Read Nhengatu Mateu 13 Bible Online

Mateu 13 - Nhengatu bible

Mateu 13

¹Asui nyã ara Jesus usemu uka sui usu uwapika lagu rimbiwa kiti.

²Asui siya miraita aintauri aintauyumuatiri suaki, ape uwiye igara upe uwapika arama ape, asui aintaupuamu lagu rimbiwa upe kuaita miraita panye.

³Asui umbeu ainta supe siya inyenga irumu umbue aramawaa ipupe ainta, umbeu ainta supe: —Yepe uyutimawaa usu uyutima.

⁴Asui uyutima rame uiku yepeyepe mitima karusu uwari isui pee rupi, asui aintauri aintaumbau ae kuaita wirá mirita.

⁵Yepeyepe mitima karusu uwari itatiwa upe kuaira iwi ape, asui mitima uyukiriari kutara nyãse timaa tiipi iwi ape.

⁶Asui kurasi usemu umuturi saku mitima rese asui uxirika tiresewara uriku sapu.

⁷Asui yepeyepe mitima karusu uwari yuutiwa upe asui yuu uyukiriari kutara piri isui asui uyuká ae.

⁸Yepeyepe mitima karusu uwari puranga iwi rese asui uriku iya puranga, yepeyepe mitima uxari sem iya, yepeyepe uxari sesenta iya, yepeyepe uxari trinta iya.

⁹Awa uriku iapisa kuara pexari usendu.

¹⁰Asui umbuewaita aintauri ipiri aintaupurandu ae: —Marantaa repurungita ainta supe nenyenga irumu rembue aramawaa ipupe?

¹¹Asui umbeu ainta supe: —Haxari pekuawa arama kua nyenga hayumimiwaa sese kua iwaka ruixawa imiraita, maa timaa aintaukuawa kuaita amuita.

¹²Kua urikuwaa yamee xinga ixupe uriku arama turusu maa kua tiwa uriku yayuka isui kua urikuwaa.

¹³Hapurungita ainta supe nyenga irumu hambue aramawaa ipupe ainta aintaumaa arama aintaresa irumu maa timaa nungara aintaumaa, aintausendu arama aintaapisa irumu maa timaa nungara aintausendu, tiyuiri aintaukuawa mayesawataa ae.

¹⁴Aintaumunya maye Izaia utitikawaa yawe kuxima, yawe unyee: “Pesendu peapisa irumu maa timaa pekuawa mayesawataa ae, pemaa peresa irumu maa timaa pekuawa mayesawataa ae.

¹⁵Nyãse santawaa aintapia kuaita miraita uyusikindawa aintaapisa kuara aintausapumi aintaresa tiarama aintaumaa aintaresa irumu, yawaite maa aintausendu aintaapisa irumu, yawaite maa aintaukuawa aintapia upe, yawaite aintautrukari aintapia hamukaturu arama ainta.”

¹⁶Suuri kuri penye nyãse peresa umaa, suuri kuri penye nyãse peapisa kuara usendu.

¹⁷Supiwa hambeu penye arama: —Siya utitikawaita siya purangawaita yuiri aintauputari kuera aintaumaa kua pemaawaa maa timaa aintaumaa ae, aintauputari kuera aintausendu kua nyenga pesenduwaa maa timaa aintausendu ae.

¹⁸Ape pesendu puranga mayesawataa kua nyenga uyutimasara rese.

¹⁹Panye kuaita usenduwaita kua nyenga maye aintaruixawa arama kua Deus, tirame aintaukuawa mayesawataa ae uri kuri aintarese kua puxuwerawa usiki arama aintapia sui kua nyenga uyutimawaa. Aete kua uyutimawaa pee rimbiwa kiti.

²⁰Kuaye mitima karusu uwariwaa yawe itatiwa upe kua usenduwaa kua nyenga asui aramete suuri usuanti ae.

