Read Nhengatu Mateu 15 Bible Online

Mateu 15 - Nhengatu bible

Mateu 15

¹Asui aintauri Jesus ipiri yepeyepe umpinimawaita farizewita yuiri Jeruzalẽ suiwaraita.

²Aintaunyee ixupe: —Marantaa tiaintaumunya tuyuweita ikustumi kuaita rembuewaita? Marantaa tiaintaumuyasuka aintaipu aintaumbau rundere?

³Asui Jesus unyee ainta supe: —Marantaa tiperuyari Deus umunduwaa yaruyari arama peramunyaita inyenga sui?

⁴Nyãse Deus umbeu kuxima, perespetari pepaya pemaya yuiri pexari umanu kua umbeuwaa puxi ipaya rese imaya rese yuiri.

⁵Maa penye pembeu: —Awa umbeu ipaya supe imaya supe yuiri, kua peputariwaa seirumu hamee aramawaa kuri Deus supe ae.

⁶Asui ae timaa kuri urespetari ipaya imaya yuiri. Ape penyenga resewara pemutenyuntuwa kua Deus nyenga.

⁷Penye retentuwaita, supiwa utitika perese kua Izaia.

⁸Yawe unyee: —Kuaita miraita aintaumee purangawaa ixe arama aintayuru rimbiwa irumu maa apekatu aintaumanduariwaa sesui.

⁹Timaa arama ixe arama kua aintaumbeuwaa purangawaa ixe arama kuaita umbuewaita apigawaita nyenga senyenga sui.

¹⁰Asui Jesus umuatiri ipiri kuaita miraita, unyee ainta supe: —Kuiri pesendu kua hambeuwaa pekuawa arama mayesawataa ae.

¹¹Timaa umuaiwa apigawaita umanduariwaa kua uwikewaa aintayuru upe, maa kua usemuwaa aintayuru sui umuaiwa aintaumanduarisawa.

¹²Asui umbuewaita aintauri aintaumbeu ixupe: —Maitaa rekuawate puxi aintaumaa inde arama kuaita farizewita aintausendu resewara rembeuwaa?

¹³Jesus usuaxara ainta, unyee ainta supe: —Sepaya iwaka kitiwara umburi kuri panye kuaita mitima tiwaita uyutima.

¹⁴Timaarese peiku aintasui pexari ainta, nyãse umbuewaita sesaimawaita ainta kua yepe sesaimawaa urasu rame yepe sesaimawaa aintauwari kuri barera kiti.

¹⁵Asui Pedru unyee ixupe: —Rembeu yande mayesawataa kua nyenga rembuewaa aramawaa ipupe yande.

¹⁶Asui Jesus unyee ixupe: —Maitaa penye tire será pekuawa?

¹⁷Maitaa tire pekuawa kua uwikewaa yaneyuru upe uwike yuiri yanemarika kiti, asui usemu yanesui?

¹⁸Maa kua nyenga usemuwaa yaneyuru sui usemu yuiri yanepia sui aete umuaiwa yande.

¹⁹Nyãse usemu yanepia sui panye yamanduariwaa tenyuntu, uxari yaputari yayuká mira, uxari yaputari amu kunya yanerimiriku sui, uxari yayumuwarixi, uxari yaputari yamunda, uxari yaganani amuita rese, uxari yambeu puxuwera tenyuntu.

²⁰Aete umuaiwa miraita umanduarisawa, maa yambau rame tiyamuyasuka yaneipu timaa umuaiwa yande.

²¹Asui Jesus uyuiri aintasui usu arama Tiru kiti Sidum kiti yuiri.

²²Asui uri ipiri yepe kunya Kanaã suiwara kirimbawa umbeu ixupe: —Inde seruixawa, inde Davi rimiariru pirasua remaa ixe arama, kirimbawa demuniu uiku sembira ipia upe.

²³Asui timaa Jesus usuaxara ae, asui umbuewaita aintaunyee ixupe: —Remundu uyuiri yanesui nyãse usenui uiku yanerakakuera sui.

²⁴Asui Jesus umbeu: —Anyunte sepaya umundu ixe aintapiri kuaita uvelya uyusupariwaita aintasuiwara kuaita Israel rimiariruita.

²⁵Asui nyã kunya uri umunya benditu ixupe umbeu: —Seruixawa reajudari ixe.

²⁶Asui Jesus umbeu ixupe: —Timaa puranga yayuka meyu tainaita sui yamburi arama yawara mirita supe ae.

²⁷Asui umbeu ixupe: —Supite seruixawa maa kuaita yawara mirita aintaumbau meyu uwariwaa aintayara meza wira kiti.

²⁸Asui Jesus umbeu ixupe: —Inde kunya kirimbawa reruyari nepia upe ape hamunya inde arama kuaye reputariwaa yawe. Asui aramete ikatuana imembira.

²⁹Asui Jesus uyuiri asui, asui uri kuayentu lagu Galileya rimbiwa upe. Asui uyupiri iwitera rese ape uwapika.

³⁰Asui aintauri ipiri siya miraita, aintaururi aintairumu puxuwerawaita aintaretima, alejaduita yuiri sesaimawaita yuiri tiwaita upurungita yuiri, siya amuita yuiri, asui aintauxari Jesus ipi ruaki ainta, asui umukaturu ainta.

³¹Ape aintaakayemu aintaumaa Jesus supe kuaita miraita aintaumaa irumu upurungitana kuaita tiwaita upurungita, asui purangana kuaita puxuwerawaita aintaretima, asui aintauwatana kuaita alejaduita asui aintaumaawana kuaita sesaimawaita, ape aintaumee purangawaa ixupe kua Israelitaita Deus.

³²Asui Jesus usenui ipiri kuaita umbuewaita umbeu ainta supe: —Pirasua hamaa ainta supe kuaita miraita siyawaita nyãse aintaurikuana musapiri ara aintauiku seirumu asui tiaintauriku aintaumbau arama, ape tihaputari hamundu aintauyuiri sesui yumãsi irumu yawaite aintauwari pee rupi.

³³Asui aintaumbeu ixupe kuaita umbuewaita: —Mametaa maa yapuderi yawasemu pão ike iyaraimawaa upe aintaumbau arama panye kuaita miraita?

³⁴Asui Jesus umbeu ainta supe: —Muiritaa periku pão? Aintaunyee ixupe: —Yariku seti pão yepeyepe pirá miri yuiri.

³⁵Asui umundu aintauwapika iwi upe kuaita miraita.

³⁶Upisika kuaita seti pão pirá mirita yuiri, asui umee grasa sese, asui upartiri ainta umee ainta supe kuaita umbuewaita aintaumee arama miraita supe.

³⁷Asui aintaumbau ae aintaapu ainta panye, asui aintaumuatiri simirera seti sextu teresemu.

³⁸Kuatru mili aintasiyasawa kuaita apigawaita umbauwaita, asui kunyaita tainaita yuiri.

³⁹Asui Jesus uxari aintauyuiri isui kuaita siyawaita uwiye igara upe usu arama Magadã kiti.