Read Nguna Togoa Etafe North 1 SAMUEL 5 Bible Online

1 SAMUEL 5 - Nguna Togoa Etafe North bible

1 SAMUEL 5

¹Go Filistine maga eu dape areka ki Sup̃e, go eu dapetape a pae Eben‐eser umai paki Ashdod.

²Go Filistine maga eu dape areka ki Sup̃e, po dapetape a umai paki nasum̃a ki Dakon, go eu lawo ki nia doko pisari Dakon.

³Go matamai ki nia, malip̃ogi loaloa, ragi waina tea ni Ashdod eu duleana, kuga leo, Dakon e dowo dap̃olosiwo natano kivea ni areka ki Yehovah. Go eu dape dakati Dakon, po moro lawo ki nia e doko naliana.

⁴Go matamai ki nia, malip̃ogi loaloa, ragi waina eu duleana, kuga leo, Dakon e dowo dap̃olosiwo natano kivea ni areka ki Yehovah; go nap̃au ni Dakon, go nam̃elearuna dua, eu makoto po one nakau tuasila ni namata; ma namalo ni Dakon m̃oli e masikina doko.

⁵Go tea wanogoe e pei nalakena tea viri maga ki Dakon, go tea maga waina eu sili nasum̃a ki Dakon, te sikai kakada e da moro pasi nakau tuasila ni namata ni nasum̃a ki Dakon mau doko Ashdod, pa pa paki naaleatia waia.

⁶Go nam̃elearu ni Yehovah e madaga doko tea ni Ashdod maga, go e mari sasa ki da, po atugi ra ki natoputopuana maga, usuraki Ashdod mamau go kokoi kakana maga.

⁷Go ragi waina naatam̃oli maga ni Ashdod eu punusi naga e dapala nogoe, eu naga, Areka ki Sup̃e ni Israel ega wo da doko sikoti gida mau: nalakena nam̃elearuna e madaga doko gida, go doko Dakon, sup̃e anigida.

⁸Nalakena tea wanogoe eu pitip̃aki po piragi saisai ki puti ki tea maraki maga ni Filistine maga umai punusi ra, po naga, Tuga mari nasava ki areka ki Sup̃e ni Israel? Go eu pasadara, po naga, Areka ki Sup̃e ni Israel ega vei tea tapeana pano paki Cath. Go eu dape areka ki Sup̃e ni Israel pano paki tokora wanogoe.

⁹Go e pakilina, edaku ki waina eu dape a pano, naga nam̃elearu ni Yehovah e dip̃a natokoana wanogoe ki nam̃anaunauana warua sa: go e atugi naatam̃oli maga ni natokoana wanogoe, tea vusavusa maga go tea matua eu mamau, go natoputopuana maga eu pakilina ara.

¹⁰Nalakena tea wanogoe eu dip̃aki areka ki Sup̃e pano paki Ekron. Go e pakilina, ragi waina areka ki Sup̃e e do umai paki Ekron, naga tea ni Ekron eu kuapioso, po naga, Eu po dape areka ki Sup̃e ni Israel umai naga ega wo atu gida go narei anigida.

¹¹Nalakena tea wanogoe eu pitip̃aki po piragi saisai ki puti ki tea maraki maga ni Filistine maga, go eu naga, Kuga tip̃aki lua areka ki Sup̃e ni Israel ega liliu pano paki naliana, naga ega ta atu gida mau, go narei anigida: nalakena nam̃anaunauana ni namateana e doko usuraki natokoana mamau, nam̃elearu ni Sup̃e e madaga p̃arua tokora wanogoe.

¹²Go naatam̃oli maga waina eu da mate, nara eu pei tea atugiana ki natoputopuana maga: go nakuapiosoana ni natokoana wanogoe e sake paki nakoroatelagi pano.