Read Nguna Togoa Etafe North 1 SAMUEL 29 Bible Online

1 SAMUEL 29 - Nguna Togoa Etafe North bible

1 SAMUEL 29

¹Go Filistine maga eu piragi saisai ki taua ni naatam̃oli navakalo adeada maga mamau puti paki Afek: go tea ni Israel eu sike tap̃aup̃au adeada maga pisari namata noai waina e doko Yesreel.

²Go nawota maga ni Filistine maga eu surata pano, p̃onotia maga go manu maga: go David ma naatam̃oli aneana maga eu surata dausi ra pano, nara ma Akish eu mamau.

³Go tea maraki maga ni Filistine maga eu naga, Heberu maga waia eu do mari nasava nea? Go Akish e noa ki tea maraki maga ni Filistine maga, e naga, Naatam̃oli waia e da pei David, tea suasua ki Saul, nawota ni Israel, waina e sikoti au doko naaleatia maga go natau maga, go a da pap̃ai te namariana sa sikai asa mau, pae ragi waina e pea umai punusi au pa pa paki naaleatia waia, kite?

⁴Ma tea maraki maga ni Filistine maga eu maeto ki nia; go tea maraki maga ni Filistine maga eu noa ki nia, eu naga, P̃a mari naatam̃oli wanogoe ega liliu pano, naga ega liliu paki tokora aneana waina ku lawo ki nia asa, go ega ta sikoti gida paki navakalo mau, mase e pe wo pei tea kokona ki gida sikai: nalakena naatam̃oli waia ega wo dum̃ana pei p̃op̃o wia paki nawota aneana ki nasava? Ega ta pei ki nap̃au ni naatam̃oli maga waia kite?

⁵Naatam̃oli waia e da pei David, waina eu lega pilele dum̃ada paki da nalo kakana, doko nasaleana maga, po naga, Saul e po atugi aneana manu laapa, Go David aneana tivilia laapa, kite?

⁶Go Akish e soso David, po noa ki nia, e naga, Yehovah e mauri doko, go nigo ku pei tea leana, go natavepano‐ana anigo go nasili‐umai‐ana anigo sikoti au pilake taua, e p̃ia namatagu: nalakena a da pap̃ai te naleo sa doko ako mau, pae naaleatia waina ku pea umai punusi au pa pa paki naaleatia waia: ma nawota maga eu da midoaki m̃ata ki‐go mau:

⁷Go tea wanogoe p̃a moro liliu, go p̃a vae natam̃ateana pano, naga p̃a wo da mari nawota maga ni Filistine maga euga maeto mau.

⁸Go David e noa ki Akish, e naga, Ma kinau a po mari nasava? Go ku pap̃ai nasava doko tea suasua anigo pae naaleatia vea mau waina a doko naraem̃a pa pa paki naaleatia waia, naga aga ta pano mau po marimari dip̃a tea kokona maga ki nawota aginau, nawota O?

⁹Go Akish e pasadara po noa ki David, e naga, Kinau a atae naga ku pei tea wia naraegu, dapala agelo sikai ki Sup̃e: ma tea maraki Filistine maga nara eu po naga, Nae ega wo da sikoti gida pano paki navakalo mau.

¹⁰Go tea wanogoe p̃a tuleana malip̃ogi loaloa, nimu ma tea suasua maga ki nawota anigo waina ku mamau umai: go ragi waina kuga tuleana malip̃ogi loaloa, go ragi waina e marama, kuga tave pano.

¹¹Go dapala nogoe David e duleana malip̃ogi loaloa, nara ma naatam̃oli aneana maga, naga euga tave pano malip̃ogi wanogoe, po liliu paki navanua ki Filistine maga. Go Filistine maga eu sake paki Yesreel pano.