Read Nhengatu Mateu 12 Bible Online

Mateu 12 - Nhengatu bible

Mateu 12

¹Asui sauru rame Jesus usasawa kupixawa rupi asui sasi ainta supe yumãsi kuaita umbuewaita ape aintaumpena awati aintaumbau arama.

²Asui kuaita farizewita aintaumaa mayetaa aintaumunya, asui aintaunyee ixupe: —Remaa kuaita rembuewaita aintaumunya kua aintausaisuwaa yamunya sauru rame.

³Maa Jesus unyee ainta supe: —Maitaa tire será peleri Davi resewara sasi rame ixupe yumãsi kuaita yuiri sumuaraita?

⁴Uwike Deus ruka kiti uu arama kua meyu Deus usaisuwaa uu aintayuiri kuaita sumuaraita, nyãse saserdutita umbau aramawaa ae.

⁵Maitaa tiserá peleri kuera Muize umpinimawaa maye aintaupuraki templu upe sauru rame kuaita saserdutita, maa tiawa upuderi umbeu puxi aintarese?

⁶Kuiri hambeu penye arama, aikue yepe uikuwaa pepiterupi puranga piriwaa templu sui.

⁷Haputari pirasuawaa peyumaa, timaa haputari peirumu kua yasapi aramawaa uvelya, pekuawa rame maa kua hambeuwaa timaa pembeu puxi sese kua tiwa uriku pekadu.

⁸Aete sauru iyara kua unaseriwaa umaa ara.

⁹Asui usu aintasui uwike aintasinaguga kiti.

¹⁰Aikue yepe apigawa iangaiwarawaa ipu. Asui aintaupurandu Jesus: —Maitaa yapuderi yamburi mãsi sauru rame? Yawe aintaunyee ixupe nyãse aintauputari aintaumbeu sese puxi.

¹¹Asui unyee ainta supe: —Awataa pesuiwara urikuwaa uvelya uwari rame maa iwi kuara kiti sauru rame maitaa tiserá maa usupiri ae nyã ara?

¹²Puranga piri apigawa uvelya sui ape yapuderi yamunya ainta supe puranga muiri ara sauru rame yuiri.

¹³Asui unyee ixupe kua apigawa: —Resupiri neipu. Asui usupiri ipu, asui purangana ae maye suaxara ipu yawe.

¹⁴Asui aintausu ukara kiti kuaita farizewita, aintauyumuatiri aintaupurungita Jesus rese aintauyuká arama ae.

¹⁵Maa Jesus ukuawa aintarese ape usu aintasui, asui siya miraita uri sakakuera, asui umburi aintasui panye mãsi.

¹⁶Asui umundu tiarama aintaumbeu sesewara.

¹⁷Yawe Jesus umunya, umunya arama kuaye umbeuwaa yawe kua utitikawaa Izaia.

¹⁸Yawe unyee: —Pemaa kua ixe aramawaa haparawakawaa kua haputariwaa, kua hamaawaa ixupe arama suuri. Haxari kuri ixupe arama seespiritu, uxari arama kuri aintaukuawa aintauriku aintapekadu kuaita tiwaita judeu.

¹⁹Umbaa kuri uyakawa ainta, timaa kuri usasemu ainta supe, tikuri awa usendu kirimbawa upurungita ukara kiti.

²⁰Timaa kuri umpena pindaiwa upena putariwaa, timaa kuri umuweu lamparina yawaitentuanawaa uweu senundere uxari purangawaa umuserana ainta.

²¹Asuiwana kuri sera rese aintausaru aintaumaa purangawaa kuaita tiwaita judeu.

²²Asui aintaururi ipiri yepe urikuwaa demuniu sesaimawaa ae muduwaa ae, asui umukaturu ae ape umaawana upurungitana yuiri kua sesaimawaa muduwaa.

²³Asui kuaita miraita siyawaita aintaakayemu aintaumaa Jesus asui aintaunyee: —Maitaa aete Davi rimiariru?

²⁴Asui kuaita farizewita aintausendu inyenga, asui aintauyupurungita: —Anyunte umburi aintasui demuniu Yurupari ukuawasawa irumu kua demuniwita ruixawa.

²⁵Jesus ukuawa aintaumanduariwaa ape unyee ainta supe: —Aintaruixawa umburi rame imiraita aintaupawa maa, yawete yuiri panye tetama puraita aintarukapuraita yuiri, aintaumaramunya rame maa anyunte aintaupawa maa.

²⁶Yurupari umburi rame maa Yurupari uyumburi maa aepawate maitaa upuderi uiku Yuruparisawa upe.

²⁷Hamburi rame maa demuniwita Yurupari ukuawasawa irumu awa ukuawasawa irumutaa aintaumburi ainta kuaita perairaita? Aintate kuri umbeu peresewara.

²⁸Maa hamburi rame demuniwita Deus Espiritu irumu pekuawa kuri usikana perese peruixawa arama kua Deus.

