Read Nhengatu Mateu 14 Bible Online

Mateu 14 - Nhengatu bible

Mateu 14

¹Asui nyã tempu aintaruixawa kua Erudi usendu Jesus resewara.

²Asui umbeu ainta supe kuaita upurakisaraita ixupe: —Aete Juão Batista uyuiriwaa upaka manusawa sui sesewara umunya kuaita milagri ukuawasawa irumu.

³Kuxima Erudi umundu suraraita aintaupisika arama kua Juão aintaupukuari ae aintaumburi arama ae kadeya kiti sesewara kua imu Filipe rimiriku sera Erudia.

⁴Nyãse Juão umbeu ixupe kua Erudi: —Timaa repuderi reyuka nerimiriku arama ae.

⁵Ape uputari uyuká ae maa timaa upuderi nyãse usikie miraita sui nyãse aintaumanduari utitikawaa kua Juão.

⁶Asui yepe ara aintaumunya arama festa aintaumanduari aramawaa ipupe iakayu kua Erudi, asui kua Erudia membira uri upurasi aintaumaa arama, asui suuri Erudi umaa ixupe.

⁷Ape inyenga kirimbawawaa irumu umbeu ixupe: —Upurandu arama irumu maa uputariwaa irumu.

⁸Asui upurandu irumu kuaye imaya umbeuwaa yawe ixupe, unyee ixupe: —Kuiri remee ixe arama Juão Batista akanga pratu upe.

⁹Asui sasiyara ipia kua aintaruixawa, maa sesewara kua umbeuwaa kirimbawa aintaresewara yuiri kuaita uwapikawaita umbau irumu, asui umundu aintaumee ixupe ae.

¹⁰Ape uxari aintaumunuka Juão Batista akanga isui kadeya upe.

¹¹Asui aintaurasu iakanga pratu upe aintauxari arama ixupe ae kua kunyamuku, asui urasu ae imaya supe.

¹²Asui aintauri kuaita Juão Batista umbuewaita kuera aintaurasu arama ipira aintauyutima arama ae iwi upe, asui aintausu aintaumbeu sesewara Jesus supe.

¹³Asui Jesus usendu irumu Juão resewara, uwiye igara upe usu arama iyaraimawaa kiti, asui kuaita miraita aintauri aintarendawa sui panye aintausu arama pee rupi Jesus ruaxara aintausendu irumu usuana.

¹⁴Asui Jesus usemu irumu igara sui umaa kuaita miraita siyawaita, asui pirasuawaa umaa ainta supe ape umukaturu kuaita imãsiwaita.

¹⁵Asui karukana ainta, umbuewaita umbeu ixupe: —Karukana yande ike iyaraimawaa upe remundu aintauyuiri nesui aintaupiripana arama aintaumbau arama tetama kiti kuaita siyawaita.

¹⁶Asui Jesus umbeu ainta supe: —Timaa arama yamundu aintausu ainta, penyete pemee aintaumbau arama.

¹⁷Asui aintaumbeu ixupe: —Anyunte yariku sinku pão mukuĩ pirá yuiri.

¹⁸Asui umbeu ainta supe: —Peruri ixe arama ainta.

¹⁹Asui Jesus umundu aintauwapika kapĩ tiwa upe kuaita miraita, asui upisika sinku pão mukuĩ pirá yuiri, umaa iwate kiti uabensuari ainta, asui upartiri kua pão asui umee ainta supe kuaita umbuewaita aintaumee arama ainta supe kuaita miraita siyawaita.

²⁰Asui aintaumbau aintaapu muiri ainta. Asui aintaumuatiri simirera duzi sextu.

²¹Sinku mili aintasiyasawa kuaita apigawaita umbauwaita, asui kunyaita tainaita yuiri.

²²Asui Jesus uxari umbuewaita uwiye igara upe aintausu arama senunde suaxara kiti umundu irumu aintauyuiri isui kuaita siyawaita.

²³Asui Jesus uxari irumu aintauyuiri isui kuaita miraita siyawaita usu iwitera rese yepenyu upurandu arama ipaya irumu. Ape uikure anyuira ate pituna.

²⁴Asui aintaigara uyatikure uiku lagu piterupi, kirimbawa gapenu upetepeteka aintaigara rese, nyãse iwitu upeyu aintaruaxara.

²⁵Asui pituna xingare Jesus usu aintapiri, uwata parana ara rupi.

²⁶Asui kuaita umbuewaita aintaumaa irumu uwata parana ara rupi aintausikie turusu, aintaunyee: —Aete ianga. Asui aintausasemu aintausikie resewara isui.

²⁷Asui anyunte Jesus upurungita ainta supe umbeu ainta: —Timaarese penye ixete kua, tepesikie.

²⁸Asui Pedru unyee ixupe: —Seruixawa inde rame kua, remundu hasu nepiri parana ara rupi.

²⁹Asui Jesus umbeu ixupe: —Reyuiriana, asui Pedru usemu igara sui uwata parana ara rupi usu arama Jesus ipiri.

³⁰Maa umaa irumu kirimbawa iwitu upeyu usikie, asui uyupiru usu tiipi kiti paraname, asui usenui Jesus umbeu: —Seruixawa remukaturu ixe.

³¹Asui aramete Jesus uri usupiri ae ipu irumu umbeu ixupe: —Inde apigawa kuairawaa reruyari, marantaa mukuĩ remanduariwaa?

³²Asui aintauwiye irumu igara upe aramete upituana iwitu.

³³Asui aintaumee purangawaa Jesus supe kuaita uikuwaita igara upe aintaumbeu ixupe: —Supiwa Deus raira inde.

³⁴Asui aintausu irumu suaxara kiti aintauyari iwi rese sera Genezare.

³⁵Asui kuaita apigawaita apewaraita aintaumaa irumu Jesus ae aintausu aintaumbeu panye tetama kiti, asui aintaururi ipiri panye mãsiweraita.

³⁶Asui aintaupurandu ae uxari arama aintaupisika irupa rimbiwa rese, asui purangana panye kuaita upisikawaita sese.