akish, natu ni Maok, nawota ni Cath.

³Go David e m̃enaki doko sikoti Akish doko Cath, nara ma naatam̃oli aneana maga, sara naata pilake tea ni nasum̃a aneana, go David pilake anagoroi dua, Ahinoam nagoroi ni Yesreel, go Abikail nagoroi ni Karmel, Nabal anagoroi.

⁴Go eu noa ki Saul naga David e sava pano paki Cath: go e da moro laaga asa mau.

⁵Go David e noa ki Akish, e naga, Waina a pe vap̃ai nasaup̃iaana namatam̃a, go p̃a suasua naga euga tua au tokora sikai ni natokoana maga ni navanua sikai kakada, naga aga toko asa: nalakena ekasana tea suasua anigo ega toko sikoti ko doko natokoana ki nawota?

⁶Go naaleatia wanogoe Akish e dua e Siklak: go tea wanogoe e pei nalakena Siklak e pei agi nawota maga ni Yudah pa pa paki naaleatia waia.

⁷Go naveveana ni naaleatia maga waina David e doko navanua ni Filistine maga doko eu pei natau sikai go atelagi pati.

⁸Go David ma naatam̃oli aneana maga eu sake pano po mari dip̃a tea ni Ceshur, go tea ni Ceser, go tea ni Amalek: nalauna maga wanogoe eu pei naatatoko maga ni navanua wanogoe, waina eu doko tuai, pae napua paki Shur, go pa pa paki navanua ni Ityipt.

⁹Go David e atugi navanua wanogoe, go e da mauti te naanoai kite te nagoroi e mauri doko mau, go e puati shiip pano, go oks, go ass, go kamel, go nakulukulu suniana; go e moro liliu umai punusi Akish.

¹⁰Go Akish e naga, Nimu ku mari dip̃a tea ni esava masoso? Go David e naga, Au mari dip̃a taleva ni Yudah paki Sauth, go dip̃a taleva ni Yerahmeel paki Sauth, go dip̃a taleva ni Kain paki Sauth.

¹¹Go David e da mauti te naanoai kite te nagoroi e mauri doko mau, naga ega vuati ra umai paki Cath, e naga, Mase eu pe noa gida asa, po naga, David e mari a, go natomariana aneana e dapala nogoe sara naaleatia waina e doko navanua ni Filistine maga.

¹²Go Akish e saralomau David, e naga, E po mari narei aneana Israel eu mamarago ki p̃arua ki nia; nalakena tea wanogoe ega wo pei tea suasua aginau pa pa po du mau du.