Read Nguna Togoa Etafe North 1 SAMUEL 8 Bible Online

1 SAMUEL 8 - Nguna Togoa Etafe North bible

1 SAMUEL 8

¹Go e pakilina, ragi waina Samuel e po pei tea matua, naga e mari natuna naanoai maga ero pei tea vasap̃otae maga dap̃au Israel.

²Go nagisa ni natuna takalapa e pei Yoel; go nagisa ni kerua e pei Abiyah: ero pei tea vasap̃otae maga doko Beer‐sheba.

³Go natuna maga wanogoe ero da surata napua aneana maga mau, ma ero dawasi pano dausi nataluaana sa, go ero dape namoriana sili, po p̃elukidoa navasap̃otaeana.

⁴Go tea matua maga mamau puti ni Israel eu dum̃ada saisai ki da, po umai punusi Samuel doko Ramah:

⁵Go eu noa ki nia, eu naga, P̃a leo, ku po pei tea matua, go natum̃a maga ero da surata napua anigo maga mau: nalakena tea wanogoe p̃a maginami matadoa nawota sikai naga ega vasap̃otae gami dakiusi sara nalauna maga mamau puti.

⁶Ma Samuel e midoaki sa ki naleo wanogoe, waina eu naga, P̃a tua gami nawota sikai naga ega vasap̃otae gami. Go Samuel e dapasavasa paki Yehovah.

⁷Go Yehovah e noa ki Samuel, e naga, P̃a rogo parati ki nadaleo ni narei nalo ni sara navasaana waina eu noa ki‐go asa: nalakena eu da dip̃adoa ko mau, ma eu dip̃adoa au, naga aga ta pei nawota dap̃au ra mau.

⁸Dapala sara natomariana maga waina eu mari ra pae naaleatia waina kinau a piragi ra sake m̃elu dua ki Ityipt umai, pa pa paki naaleatia waia, waina eu doropusi au, po magi sup̃e p̃ota maga suasua, dapala nogoe eu mari a paki‐go.

⁹Go nalakena tea wanogoe p̃a rogo parati ki nadaleoda: ma p̃a wo noasokisoki paki da, po madeada mari pakasa ki napua ni namariana ki nawota wanogoe waina ega wo maramara dap̃au ra.

¹⁰Go Samuel e noasai sara navasaana maga mamau puti ki Yehovah paki narei waina eu datagovi a ki nawota sikai.

¹¹Go e naga, Napua ni namariana ki nawota waina ega wo maramara dap̃au mu ega tapala nea: nae ega wo piragi natumu naanoai maga, po maneana dawona ki da raki kariot aneana maga, go naga euga vei tea sakesaake horse aneana maga; go euga wo sava pea ki kariot aneana maga:

¹²Go ega wo dawona ki da euga maneana pei tea maraki ni naatam̃oli manu maga, go tea maraki ni naatam̃oli rualima lima maga; go ega wo lawosoki seara naga euga sisi natano aneana, go naga euga tagaukotovi nalolovaeana aneana, go naga euga mari nalikau aneana maga ni navakalo, go sara naleo ni kariot aneana maga.

¹³Go ega wo piragi natumu nagoroi maga naga euga vei tea mari naroro lolo mataisau maga, go naga euga vei tea mari m̃ata ki navinaga, go tea tao bred.

¹⁴Go ega wo peani vanua animu maga, go roara ni vaine animu maga, go roara ni oliva animu maga, tea wia liu kakada maga, po dua tea suasua aneana maga ara.

¹⁵Go ega wo peani kekerualima ni sara naleo lawoana animu, go ni roara ni vaine animu maga, po dua tasiga aneana maga go tea suasua aneana maga ara.

¹⁶Go ega wo peani tea suasua naanoai animu maga, go tea suasua nagoroi animu maga, go tea wialua ni katel animu maga, go ass animu maga, po dua ra nawosiana aneana.

¹⁷Ega wo peani kekerualima ni navata ni shiip go ni naninani animu maga: go kuga wo pei tea suasua aneana maga.

¹⁸Go naaleatia wanogoe kuga wo kuapioso nalakena nawota animu waina nimu kuga wo manimu matadoa e; go Yehovah ega wo da pasadara mu mau naaleatia wanogoe.

¹⁹Ma narei eu karai dogo parati ki nadaleo ni Samuel; go eu naga, Ee; ma auga wo peani nawota sikai dap̃au gami;

²⁰Naga kinami ma auga takiusi sara nalauna maga; go naga nawota aginami ega vasap̃otae gami, po dave pano pea ki gami, po maginami piviatu.

²¹Go Samuel e dogo sara navasaana maga ki narei, po darausi ra nadaliga maga ni Yehovah.

²²Go Yehovah e noa ki Samuel, e naga, P̃a rogo parati ki nadaleoda, po madeada mari nawota sikai. Go Samuel e noa ki naatam̃oli maga ni Israel, e naga, Kuga vano, sara naata sikasikai paki natokoana aneana.