Read Nguna Togoa Etafe North 1 SAMUEL 31 Bible Online

1 SAMUEL 31 - Nguna Togoa Etafe North bible

1 SAMUEL 31

¹Go Filistine maga eu marimari dip̃a Israel: go naatam̃oli maga ni Israel eu sava pa dua ki narae ni Filistine maga, go eu dowo eu pei tea atugiana tava Kilboa.

²Go Filistine maga eu sava dausi Saul go natuna maga; go Filistine maga eu maripunue Yonathan, go Abinadab, go Malki‐shua, Saul natuna maga.

³Go navakalo e kasua sa dip̃a Saul, go tea vuati naasu maga eu pa parati ki nia; go e dogokitesa p̃arua nalakena tea vuati naasu maga.

⁴Go Saul e noa ki tea to dape nalikau aneana maga, e naga, P̃a sai lua lova anigo, po puri sasama au; mase tea maga waia waina eu da pei tea tovadaviviana eu pe vuri sasama au, po marisaudoa ki nau. Ma tea to dape nalikau aneana maga e da suasua asa mau; e mataku p̃arua. Nalakena tea wanogoe Saul e puati lova aneana po dowo asa.

⁵Go ragi waina tea to dape nalikau aneana maga e punusi naga Saul e mate, nae ma e dowo lova aneana, go ero dua mate.

⁶Dapala nogoe Saul e mate, go natuna naanoai dolu, go tea to dape nalikau aneana maga, go naatam̃oli aneana maga mamau puti, eu mamau puti mate naaleatia sikai maau wanogoe.

⁷Go ragi waina naatam̃oli maga ni Israel waina eu doko taleva kerua ni nap̃aloa wanogoe, go tea maga waina eu doko taleva kerua ni Yordan, eu punusi naga naatam̃oli maga ni Israel eu sava pano, go naga Saul go natuna maga eu mate, eu m̃elu dua ki natokoana maga po sava pano; go Filistine maga eu rumai po doko ara doko.

⁸Go e pakilina matamai ki nia, ragi waina Filistine maga eu rumai naga euga sawolua sugoro ki tea mate maga, naga eu pap̃ai Saul go natuna dolu eu dowo doko tava Kilboa.

⁹Go eu daekotovi nap̃auna po sawolua pulum̃a ki nalikau aneana maga, po dip̃aki lua paki navanua ki Filistine maga daliviri, naga euga tape narogorogoana kakana paki nasum̃a ki nasup̃e adeada maga, go paki narei.

¹⁰Go eu doropusi pulum̃a ki nalikau aneana maga e doko nasum̃a ki Ashtaroth: go eu sara ki nap̃atoko mate p̃aaka ni Beth‐shan.

¹¹Go ragi waina naatatoko maga ni Yabesh‐kilead eu dogo nalo kakana tea waina Filistine maga eu mari a paki Saul,

¹²Naatam̃oli marimatua p̃arua mamau puti eu duleana, po surata p̃ogi mamau, po puati lua nap̃atoko mate ni Saul go nap̃atoko mate ni natuna naanoai maga, pae p̃aaka ni Beth‐shan; go eu rumai paki Yabesh, po dap̃ara ki da tokora wanogoe.

¹³Go eu dape navatuda maga pano, po ova ki da Yabesh etano ni nakau tamarisk, go eu pali naaleatia larua.