Read Nguna Togoa Etafe North 1 SAMUEL 9 Bible Online

1 SAMUEL 9 - Nguna Togoa Etafe North bible

1 SAMUEL 9

¹Naatam̃oli sikai ni Benyamin e doko, nagisana Kish, natu ni Abiel, natu ni Seror, natu ni Bekorath, natu ni Afiah, natu ni tea ni Benyamin sikai, naatam̃oli marimatua ni navakalo.

²Go e peani natu naanoai sikai, nagisana Saul, e pei natureai leom̃atakiana sikai: go naata sikai e da doko m̃aleoputo ni Israel natuna maga mau waina e p̃ia do liu sa: napauna maga ero parau do liu naatam̃oli p̃ota maga.

³Go ass maga ki Kish, tama ni Saul, eu sasap̃o puoli. Go Kish e noa ki natuna Saul, e naga, P̃a tuleana, p̃a viragi tea suasua sikai sikoti ko, go koroga vano po laaga ass maga wanogoe.

⁴Go e surata duaduru navanua ni tava ni Efraim, po surata duaduru navanua ni Shalishah, ma ero da pap̃ai ra mau: go ero surata duaduru navanua ni Shaalim, ma eu da doko tokora wanogoe mau: go e surata duaduru navanua ni tea ni Benyamin, ma ero da pap̃ai ra mau.

⁵Ragi waina ero umai doko sua navanua ni Suf, Saul e noa ki tea suasua aneana waina e sikoti a, e naga, Toroga liliu; mase tamagu e pe ta moro midoaki ass maga mau, ma e pe midoaki p̃arua ki gida.

⁶Go e noa ki nia, e naga, P̃a leo, naatam̃oli sikai ki Sup̃e e doko natokoana waia, go nae e pei naatam̃oli waina eu do dodomadagani a; sara navasaana maga waina nae e do pasa asa eu do pakilina lomau: toroga va punusi a; alagoro e pe mariatae noakisai gida nalo ni nasurataana anigida waina toro do surata asa.

⁷Go Saul e noa ki tea suasua aneana, e naga, Ma p̃a leo, waina toro pe vano go toroga wo dape nasava pano po dua naatam̃oli wanogoe asa? Nalakena nala maga ni bred anigida eu p̃alo, go te navituam̃olikiana sikai e da doko waina toroga tape a pano dua naatam̃oli wanogoe ki Sup̃e asa: toro peani nasava?

⁸Go tea suasua wanogoe e moro pasadara Saul, po naga, P̃a leo, a peani namagovai kevati ni shekel sikai ni silver e doko nam̃elearugu: tea wanogoe aga wo dua naatam̃oli ki Sup̃e asa, naga ega noakisai gida napua anigida.

⁹(Sala vea doko Israel, ragi waina naata sikai e pe vano naga ega vusuusu paki Sup̃e, e pasa dapala nea, Kuga umai go tuga va punusi tea kikita: nalakena tea waina e po pei tea sosoana ki profeta ragi waia, sala vea e pei tea sosoana ki tea kikita.)

¹⁰Go Saul e noa ki tea suasua aneana, e naga, Ku pasa p̃ia; p̃a umai, toroga vano. Go ero pano paki natokoana waina naatam̃oli ki Sup̃e wanogoe e doko asa.

¹¹Ragi waina ero do sake pae tava sula paki natokoana wanogoe, ero pap̃ai naatara seara eu dave pano naga euga vautui noai, go ero noa ki da, ero naga, Tea kikita e doko nea kite?

¹²Go eu pasadara ra, po naga, E doko; p̃a leo, e do pea ki‐go: koroga mari m̃araverave, nalakena e po umai paki natokoana masoso; go narei eu do mari naviriana sikai masoso tokora vakilagi:

¹³Ragi waina koroga wo sili sua paki natokoana, ragi wanogoe koroga wo m̃araverave pap̃ai a, pea ki naga ega wo sake paki tokora vakilagi wanogoe naga ega kanikani: nalakena narei euga wo da ganikani mau pa pa ega wo umai doko sua, nalakena nae ega wo pasa m̃ata ki naviriana wanogoe; go ragi wanogoe tea maga waina eu po pei tea vitautauana umai, euga wo edaku ganikani. Nalakena tea wanogoe koroga sake pano; go koroga wo m̃araverave pap̃ai a.

