Read Nguna Togoa Etafe North 1 SAMUEL 7 Bible Online

1 SAMUEL 7 - Nguna Togoa Etafe North bible

1 SAMUEL 7

¹Go naatam̃oli maga ni Kiriath‐yearim eu rumai, po dape areka ki Yehovah pano, eu dape a paki nasum̃a ki Abinadab doko tava, go eu dapugoro natuna Eleasar, naga ega vavaigoro areka ki Yehovah.

²Go e pakilina naga areka wanogoe e doko Kiriath‐yearim ragi varau; e pei natau rualima dua; go tea ni nasum̃a ni Israel eu mamau dagi po lalagaarova nalo ni Yehovah.

³Go Samuel e pasa paki tea ni nasum̃a ni Israel mamau puti, po naga, Waina ku pe wo maradoa paki Yehovah ki nap̃op̃omu mamau, ma kuga toropusi sup̃e p̃ota maga go Ashtaroth, m̃elu dua ki m̃aleoputo kakamu, go kuga lawo ki nap̃op̃omu euga toko Yehovah, po maneana suasua ega sikina: go nae ega wo pualua mu m̃elu dua ki nam̃elearu ni Filistine maga.

⁴Go Israel natuna maga eu doropusi Baal maga go Ashtaroth, po magi Yehovah suasua, nae e sikina.

⁵Go Samuel e naga, Kuga viragi saisai ki Israel mamau puti paki Mispah, go aga wo manimu dapasavasa paki Yehovah.

⁶Go eu saisai doko Mispah, go eu pautui noai, po daki nia narae ni Yehovah, po pali naaleatia wanogoe, po naga, Tu mari naleo sa dip̃a Yehovah. Go Samuel e pasap̃otae Israel natuna maga Mispah.

⁷Go ragi waina Filistine maga eu dogo naga Israel natuna maga eu pei tea viragisaisaikiana Mispah, tea maraki maga ni Filistine maga eu sake pano dip̃a Israel. Go ragi waina Israel natuna maga eu dogo e, eu matau ki Filistine maga.

⁸Go Israel natuna maga eu noa ki Samuel, eu naga, P̃a ta maromaro mau ma p̃a to maginami pioso paki Yehovah Sup̃e aginami pitip̃atip̃a naga ega mauti gami m̃elu dua ki nam̃elearu ni Filistine maga.

⁹Go Samuel e puati shiip natuna, tea susu sikai, po pitua ki nia e pei navituaana tap̃arakiana mamau paki Yehovah: go Samuel e magi Israel pioso paki Yehovah; go Yehovah e pasadara e.

¹⁰Go ragi waina Samuel e doko pitua ki naviriana tap̃arakiana wanogoe, Filistine maga eu rumai paki m̃aladigi naga euga mari navakalo dip̃a tea ni Israel maga: ma naaleatia wanogoe Yehovah e mari tovae e kati p̃arua, go Filistine maga eu pei tea marisakiana asa; go eu pei tea atugiana narae ni tea ni Israel maga.

¹¹Go naatam̃oli maga ni Israel eu dave m̃elu dua ki Mispah pano, po kopa usi Filistine maga, po atugi ra, pa pa paki nadigi ni Beth‐kar.

¹²Go Samuel e dape vatu sikai, po lawo ki nia namawota ni Mispah go ni Shen, po salagisana ki Eben‐eser, po naga, Yehovah e po do silae gida pa pa paki naaleatia waia.

¹³Go Filistine maga eu pei tea marimatuakiana, go eu da moro duagoto kokoi ni Israel mau: go nam̃elearu ni Yehovah e dip̃a Filistine maga naaleatia maga mamau puti ki Samuel.

¹⁴Go natokoana warua maga waina Filistine maga eu dapepavakoto ara ki Israel, eu pei tea vitua‐ki‐liliua‐kiana paki Israel, pae Ekron pa pa e liliu Cath; go kokoi kakana Israel eu pualua e m̃elu dua ki nam̃elearu ni Filistine maga. Go natam̃ateana e doko namawota ni Israel go ni tea ni naworawora ni Amor maga.

¹⁵Go Samuel e pasap̃otae Israel naaleatia maga mamau puti ni namauriana aneana.

¹⁶Go e surata pano sara natau usuraki Beth‐el, go Cilcal, go Mispah; go e pasap̃otae Israel tokora maga mamau puti wanogoe.

¹⁷Go e moro liliu paki Ramah pano, nalakena nasum̃a aneana e doko tokora wanogoe doko; go tokora wanogoe e pasap̃otae Israel asa: go e magi Yehovah davagi wede ni naviriana sikai tokora wanogoe.