²¹Maa sapuimawaa ae ape kutara uxari ae nyãse upurara rame uiku aintaumuruanyana ae senyenga resewara anyunte ipiaiwa ae uxari ae.

²²Kuaye mitima karusu uwariwaa yawe yuutiwa upe kua usenduwaa kua nyenga uyukawaa ipia kua mundu rese, asui kua mundu iyara uyuwika kua nyenga isui, asui uiku iyaima.

²³Asui kua mitima karusu uwariwaa purangawaa iwi rese aete kua usenduwaa kua nyenga ukuawa mayesawataa ae, asui uriku iya, amu uriku sem iya, amu uriku sesenta amu uriku trinta iya.

²⁴Asui umbeu ainta supe yepe inyenga umbue aramawaa ipupe ainta, yawe umbeu: —Iwaka ruixawa imiraita yawe kua apigawa uyutimawaa mitima purangawaa ikupixawa upe.

²⁵Asui aintaukiri pukusawa uri kua suanyana uyutima arama tenyuntuwaa mitima trigu pitera rupi, asui usuana.

²⁶Asui usemu rire kua imitima uriku iya usemu yuiri kua tenyuntuwara.

²⁷Asui upurakiwaita ixupe aintauri ipiri kua uka iyara aintaumbeu ixupe: —Inde yaneruixawa maitaa tireyutima mitima purangawaita nekupixawa upe, maa suitaa uri kuaita tenyuntuwaraita?

²⁸Umbeu ainta supe: —Seruanyana hakuawa kua umunyawaa yawe. Asui upurakisaraita aintaunyee ixupe: —Maitaa reputari yasiki yamburi kuaita tenyuntuwaraita?

²⁹Asui unyee ainta supe: —Umbaa, yawaite maa pemburi yuiri trigu pesiki rame maa pemburi kuaita tenyuntuwaraita.

³⁰Pexari aintauyukiriari yepewasu ate mairame kuri yapuu ainta, asui hambeu kuri ainta supe kuaita upuusaraita peyupiru pemuatiri kuaita tenyuntuwaraita pepukuari pesapi ainta maa pemuatiri kua trigu seruka upe.

³¹Asui umbeu ainta supe yepe inyenga umbue aramawaa ipupe ainta, yawe unyee: —Kua iwaka ruixawa imiraita iyawe kua yepe apigawa uyutimawaa mitima mustarda karusu ikupixawa upe.

³²Kuaira miri panye mitima karusu sui kua mustarda karusu, maa iwate piri uyukiriari panye mitima sui, uyukiriari kuaye mirá yawe, asui aintauri kuaita wirá mirita aintaumunya aintaruka sakanga rese.

³³Asui umbeu ainta supe yepe inyenga umbue aramawaa ipupe ainta, yawe unyee: —Kua iwaka ruixawa imiraita iyawe kua kunya ukitikawaa maniaka pisasuwaa umunani maniaka membeka irumu ate sai ae panye.

³⁴Jesus umbue kuaita siyawaita miraita inyenga irumu umbue aramawaa ipupe ainta, timaa umbue ainta inyenga uyukuawawaa irumu.

³⁵Umunya kuaye yepe utitikawaa yawe, sese hapirari kuri seyuru hambeu arama nyenga hambue aramawaa ipupe ainta, hambeu kuri kua inyenga hayumimiwaa aintasui kua mundu uyupiru irumu ate kuiri.

³⁶Asui Jesus uxari aintauyuiri isui kuaita miraita siyawaita. Asui uwike uka kiti, asui umbuewaita aintauri ipiri aintaunyee ixupe: —Rembeu yande arama mayesawataa kua inyenga rembeuwaa tenyuntuwaraita rese kupixawa upewaita.

³⁷Umbeu ainta supe: —Kua uyutimasara mitima purangawaa aete kua unaseriwaa umaa kua ara.