²⁹Maitaa yepe upuderi uwike kirimbawawaa ruka upe umunda arama iyara tirame upukuari ae senundere umunda iyaraita? Asui upukuari rire ae urasu panye.

³⁰Kua tiwa uiku seirumu umuruanyana ixe, kua tiwa umuatiri seirumu ainta, umusãi ainta.

³¹Ape hambeu penye, Deus kuri uperduari aintasui panye aintapekadu panye yuiri aintaumbeuwaa puxi sese uperduari kuri aintasui ae kuaita mundu puraita, maa kua aintaumbeuwaa puxi Espiritu Santu rese timaa kuri uperduari aintasui ae.

³²Deus kuri uperduari aintasui panye puxi aintaumbeuwaa sese kua unaseriwaa umaa kua mundu, maa kua aintaumbeuwaa puxi Espiritu Santu rese timaa kuri uperduari aintasui ae nẽ kuiri nẽ mairame kuri.

³³Pexari purangawaa kua mirá ape puranga kuri iya u pexari rame puxuwerawa kua mirá ape kuri puxuwerawaita iya, nyãse iya irumu yapuderi yakunyeseri kua mirá.

³⁴Penye buyaita, maitaa pepuderi pepurungita purangawaa puxuwerawaita pukusawa penye? Nyãse pepia suiwara kua pemusemuwaa peyuru sui.

³⁵Yepe apigawa purangawaa uyuka imaa purangawaa imaa riru purangawaa sui, maa kua apigawa puxuwerawa uyuka imaa puxuwerawa imaa riru puxuwerawa sui.

³⁶Kuiri hambeu penye arama: —Mairame kuri Deus uxari aintaupurara arama aintapekadu resewara aintaumbeu kuri sesewara panye kua aintaumbeuwaa tenyuntu.

³⁷Nyãse nenyenga resewara puranga kuri inde, asui nenyenga resewara yuiri repurara kuri nepekadu resewara.

³⁸Asui yepeyepe umpinimawaita farizewita yuiri aintaunyee ixupe: —Inde rembuewaa yaputari remunya yamaa remukame aramawaa ipupe.

³⁹Asui Jesus unyee ainta supe: —Kuaita miraita kuiriwaraita puxuwerawaita warixiwaita aintaupurandu hamunya arama aintaumaa hamukame aramawaa ipupe, maa tihamunya ainta supe ae, anyunte hamunya kuaye umunyawaa yawe kua utitikawaa Juna.

⁴⁰Kuaye Juna uikuwaa yawe pirá turusuwaa marika upe musapiri ara pituna yuiri, yawete yuiri kuri uiku iwi kuara kiti kua unaseriwaa umaa kua mundu.

⁴¹Mairame kuri Deus umbeu pekadu resewara aintaupuamu kuri kuaita Ninive upewaraita aintaumbeu Deus uxari arama pepurara pepekadu resewara, nyãse kuxima sasiyara aintaumanduari aintapekadu aintausendu irumu Juna inyenga, aikue yepe pepiterupi puranga piriwaa Juna sui.

⁴²Kua kunya Sul suiwara aintaruixawa ae, umbeu yuiri kuri Deus uxari arama pepurara penye miraita kuiriwaraita pepekadu resewara umbeu irumu kuri pepekadu, nyãse kuxima uri apekatu sui usendu arama Salumão ukuawasawa, maa kuiri yepe uiku pepiterupi puranga piriwaa Salumão sui.

⁴³Usemu rire apigawa sui kua demuniu ikiawaa uwata tikangawaa upe uputari timaarese ae maa tiupuderi.

⁴⁴Asui unyee kua demuniu: —Hayuiri kuri seruka kiti hayuiriwaa sui, asui uri umaa iyaraimawaa ae upiriana ae umukaturuana senunde ae.

⁴⁵Asui kua demuniu usu urasu irumu seti demuniu puxuwera piriwaita isui, asui aintauwike aintauiku arama ipia upe kua apigawa. Asui puxuwera piri uiku kua apigawa kuximawaa sui uiku ramere yepe demuniu irumu. Yawete yuiri kuri aintauiku puxi kuaita miraita kuiriwaraita.

⁴⁶Jesus upurungitare uiku aintauri aintaupuamu ukara kiti kuaita imaya imuita yuiri, aintauputari aintaupurungita irumu.

⁴⁷Asui yepe unyee ixupe: —Xukui nemaya ukara kiti nemuita yuiri aintauputari aintaupurungita neirumu.

⁴⁸Asui Jesus unyee ixupe, kua umbeu aintaresewara: —Awataa semaya, awataa kuaita semuita?

⁴⁹Asui umukame ipu aintarese kuaita umbuewaita unyee: —Aintate semaya semuita yuiri.

⁵⁰Nyãse panye kuaita umunyawaita kuaye sepaya iwaka kitiwara uputariwaa yawe aintate semuita serendiraita yuiri semaya yuiri.