Read Nguna Togoa Etafe North 1 SAMUEL 28 Bible Online

1 SAMUEL 28 - Nguna Togoa Etafe North bible

1 SAMUEL 28

¹Go e pakilina naaleatia maga wanogoe, naga Filistine maga eu piragi saisai ki taua ni naatam̃oli navakalo adeada maga raki navakalo, naga euga marimari dip̃a Israel. Go Akish e noa ki David, e naga, P̃a atae parati ki naga p̃a wo sikoti au, nimu ma naatam̃oli anigo maga, tuga mamau dave pano pei taua warua ni navakalo.

²Go David e noa ki Akish, e naga, Nalakena tea wanogoe p̃a wo atae tea waina tea suasua anigo ega wo mari a. Go Akish e noa ki David, e naga, Nalakena tea wanogoe aga wo mari ko p̃a vei tea vavaigoro nap̃augu pa pa pa.

³Go Samuel e mate sua, go Israel mamau eu dagisi a, po ova ki nia Ramah, natokoana aneana. Go Saul e mari lua puti tea maga waina eu peani naata tapu, go tea tapu vakamaligo maga, pa dua ki navanua.

⁴Go Filistine maga eu dum̃ada saisai ki da, po umai po sike tap̃aup̃au adeada maga Shunem: go Saul e piragi saisai ki Israel mamau puti, go nara eu sike tap̃aup̃au adeada maga Cilboa.

⁵Go ragi waina Saul e punusi taua ni naatam̃oli navakalo ki Filistine maga, e mataku, go nap̃op̃ona e duruuru p̃arua.

⁶Go ragi waina Saul e pusuusu ki Yehovah, Yehovah e da pasadara e mau, pae nap̃erea maga, kite pae Urim, kite pae profeta maga.

⁷Go Saul e noa ki tea suasua aneana maga, e naga, Kuga maginau laaga nagoroi sikai waina e peani naata tapu, naga aga va punusi a, po pusuusu ki nia. Go tea suasua aneana maga eu noa ki nia, eu naga, P̃a leo, nagoroi sikai waina e peani naata tapu e doko En‐dor doko.

⁸Go Saul e dum̃ana mari a e dapala naatam̃oli p̃ota, po suni tea suniana p̃ota, go e pano nara ma naatam̃oli dua eu mamau, go eu rumai punusi nagoroi wanogoe p̃ogi: go e naga, P̃a maginau kikita, a pavara ni ko, ki naata tapu, po maginau mari naatam̃oli ega vakilina, waina aga wo noakisai ko nagisana.

⁹Go nagoroi wanogoe e noa ki nia, e naga, P̃a leo, ku atae tea waina Saul e mari a, waina e daelua tea maga waina eu peani naata tapu, go tea tapu vakamaligo maga, m̃elu dua ki navanua: go tea wanogoe ekasana ku do doropusi vaivai sikai raki namauriana aginau, naga ega mari au aga mate?

¹⁰Go Saul e pasasokisoki paki nia, e noa nagisa ni Yehovah asa, e naga, Yehovah e mauri doko, go sogi ega ta liko ako mau nalakena naleo waia.

¹¹Go nagoroi wanogoe e naga, Aga wo manigo mari sei ega vakilina? Go e naga, P̃a maginau mari Samuel ega vakilina.

¹²Go ragi waina nagoroi wanogoe e punusi Samuel, e pioso ki nadaleo kasua: go nagoroi wanogoe e pasa paki Saul, e naga, Ekasana ku marisore au? Nalakena nigo ku pei Saul.

¹³Go nawota e noa ki nia, e naga, P̃a ta mataku mau: ma ku punusi nasava? Go nagoroi wanogoe e noa ki Saul, e naga, A punusi sup̃e sikai e do sake pae natano umai.

¹⁴Go e noa ki nia, e naga, Natakiusiana kakana e dapale sava? Go e naga, Mariki matua sikai e do sake umai; go e pei tea sugoroana ki sugoro kovagoro sikai. Go Saul e atae naga e pei Samuel, go e kolo suai natano, po dowo dap̃olosiwo paki natano.

¹⁵Go Samuel e noa ki Saul, e naga, Ekasana ku mari sa ki namaromaroana aginau, po mari au a pakilina? Go Saul e pasadara, po naga, A pei tea riesokiana kasua; nalakena Filistine maga eu do mari navakalo dip̃a au, go Sup̃e e doropusi au, go e da moro pasadara au mau, pae profeta maga, kite pae nap̃erea maga: tea wanogoe e pei nalakena a po soso ko, naga p̃a noakisai au tea waina aga mari a.

¹⁶Go Samuel e naga, Go tea wanogoe ekasana ku do pusuusu paki nau, go Yehovah e doropusi ko, go e po pei tea tip̃a ko?

¹⁷Go Yehovah e mari paki‐go dapala waina e noakisai au asa: go Yehovah e puap̃orae namarakiana m̃elu dua ki nam̃elearum̃a, po dua tea ni m̃aladigi ki‐go asa, e pei David.

¹⁸Nalakena ku da dogo parati ki nadaleo ni Yehovah mau, go ku da sikosiko namaetoana warua aneana paki Amalek mau, nalakena tea wanogoe Yehovah e po mari tea wanogoe e pakilina ki‐go naaleatia waia.

¹⁹Go p̃arua liu Yehovah ega wo pitua ki mu ma Israel kuga mamau paki nam̃elearu ni Filistine maga: go matamai nimu ma natum̃a naanoai maga kuga wo sikoti au doko: Yehovah ega wo pitua ki taua mamau ni Israel, nara ma, paki nam̃elearu ni Filistine maga.

²⁰Go Saul e m̃araverave darup̃a ki, go e mataku p̃arua, nalakena navasaana maga ki Samuel: go nakasuaana aneana e dika; nalakena e da gani te navinaga mau naaleatia mamau, kite nap̃ogiana mamau wanogoe.

²¹Go nagoroi wanogoe e umai punusi Saul, go e punusi naga e m̃anaunau p̃arua, go e noa ki nia, e naga, P̃a leo, tea suasua nagoroi anigo e dogo parati ki nadaleom̃a, go a doropusi namauriana aginau e doko nam̃elearum̃a, go a dogo parati ki navasaana anigo waina ku noa ki nau asa.

²²Go tea wanogoe, a pavara ni ko, nigo ma p̃a rogo parati ki nadaleo ni tea suasua nagoroi anigo, go aga toropusi matele ni bred sikai naraem̃a; go p̃a kanikani, naga p̃a veani nakasuaana ragi waina p̃a wo surata pae napua anigo pano.

²³Ma e karai, po naga, Aga wo da ganikani mau. Ma tea suasua aneana maga, nara ma nagoroi wanogoe, eu pasadie a; go e dogo parati ki nadaleoda. Go tea wanogoe e duleana m̃elu dua ki natano, po dasake doko nawewele.

²⁴Go nagoroi wanogoe e peani kau natuna m̃anopunopu sikai e doko esum̃a; go e mari m̃araverave, po maripunue a; go e dape flaur, po die a, po mari a e pei bred waina leven e dika asa:

²⁵Go e piragi a umai doropusi a narae ni Saul, go narae ni tea suasua aneana maga; go eu ganikani. Go eu duleana, po m̃elu pano p̃ogi wanogoe.