Read Nhengatu Mateu 10 Bible Online

Mateu 10 - Nhengatu bible

Mateu 10

¹Asui usenui ipiri kuaita umbuewaita duziwaita, asui uxari ainta supe ukuawasawa aintaumburi arama demuniu aintaumburi yuiri panye mãsi.

²Yawe aintarera kuaita duziwaita umunduwaita, primeru kua Simão sera yuiri Pedru, asui imu Andre, asui Zebedeu raira Tiagu imute yuiri Juão.

³Asui Filipe, asui Bartulumeu yuiri, asui Tume, asui Mateu kua publikanuwaa yuiri, asui Alfeu raira Tiagu, asui Tadeu.

⁴Asui Simão Zelute yuiri, kua yuiri kua Juda Iskariute uentregariwaa Jesus suanyanaita supe.

⁵Jesus umundu kuaita duziwaita umbeu ainta supe: —Tepewike aintaretama kiti kuaita tiwaita judeu tiyuiri pewike aintaretama upe kuaita Samaria upewaita.

⁶Maa pesu pesikari kuaita uvelya uyusupariwaita Israel upe.

⁷Asui pesuwaa upe peiku pembue kuaita miraita pembeu ainta supe, kuayentuana sangawa peruixawa arama kua iwaka ruixawa.

⁸Pemukaturu mãsiweraita, pembaka umanuwaita, pemukaturu yuiri kuaita lepruzuita, pemburi demuniwita. Perikuanate sikuyaraimawaa ape kuri pemee amuita supe sikuyaraimawaa yuiri.

⁹Teperasu peirumu uru timaa yuiri prata tiyuiri kubri pebulsu upe.

¹⁰Teperasu pesaku peviaji rupiara, timaa yuiri mukuĩ pepupekawa, tiyuiri sapatu tiyuiri pebatuna, kua upurakiwaa uwasemu kuri umbau arama upurakiwaa upe.

¹¹Maa kiti pewike tetama turusuwaa upe kuairawaa upe yuiri pepurandu pesendu awataa purangawaa ape asui peiku suka upe ate mairame kuri peyuiri sendawa sui.

¹²Pewike irumu suka upe pemukuema kuaita uka puraita.

¹³Puranga rame kuaita suka puraita pexari timaarese ainta peirumu, tirame puranga ainta pemuyuiri petimaaresesawa aintasui.

¹⁴Tirame awa usuanti penye tiyuiri uruyari penyenga pesemu irumu suka sui sendawa sui yuiri pepiri iwi peipi sui pesemu irumu aintasui.

¹⁵Supiwa hambeu penye arama aintarese kuaita tiwaita uruyari penyenga: —Aintaupurara kuri turusu piri aintasui kuaita Sudumawaraita Gumurawaraita yuiri nyã ara Deus uxari kuri aintaupurara aintapekadu resewara.

¹⁶Ikete hamundu pesu arama kuaye uvelya usuwaa yawe aintapiterupi kuaita suu inyãruwaita, ape kuri pemaa pesui peruanyana ukuawawaa yawe kuaye buya umaawaa yawe isui, maa peiku aintapiterupi kuaye pumba yawe.

¹⁷Pemaa pesui kuaita apigawaita nyãse aintauxari kuri penye aintaruixawaita supe aintaunupa kuri penye sinaguga upe.

¹⁸Aintaurasu kuri penye aintapiri kuaita guvernuita, aintapiri yuiri kuaita aintaruixawaita kirimbawawaita pembeu arama kuri ainta supe testemunyu ainta supe yuiri kuaita tiwaita judeu.

¹⁹Aintaumprezu rame kuri penye tepeyuka pepia mayetaa pembeuwaa ainta supe nyãse Deus uxari kuri penye arama pembeu arama ainta supe.

²⁰Nyãse timaa penye kua pepurungitawaa maa pepaya espiritu kuri upurungita pesui.

²¹Yepeyepe uxari kuri aintauyuká imu, asui aintapayaita aintauxari kuri aintauyuká taira, asui aintarairaita aintaupuamu kuri aintapaya ruaxara aintauyuká arama ainta.