¹⁴Go ero sake paki natokoana wanogoe pano; go ragi waina ero do sili paki natokoana, kuga leo, Samuel e do dave umai pae kivea ki da naga ega sake paki tokora vakilagi pano.

¹⁵Ma naaleatia vea, pea ki naaleatia waina Saul e umai, Yehovah e pasa paki Samuel,

¹⁶go e naga, Matamai aura sikai maau waia, aga wo dip̃aki lua naatam̃oli sikai ni navanua ni Benyamin paloti punusi ko, go p̃a vuvurai ki nia ega vei tea maraki sikai dap̃au narei aginau Israel, go nae ega wo mautipauri narei aginau m̃elu dua ki nam̃elearu ni Filistine maga: nalakena a po leo punusi narei aginau, nakuapiosoana adeada e po umai paki nau.

¹⁷Go ragi waina Samuel e punusi Saul, Yehovah e noa ki nia, e naga, P̃a vunusi naatam̃oli waina a noa ki‐go asa! E pei nae waina ega wo peani navei‐nawotaana dap̃au narei aginau.

¹⁸Go Saul e umai paki m̃aladigi ki Samuel doko namata‐pua, po naga, P̃a noa ki nau, a pavara ni ko, tokora waina nasum̃a ki tea kikita e doko asa.

¹⁹Go Samuel e pasadara Saul, po naga, Kinau a pei tea kikita wanogoe; p̃a sake pea ki nau pano paki tokora vakilagi, nalakena masoso koroga wo ganikani sikoti au: go malip̃ogi matamai p̃a wo moro pano, go aga wo noakisai ko sara naleo waina e doko nap̃op̃om̃a.

²⁰Go nalo ni ass anigo maga waina eu sasap̃o puoli nanoasa waina, p̃a ta moro midoaki da mau; nalakena eu po pei tea vap̃aiana. Go sara naleo masauniana doko Israel euga vei agi sei? E da pei tea anigo kite, go agi tea maga mamau puti ni nasum̃a ki tamam̃a?

²¹Go Saul e pasadara, po naga, Kinau a da pei tea ni Benyamin, tea sikai ni tea kiki sa ni nalauna maga ni Israel kite? Go namatarau aginau e da pei tea kiki sa ni sara namatarau maga ni naworawora ni Benyamin mau kite? Go nalakena nasava ku do pasa dapalana paki nau?

²²Go Samuel e piragi soki Saul go tea suasua aneana, po piragi ra paki em̃ago ni nam̃enakiana, go e mari ra ero dasake malo tasake warua liu m̃aleoputo ni tea maga waina eu pei tea vitautauana umai, eu alagoro pei naatam̃oli rualima dolu.

²³Go Samuel e noa ki tea marim̃ataki navinaga, e naga, P̃a tape matele wanogoe umai waina a dua ko asa, go waina a noa ki‐go nalo kakana, P̃a maginau mauti a.

²⁴Go tea marim̃ataki navinaga e dape dakati namao ni nalo tuavati, go tea waina e doko asa, po doropusi a doko narae ni Saul. Go Samuel e naga, P̃a vunusi tea waina e pei tea mautiana doko! P̃a toropusi a ega toko naraem̃a po ganikani; nalakena e po manigo pei tea mautiana pa pa paki ragi tatutakiana, nalakena kinau a naga, A po pitautau narei umai. Go Saul e ganikani sikoti Samuel naaleatia wanogoe.

²⁵Go ragi waina eu pae tokora vakilagi wanogoe siwo umai paki natokoana, e pusum̃aki sikoti Saul nam̃asua ni nasum̃a.

²⁶Go matamai ki nia malip̃ogi loaloa, Samuel e pioso paki Saul doko nam̃asua ni nasum̃a, po naga, P̃a tuleana naga a mariatae dip̃aki lua ko pae napua anigo pano. Go Saul e duleana, go ero dua dave pano, nara ma Samuel, paki katama.

²⁷Go ragi waina eu do siwo pano namatap̃ago ni natokoana, Samuel e noa ki Saul, e naga, P̃a noa ki tea suasua naga nae ega vea pea ki gida pano, (go e pea pano), ma p̃a tu dorogo ragi waia, naga aga mari ko p̃a wo dogo navasaana ki Sup̃e.