Read Nhengatu Mateu 16 Bible Online

Mateu 16 - Nhengatu bible

Mateu 16

¹Asui aintauri ipiri kuaita farizewita aintairumute kuaita sadusewita aintaupurandu umunya arama aintaumaa milagri iwaka suiwarawaa.

²Asui umbeu ainta supe: —Kurasi uwike irumu pembeu, timaa kuri amana wirande nyãse ipirangawaa kua iwaka rese.

³Asui kurasi usemu irumu pembeu, amana kuri yande nyãse ipiranga kua iwaka. Penye pekuawa mayesawataa kua pemaawaa iwaka rese, marantaa tipekuawa mayesawataa kua pesenduwaa pemaawaa yuiri uriwaa pepiri kua mundu kiti?

⁴Aintauputari aintaumaa milagri kuaita miraita kuiriwaraita puxuwerawaita warixiwaita maa timaa hamunya ainta supe yawe, anyunte hamunya kuaye umunyawaa yawe kua Juna. Asui Jesus uxari ainta uyuiri aintasui.

⁵Asui aintausikana suaxara kiti kuaita umbuewaita timaa aintaurasu pão nyãse timaa aintaumanduari aintaurasu.

⁶Asui Jesus umbeu ainta supe: —Pemaa pesui aintamaniaka membeka saiwaa kuaita farizewita sadusewita yuiri.

⁷Asui aintauyupurungita aintapawa, maitaa yawe unyee tiresewara yaruri yambau arama pão.

⁸Asui Jesus ukuawa aintaumanduariwaa umbeu ainta supe: —Penye apigawaita kuairawaa peruyari, marantaa peyupurungita penye tiresewara peruri pão?

⁹Maitaa tire pekuawa, maitaa tipemanduari kuaita sinku pão mayetaa aintaapu kuaita sinku mili miraita, muiri sextutaa yuiri pemuatiri simirera?

¹⁰Maitaa timaa pemanduari kuaita seti pão maye aintaapu kuaita kuatru mili miraita, muiri sextutaa yuiri pemuatiri?

¹¹Marantaa timaa pekuawa tihambeu penye arama sese kua pão, maa hambeu penye pemaa pesui aintamaniaka membeka saiwaa kuaita farizewita sadusewita yuiri?

¹²Asui aintaukuawa timaa uputari aintaumaa aintasui maniaka membeka saiwaa meyu rupiara maa uputari aintaumaa aintasui aintaumbuewaa kuaita farizewita sadusewita yuiri.

¹³Asui Jesus usika irumu Sezareya kiti Filipe upe upurandu kuaita umbuewaita, mayetaa aintaumbeu kuaita miraita awataa kua unaseriwaa umaa kua ara?

¹⁴Asui aintaumbeu ixupe: —Amuita umbeu Juão Batista ae, amuita umbeu Elia ae, amuita umbeu Jeremia ae u amu aintasuiwara kuaita utitikawaita.

¹⁵Asui umbeu ainta supe: —Maa penye maitaa pembeu serese? Awataa ixe?

¹⁶Asui Simão Pedru umbeu ixupe: —Indete Kristu, indete taira kua Deus upakawaa.

¹⁷Asui Jesus umbeu ixupe: —Suuriwaa kuri inde Simão Juna raira, nyãse timaa apigawa uxari rekuawa serese maa sepaya iwaka kitiwarawaa uxari rekuawa serese.

¹⁸Asui hambeu inde: —Indete Pedru, asui hamunya kuri seingreja sese kua ita, asui timaa kuri manusawa upuderi umbawa ae.

¹⁹Haxari kuri inde arama kua xavi ipupe aramawaa imiraita arama ainta kua iwaka ruixawa. Panye remunduwaa aintaumunya kua mundu upe purangate aintaumaa ae iwaka kiti. Panye rexariwaa tiarama aintaumunya ae kua mundu upe tiyuiri aintaumunya ae iwaka kiti.

²⁰Asui Jesus umbeu umbuewaita kirimbawa tiarama aintaumbeu sesewara aete kua Kristu.

²¹Asui yawe rire Jesus uyupiru uxari umbuewaita ukuawa urikute usu arama Jeruzalẽ kiti aintauxari arama upurara kuaita tuyuweita saserdutita taruixawaita yuiri umpinimawaita yuiri, umbeu ainta maye aintauyuká arama ae asui musapiri ara rire upaka usemu iwi kuara sui.

²²Asui Pedru usenui ae amu kiti umbeu kirimbawa ixupe: —Seruixawa pirasua reyumaa inde arama terexari aintaumunya inde arama kuaye rembeuwaa yawe.

²³Asui Jesus uyereu umaa Pedru supe umbeu ixupe: —Resu sesui inde Yurupari, remuapatuka ixe nyãse timaa repurungita Deus ukuawasawa irumu maa repurungita apigawa ukuawasawa irumu.

²⁴Asui Jesus umbeu ainta supe kuaita umbuewaita: —Awa uputari usu seirumu urikute uyuxari aepawate urikute upisika ikurusa usu serakakuera.

²⁵Maa kua uputariwaa uyumukaturu sikuesawa upepawa ukanyemu kuri isui ae, awa uxari ukanyemu sikuesawa seresewara uwasemu kuri sikuesawa.

²⁶Maataa kuri uriku kua apigawa uganyariwaa panye kua mundu iyara asui ukanyemu kuri ianga isui? Maa upetaa apigawa upuderi upagari ianga rikuyara?

²⁷Uri kuri umuturi purangawaa ipaya iyawe kua unaseriwaa umaa kua ara anjuita irumu asui kuri upagari ainta supe kuaita mundu puraita aintayaweyawe kuaye aintaumunyawaa yawe ixupe.

²⁸Supiwa hambeu penye arama, yepeyepe pesuiwara uikuwaita ike timaa kuri aintaumanu senundere aintaumaa kua unaseriwaa umaa kua ara uri aintaruixawa yawe.