²²Asui kuaita miraita panye puxi kuri aintaumaa penye serera resewara maa kua santawaa uiku ate anyu arama uyumukaturu kuri.

²³Aintaumuruanyana rame kuri penye amu tendawa kiti peyawawaa aintasui amu kiti, nyãse supiwa hambeu penye arama timaa kuri pembawa pembue panye kuaita tetama Israel upewaita senundere uri kua unaseriwaa umaa kua ara.

²⁴Kua uyumbuewaa timaa iara kiti umbuesara sui ae, kua upurakiwaa timaa iara kiti piri suixawa sui ae.

²⁵Usikana ixupe kua uyumbuewaa uiku arama iyawe kua umbuesara ae, usikana ixupe kua upurakiwaa uiku arama suixawa iyawe. Aintaumbeu rame Yurupari kua uka iyara aintaumbeu yuiri puxuwera piri aintarese kuaita suka puraita.

²⁶Ape tepesikie aintasui, nyãse kua aintauyumimiwaa yaneresa sui yamaa kuri ae asui kuaita umunyawaita puxuwera uyumimisawa upe yakuawa kuri aintarese.

²⁷Kua hambeuwaa penye arama pitunawasu upe pembeu kuri ae ara upe, kua hambeuwaa penye arama merupiara peapisa upe pembeu kuri ae iwate sui aintausendu arama panye.

²⁸Tepesikie aintasui kuaita uyukáwaita yanepira kuaita tiwaita upuderi uyuká yaneanga maa pesikie isui kua upuderiwaa uxari yakayemu infernu kiti panye yanepira yaneanga yuiri.

²⁹Sipiwasuimawaa kuaita wirá mirita yavenderi mukuĩ yepe kruzeru rikuyara maa uwari rame yepe aintasuiwara iwi upe yanepaya Deus ukuawa sese.

³⁰Ukuawa muiri siyasawa yaneawa yaneakanga rese.

³¹Ape kuri tepesikie, nyãse sipiwasu piri penye aintasui wirá mirita siyawaita.

³²Ape awa uxari apigawaita ukuawa suixawa ixe hambeu kuri sesewara sepaya supe iwaka upewaa.

³³Maa awa uyumimi seresewara apigawaita sui hayumimi kuri yuiri sesewara sepaya sui iwaka upewaa.

³⁴Tepemanduari hayuiri haxari tiarama maa rese kuaita mundu puraita, timaa hayuiri haxari arama timaarese ainta, maa hayuiri haxari arama ainta supe seespada.

³⁵Hayuiri hamutirika apigawaita aintapayaita sui, hamutirika kunyaita aintamayaita sui, hamutirika inura yuiri isugra sui.

³⁶Asuiwana kuri apigawaita ruanyanaita kuaita suka puraita.

³⁷Kua ugustariwaa ipaya imaya yuiri sesui timaa supiwa seyawewaa ae, kua ugustariwaa taira tayera yuiri sesui timaa supiwa, seyawewaa ae.

³⁸Kua tiwa upisika ikurusa uri arama serakakuera timaa supiwa, seyawewaa ae.

³⁹Kua usikariwaa sikuesawa ukanyemu kuri isui sikuesawa, kua uxariwaa ukanyemu isui sikuesawa seresewara uwasemu kuri sikuesawa supiwa.

⁴⁰Kua usuantiwaa penye usuanti yuiri ixe, kua usuantiwaa ixe usuanti yuiri kua umunduwaa ixe.

⁴¹Kua usuantiwaa yepe umbuewaa umbue resewara senyenga Deus kuri upagari ae kuaye upagariwaa yawe kua umbuesara. Kua usuantiwaa yepe purangawaa Deus kuri upagari ae kuaye upagariwaa yawe kua purangawaa.

⁴²Supiwa hambeu penye arama tikuri ukanyemu isui sikuyara kua umeewaa taina uu arama ii uruyari resewara senyenga.