³⁸Kua mundu aete kua kupixawa, Deus imiraita kuaita mitima purangawaita, puxuwerawa rairaita kuaita tenyuntuwaraita.

³⁹Yurupari kua suanyana uyutimawaa kuaita tenyuntuwaraita, upuu aramawaa kua anyu aramawaa ara, anjuita kuaita upuu aramawaita.

⁴⁰Kuaye aintaumuatiriwaa yawe kuaita tenyuntuwaraita aintausapi arama ainta, yawete yuiri kuri anyu aramawaa ara upe.

⁴¹Kua unaseriwaa umaa kua ara umundu kuri ianjuita aintausu arama aintaumutirika imiraita pitera sui panye kuaita uxariwaita amuita umunya puxuwera kuaita yuiri umunyawaita tenyuntu.

⁴²Asui aintaumburi kuri ainta tata kiti, aintauyaxiu kuri ape, aintausuu kuri aintaranya.

⁴³Asui kuaita purangawaita aintaumuturi kuri kuaye kurasi umuturiwaa yawe aintaruixawa irumu kuri aintapaya. Pexari aintausendu kuaita urikuwaita aintaapisa.

⁴⁴Kua iwaka ruixawa imiraita iyawe kua uru aintauyumimiwaa yawe kupixawa upe, suuri ipia kua apigawa uwasemu irumu ae. Asui uyumimi yuiri ae, asui usu uvenderi arama panye imaa upiripana arama kua iwi.

⁴⁵Asui kua iwaka ruixawa imiraita iyawe kua usikariwaa upiripana arama perula purangawaita.

⁴⁶Uwasemu irumu yepe perula sipiwasuwaa usu uvenderi panye imaa upiripana arama ae.

⁴⁷Asui kua iwaka ruixawa imiraita iyawe kua aintapisa aintaumburiwaa paraname upisika aramawaa panye mayewaa pirá.

⁴⁸Asui teresemuana aintapisa kuaita upisaitikawaita aintausiki ae praya rese, asui aintauwapika aintauparawaka kuaita pirá purangawaita aintasextu upe, maa kuaita puxuwerawaita aintaumburi ainta.

⁴⁹Yawete yuiri kuri anyu aramawaa ara upe aintauri kuri kuaita anjuita aintautiari arama puxuwerawaita purangawaita sui.

⁵⁰Aintaumburi kuri ainta tata upe akiti kuri aintauyaxiu aintausuu kuri aintaranya.

⁵¹Jesus umbeu ainta supe: —Maitaa pekuawa mayesawa panye kua hambeuwaa? Aintaunyee ixupe: —Ẽẽ yaneruixawa yakuawate.

⁵²Umbeu ainta supe: —Panye kuaita umpinimawaita ukuawawaita iwaka ruixawa imiraita rese aintaumunya iyawe kua uka iyara uyukawaa imaa pisasuwaa kuximawara yuiri imaa riru sui.

⁵³Jesus umbeu rire kua inyenga umbue aramawaa ipupe ainta, usu asui.

⁵⁴Asui usika irumu setama upe umbue ainta aintasinaguga upe, ape aintaakayemu aintausendu aintaunyee: —Maa suiwarataa ukuawasawa kua apigawa umunya aramawaa kuaita milagri?

⁵⁵Maitaa timaa aete kua karapina raira? Maitaa timaa imaya kua serawaa Maria? Maitaa timaa imuita kua Tiagu Juze yuiri Simão yuiri Juda yuiri?

⁵⁶Asui kuaita sendiraita yuiri maitaa timaa yanerumuaraita panye ainta? Ape maa suiwarataa panye kua ukuawasawa?

⁵⁷Asui puxi aintaumaa ixupe, ape Jesus umbeu ainta supe: —Kua utitikawaa aintaurespetari ae, maa sendawa suka puraita tiaintaurespetari ae.

⁵⁸Ape timaa upuderi umunya siya milagri tiresewara aintauruyari.