Read Nhengatu Mateu 17 Bible Online

Mateu 17 - Nhengatu bible

Mateu 17

¹Asui seis ara rire Jesus usu miraita sui iwitera rese iwatewaa, urasu Pedru irumu Tiagu yuiri imute Juão yuiri.

²Asui uyutrukari ipira purangawaa aintaumaa, asui suwa umuturi kuaye kurasi umuturiwaa yawe, asui irupa umuturi murutingawaa kuaye turi umuturiwaa yawe.

³Asui aintauri Muize Elia yuiri aintaupurungita Jesus irumu.

⁴Asui Pedru unyee Jesus supe: —Seruixawa purangawaa yaiku ike, reputari rame yamunya musapiri baraka ike, yepe inde arama, yepe Muize supe, yepe Elia supe.

⁵Asui upurungita ramere uiku ae yepe nuvẽ umuturiwaa uri kuayentu aintaarupi asui aintausendu yepe nyenga usemu nuvẽ piterupi yawe unyee: —Aete seraira haputariwaa, suuri hamaa ixupe, pesendu ixupe arama.

⁶Aintausendu irumu kua inyenga aintauwari iwi upe aintaupisika aintaruwa kuaita umbuewaita aintausikie turusu.

⁷Asui Jesus uri uxari ipu aintarese umbeu ainta supe: —Pepuamu tepesikie.

⁸Asui aintausupiri aintaakanga aintaupirari aintaresa aintaumaa arama maa tiawa aintaumaa anyunte aintaumaa Jesus.

⁹Asui aintauyuiri irumu aintauwiye iwitera sui Jesus umbeu ainta supe: —Tepembeu awa supe sese kua pemaawaa senundere uyuiri upaka manusawa sui kua unaseriwaa umaa kua ara.

¹⁰Asui umbuewaita umbeu ixupe: —Marantaa aintaumbeu kuaita umpinimawaita Elia urikute uri primeru?

¹¹Asui Jesus umbeu ainta supe: —Supiwa Elia uri kuri umukaturu arama panye.

¹²Maa hambeu penye arama: —Uriana kua Elia, maa timaa aintaukuawa aete ae, ape aintaumunya ixupe kuaye aintauputariwaa yawe, yawete yuiri kuri aintauxari upurara kua unaseriwaa umaa kua ara.

¹³Asui umbuewaita aintaukuawa umbeu sese kua Juão Batista.

¹⁴Asui Jesus usika aintapiri kuaita miraita siyawaita asui yepe apigawa uri ipiri, uyurinipia ixupe.

¹⁵Unyee ixupe: —Inde seruixawa, pirasua remaa seraira nyãse uriku ataki, upurara turusu, siya viaji uwari tata upe parana kiti yuiri.

¹⁶Ape haruri ae aintapiri kuaita rembuewaita maa timaa aintaupuderi aintaumukaturu ae.

¹⁷Asui Jesus umbeu ainta supe: —Penye miraita kuiriwaraita tiwaita uruyari tiwaita umanduari, muiri arataa kuri haikure peirumu muiri arataa kuri haaguentari peirumu? Peruri ixe arama kua taina.

¹⁸Asui kirimbawa Jesus umundu usu kua demuniu, asui usemu taina sui asui aramete ikatuana kua taina.

¹⁹Asui umbuewaita aintauri aintaupurandu Jesus uyumimisawa upe miraita sui, aintaumbeu ixupe: —Marantaa tiyapuderi yamburi isui kua demuniu?

²⁰Asui Jesus umbeu ainta supe: —Timaa pemburi ae nyãse kuairare peruyari nyãse supiwa hambeu penye peruyari rame puranga kuaye mustarda karusu yawe pembeu kuri ixupe kua iwitera, resu amu kiti, asui kuri usu. Pepuderi kuri pemunya panye maantu.

²¹Yamburi arama demuniu iyawewaa yarikute yapurandu Deus irumu yayukuakuwaa upe.

²²Asui aintauyumuatiriwaa upe Galileya kiti Jesus umbeu ainta supe: —Aintauxari kuri apigawaita ipu upe kua unaseriwaa umaa kua ara.

²³Aintauyuká kuri ae, asui musapiri ara rire uyuiri kuri upaka. Asui kuaita umbuewaita sasiyara aintapia turusu.

²⁴Asui aintauri irumu Kafarnaum kiti aintauri Pedru ipiri kuaita umuatiriwaita dinyeru templu rupiara aintaumbeu ixupe: —Maitaa timaa neruixawa umee ainta supe kua dinyeru aintauputariwaa irumu?

²⁵Asui Pedru umbeu ixupe: —Ẽẽ umeete. Asui uwike uka kiti maa Jesus upurandu ae senunde sui unyee: —Inde Simão mayetaa remanduarisawa? Awa suitaa aintauyuka dinyeru kuaita mundu puraita ruixawa? Maitaa aintauyuka ae aintarairaita sui u amuita sui?

²⁶Asui Pedru umbeu ixupe: —Aintauyuka ae amuita sui. Asui Jesus umbeu ixupe: —Ape kuri timaa arama aintaupagari kuaita aintarairaita.

²⁷Maa tiarama yampiaiwa ainta ape resu parana rimbiwa kiti repinaitika, resiki kua primeruwaa pirá repirari iyuru Asui rewasemu kuri kua dinyeru uikuwaa iyuru kuara upe reyuka isui ae rerasu ainta supe ae repagari arama kua aintaupuranduwaa neirumu seirumu yuiri.