Read Nhengatu Mateu 18 Bible Online

Mateu 18 - Nhengatu bible

Mateu 18

¹Asui aintauri Jesus ipiri kuaita umbuewaita aintaumbeu ixupe: —Awataa kua puranga piriwaa aintapiterupi kuaita iwaka ruixawa imiraita?

²Asui Jesus usenui ipiri yepe taina kuairawaa uxari upuamu aintapiterupi aintaumaa arama panye.

³Asui umbeu: —Supiwa hambeu penye arama, tirame petrukari pemanduarisawa tirame pemanduari taina yawe tikuri pewike iwaka ruixawa imiraita irumu.

⁴Maa awa uyumukuaira umanduarisawa iyawe kua taina aete puranga piri aintasui panye kuaita iwaka ruixawa imiraita.

⁵Awa usuanti yepe taina iyawe kua serera rese usuanti yuiri kuri ixe.

⁶Awa uxariwaa aintaumunya puxi kuaita ipuiwaita uxariwaita ipia serese purangate maa yapukuari iayura upe ita ipusewaa yamburi arama ae parana kiti tiipiwaa upe.

⁷Puxi kuri aintarese kuaita mundu puraita, nyãse aintauxari amuita uganani ainta aintaumunya arama puxi. Maa aintaurikute aintauganani xingare ainta, maa upurara kuri kua uxariwaa amuita aintaumunya aintapuxuwerasawa.

⁸Ape kuri yepe neipi u yepe neipu uputari rame remunya puxi remunuka ae remburi arama nesui ae, puranga piri rewike mundu nunkawaa upawa kiti ipiimawaa inde, ipuimawaa yuiri tiarama aintaumburi inde tata kiti nunkawaa uwewaa upe mukuĩ ruaxara neipi neipu yuiri.

⁹Yepe ruaxara neresa uxari rame remunya puxi repikuĩ remburi nesui ae puranga piri rewike mundu tiwa upawa kiti yepe ruaxara neresa irumu tiarama aintaumburi inde tata kiti mukuĩ neresa irumu.

¹⁰Pemaa pesui yawaite pemutenyuntu kuaita ipuiwaita, kuiri hambeu penye arama, kuaita anjuita usaruwaita ainta aintaumaa sepaya ruwa yawewarawate iwaka kiti.

¹¹Maa uriana kua unaseriwaa umaa kua ara umukaturu arama kuaita uyusupariwaita.

¹²Maitaa pemanduari sese kua apigawa urikuwaa sem uvelya, uyusupari rame aintasuiwara yepe uvelya, maitaa tiuxari kuaita nuventa nuvi uvelya usu arama iwitera kiti usikari arama kua uyusupariwaa?

¹³Hambeu penye arama, sã uwasemu rame kua uyusupariwaa suuri umaa ixupe panye aintasui kuaita nuventa nuvi tiwaita uyusupari isui.

¹⁴Yawete yuiri pepaya iwaka kitiwara tiuputari yepe ukanyemu aintasuiwara kuaita ipuiwaita.

¹⁵Umunya rame inde arama puxi kua nemu resu ipiri rembeu ixupe ipekadu uyumimisawa upe miraita sui, usendu rame inde arama remuyuiriana ae Deus supe arama.

¹⁶Maa tirame usendu inde arama rerasu neirumu ipiri mukuĩ u musapiri uruyariwaita aintausendu arama maye umbeu kua umunyawaa inde arama puxi.

¹⁷Tirame usendu ainta supe rembeu sesewara ainta supe kuaita ingreja puraita, tirame usendu ainta supe kuaita ingreja puraita perikute pemaantu ixupe kuaye pemaawaa yawe ainta supe kuaita tiwaita uruyari publikanuita puxuwerawaita yuiri.

¹⁸Supiwa hambeu penye: —Muiri kuaita pepukuariwaita kua mundu upe upukuari yuiri kuri ainta iwaka kiti. Asui muiri kuaita peyurawawaita kua mundu upe uyurawa kuri yuiri ainta iwaka kiti.

¹⁹Asui hambeu yuiri penye: —Sepaya iwaka kiti umunya kuri ainta supe kuaye aintauputariwaa yawe kuaita mukuĩwaita pesuiwara kua mundu upe yepewasu rame aintaumanduariwaa sese kua aintaupuranduwaa irumu.

²⁰Mame aintauyumuatiri serera rese u mukuĩ u musapiri haiku kuri aintapiterupi.

²¹Asui Pedru umusuaki Jesus unyee ixupe: —Inde seruixawa, muiri viajitaa kuri haperduari seirumu kua umunyawaa ixe arama puxi, seti viaji sera?

²²Jesus umbeu ixupe: —Tihaxari reperduari ate seti viaji neirumu ae, maa setenta viaji seti.

²³Ape kua aintaruixawa kuaita iwaka ruixawa imiraita umunya iyawe kua tuixawa umaawaa imiraita kunta.

²⁴Asui usenui ainta ipiri asui aintaururi ixupe yepe udeveriwaa dezi mili.

²⁵Asui tiuriku dinyeru upagari arama kua ikunta, ape suixawa umundu aintauvenderi ae ximiriku irumu, tairaita irumu yuiri panye imaaita yuiri upagari arama ikunta.

²⁶Asui kua upurakiwaa ixupe uyurinipia suixawa supe upurandu irumu: —Inde seruixawa resarure hapagari arama kuri inde arama panye hadeveriwaa.

²⁷Asui pirasua suixawa umaa ixupe, asui uyurawa ae umukanyemu isui panye udeveriwaa.

²⁸Asui kua upurakiwaa usuana suixawa ruka sui, asui uwasemu yepe upurakiwaa irumu udeveri ixupe arama sem dinyeru mirita, asui upisika ikurukawa upe uyuwika ae umbeu ixupe: —Repagari ixe arama kua redeveriwaa ixe.

²⁹Asui kua sumuara udeveriwaa ixupe uyurinipia ixupe upurandu irumu sasisawa rupite unyee ixupe: —Resarure hapagari kuri inde arama ae.

³⁰Asui tiuputari usaru asui umburi ae kadeya kiti upagari arama kua udeveriwaa.

³¹Asui kuaita amuita upurakiwaita aintaumaa maye umunya puxi ixupe kua aintarumuara asui sasiyara aintapia turusu, asui aintausu aintaruixawa ipiri aintaumbeu arama sesewara panye.

³²Asui aintaruixawa usenui ae, asui umbeu ixupe: —Inde repurakiwaa puxuwerawa hamukanyemuana panye nesui kua redeveriwaa ixe repurandu resewara seirumu.

³³Maitaa timaa puranga pirasua remaa nerumuara kuaye pirasuawaa yawe hamaa inde?

³⁴Asui suixawa ipiaiwa umaa ixupe, asui uxari ainta supe ae kuaita unupawaita ate upagari panye kua udeveriwaa.

³⁵Yawete yuiri kuri umunya penye arama kua sepaya iwaka kitiwara tirame peperduari peirumu peimuita pepia sui.