Read Nhengatu Mateu 11 Bible Online

Mateu 11 - Nhengatu bible

Mateu 11

¹Jesus umbue rire umbuewaita duziwaita usu umbue arama aintarendawa kiti.

²Asui kua Juão uikuwaa kadeya upe usendu irumu Jesus umunyawaita resewara ape umundu umbuewaita aintausu arama aintaupurandu Jesus.

³Aintaunyee Jesus supe: —Maitaa indete kua reyuiri aramawaa, u maitaa yasarure amu nesui?

⁴Jesus usuaxara ainta, umbeu ainta supe: —Peyuiri pembeu Juão supe kua pesenduwaa serese kua pemaawaa yuiri.

⁵Aintaumaawana kuaita sesaimawaita, aintauwatana puranga kuaita alejaduita, purangana aintapira kuaita lepruzuita, aintausenduana kuaita iapisaimawaita, aintausemu aintaupaka umanuwaita, aintausenduana kua inyenga purangawaa kuaita pirasuawaita.

⁶Suuri kuri kua tiwa umanduari puxuwera serese.

⁷Asui aintauyuiri irumu isui Jesus uyupiru umbeu Juão resewara ainta supe kuaita miraita, umbeu: —Maataa pesu pemaa kampu kiti? Maitaa pesu pemaa iwitu upeyu uwiwa rawa rese?

⁸Marantaa pesu pemaa? Maitaa pesu pemaa yepe apigawa urikuwaa irupa purangawaa? Aete hambeu penye arama aintauiku guvernaduru ruka upe kuaita urikuwaita aintarupa purangawaa.

⁹Ape marantaa pesu pemaa kampu kiti? Maitaa pesu pemaa yepe utitikawaa? Ẽẽ, utitikawaa ae, asui hambeu penye arama puranga piri utitikawaa sui kua pesuwaa pemaa.

¹⁰Nyãse aete kua aintaumpinimawaa sese kuxima, ixete hamundu yepe umbeusara nerunde umukaturu arama nerapee nerunde.

¹¹Supiwa hambeu penye arama: —Aintasuiwara kuaita unaseriwaita umaa kua ara timaa yamaa amu iara kiti xingawaa kua Juão Batista sui, maa puranga piri kua aintawira kitiwaa kuaita iwaka ruixawa imiraita.

¹²Kuximare Juão Batista umbue rame kuera ate kuiri yuiri kirimbawa aintauputari imiraita arama ainta kua iwaka ruixawa, asui kuaita kirimbawawaita aintaumuserana ae imiraita arama ainta.

¹³Kuxima aintautitika kuaita utitikawaita panye, Muize umpinimawaa utitika yuiri ate Juão rese.

¹⁴Asui peputari rame pesendu hambeu penye arama, aete Elia kua aintaumbeuwaa sese uriwaa kuri.

¹⁵Awa uriku iapisa kuara urikute usendu.

¹⁶Maa awa yawetaa haseruka kuaita miraita kuiriwaraita? Haseruka ainta tainaita yawe uikuwaita ukara kiti aintausenui aintarumuaraita, aintaunyee:

¹⁷—Yapeyu penye arama membi maa tipepurasi, yambeu penye arama nyenga sasiyarawaa maa tipeyaxiu.

¹⁸Juão uri pepiri, timaa umbau tiyuiri uu asui aintaumbeu uriku demuniu.

¹⁹Kua unaseriwaa umaa kua ara uri pepiri umbau uu yuiri asui aintaumbeu, ike yepe apigawa turusuwaa umbau ukauwera yuiri uajudari publikanuita puxuwerawaita yuiri. Yawe aintaunyee; maa yapuderi yakuawa panye aintaumanduarisawa ipupe kua aintaumunyawaa.

²⁰Asui Jesus umbeu aintaresewara kuaita sidadi umunyawaa ape milagri, nyãse tisasiyara aintaumanduari aintapekadu.

²¹Unyee aintarese: —Puxuwera kuri inde sidadi Kurazim, puxuwera kuri inde tetama Betisaida, hamunya rame maa milagri Tiru upe Sidum upe yuiri kuaye hamunyawaa yawe penye arama kuximare sasiyara maa aintaumanduari aintapekadu resewara, aintaumuyari maa aintaakanga rese saku aintaumuyapumiwaa sinza upe yakuawa arama maa sasiyara ainta.

²²Maa hambeu penye arama, pepurara kuri turusu piri aintasui kuaita Tiru upewaraita Sidum upewaraita yuiri nyã ara kuri Deus uxari arama aintaupurara aintapekadu resewara.

²³Asui inde sidadi Kafarnaum maitaa reyusupiri aintasui ate iwaka kiti, asui rewiye yuiri ate infernu kiti, hamunya rame maa milagri Suduma upe kuaye hamunyawaa yawe inde arama uikure maa ate kuiri.

²⁴Maa hambeu inde, repurara kuri turusu piri Suduma sui nyã ara upe uriwaa kuri Deus umbeu arama aintapekadu.

²⁵Asui aramete Jesus unyee: —Hamee inde arama purangawaa inde sepaya iwaka ruixawa ara ruixawa yuiri, nyãse rexari tainaita ukuawa mayesawataa kua nenyenga reyumimiwaa aintasui kuaita ukuawawaita.

²⁶Yawete remunya inde sepaya nyãse yawe reputari remunya.

²⁷Kuxima sepaya uxari ixe arama panye maantu, nẽ awa ukunyeseri Deus raira anyunte ipaya ukunyeseri ae, tiyuiri awa ukunyeseri sepaya anyunte taira ukunyeseri ae, kuaita yuiri kuri ukunyeseri ae kuaita taira uxariwaita ukunyeseri arama ae.

²⁸Peyuiriana sepiri muiri penye pekuerewaita, peyuiriana sepiri penye perasuwaita ipusewaa haxari arama kuri pepitu puranga.

²⁹Pexari hamprezu penye pesu arama seirumu peyumbue seirumu nyãse timaa ipiaiwawaa ixe merupiara hapurungita penye arama ape kuri timaarese pepia.

³⁰Nyãse iwasuima yawata seirumu, ipuseimawaa harasuwaa.