Read Nhengatu Mateu 19 Bible Online

Mateu 19 - Nhengatu bible

Mateu 19

¹Asui umbue rire kua inyenga Jesus uyuiri Galileya sui usu arama Jurdão ruaxara kiti Judeya kiti.

²Asui siya miraita usu sakakuera asui ape umburi aintasui mãsi.

³Asui aintauri ipiri yepeyepe farizewita aintauputari aintaukuawa maye umanduariwaa ape aintaumbeu ixupe: —Maitaa apigawa upuderi umuyuiri isui ximiriku maa resewarantu?

⁴Asui Jesus umbeu ainta supe: —Maitaa tipeleri maye uyupiru umunya apigawa kunya yuiri kua umunyawaa kua mundu?

⁵Asui umbeu ainta supe: —Kuiri kuri uxari ipaya imaya yuiri uiku arama ximiriku irumu kua apigawa yepenyu arama kuri kuaita mukuĩwaita.

⁶Ape timaa mukuĩwaita ainta maa yepenyuana ainta. Asui kuaita Deus uxariwaita aintauiku aintapawa tiawa upuderi umutirika ainta.

⁷Asui aintaumbeu ixupe: —Ape marantaa Muize umundu aintaumpinima papera aintaumuyuiriwaa rupiara aintarimiriku?

⁸Jesus umbeu ainta supe: —Muize uxari pemuyuiri pesui perimiriku santa resewara pepia, maa timaa Deus uxari yawe uyupirungawa upe.

⁹Kuiri hambeu penye: —Warixiwaa kua umuyuiriwaa isui ximiriku uiku arama amu kunya irumu tirame umunya isui puxi.

¹⁰Asui aintaumbeu Jesus supe kuaita umbuewaita: —Aintauiku rame aintarimiriku irumu kuaye rembeuwaa yawe kuaita apigawaita asui purangate tiaintaumendari.

¹¹Asui umbeu ainta supe: —Tiaintaupuderi aintauruyari kua nyenga kuaita apigawaita panye, maa aintauruyari kuri kuaita haxariwaita aintauruyari ae.

¹²Nyãse yepeyepe unaseri eunuku ainta, asui yepeyepe apigawaita uxari eunuku ainta, asui yepeyepe aintauyuxari eunuku ainta sesewara kua iwaka ruixawa. Awa upuderi uruyari nyenga pexari uruyari ae.

¹³Asui aintaururi Jesus ipiri tainaita uxari arama ipu aintarese upurandu arama ipaya irumu aintarese maa umbuewaita aintausaisu aintauri.

¹⁴Asui Jesus unyee ainta supe arama: —Pexari aintauri sepiri kuaita tainaita, tepesaisu aintauri sepiri, nyãse iwaka ruixawa imiraita yawewaita ainta.

¹⁵Asui uxari rire ipu aintarese usuana.

¹⁶Asui yepe uri umbeu ixupe: —Inde umbuewaa maataa kuri hamunya purangawaa hariku arama mundu tiwa upawa?

¹⁷Jesus umbeu ixupe: —Marantaa repurandu ixe sese kua purangawaa? Yepenyute purangawaa kua Deus, reputari rame rewike mundu tiwa upawa kiti remunya kuri kua Deus umuduwaa yamunya.

¹⁸Asui upurandu Jesus: —Maataa? Jesus umbeu ixupe: —Tereyuká mira, teresikari amu kunya nerimiriku sui, teremunda, tereganani amuita rese,

¹⁹Rerespetari nepaya nemaya yuiri, asui regustari neanamaita kuaye reyugustariwaa yawe indepawa.

²⁰Asui kua kurumiwasu umbeu ixupe: —Hamunyanate panye kua rembeuwaa; maa xingataa watari serunde?

²¹Asui Jesus umbeu ixupe: —Reputari rame purangawaa inde resu revenderi panye nemaa remee arama kuri sikuyara pirasuawaita supe asui reriku kuri nemaa iwaka kiti, asui reyuiri serakakuera.

²²Asui kua kurumiwasu usendu rire kua nyenga sasiyara uyuiri asui, nyãse rikuwaa ae.

²³Asui Jesus umbeu ainta supe kuaita umbuewaita: —Supiwa hambeu penye arama, iwasu yepe rikuwaa usikari arama suixawa arama kua iwaka ruixawa.

²⁴Asui hambeu yuiri penye: —Iwasuima xinga kamelu uwike awi resa kuara rupi kua rikuwaa usikari arama suixawa arama kua iwaka ruixawa.

²⁵Umbuewaita aintausendu rame inyenga turusu aintaakayemu aintausendu ixupe. Asui aintaumbeu: —Yawe rame maa, awataa upuderi uyumukaturu?

²⁶Asui Jesus umaa ainta supe unyee: —Apigawaita tiaintaupuderi, maa Deus upuderi.

²⁷Asui Pedru unyee ixupe: —Remaa yande yaxariana panye maa yasu arama nerakakuera; asui maitaa kuri yande?

²⁸Asui Jesus umbeu ainta supe: —Supiwa hambeu penye, nyã mundu pisasuwaa upe mairame kuri uwapika itrunu upe purangawaa kua unaseriwaa umaa kua ara penye usuwaita serakakuera pewapika kuri yuiri duziwaita trunu upe purangawaita pembeu arama aintaresewara kuaita duzi tribu Israelitaita.

²⁹Asui muiri kuaita uxariwaita aintaruka seresewara, aintaimuita yuiri, aintarendiraita yuiri, aintapayaita yuiri, aintamayaita yuiri, aintarairaita yuiri, aintakupixawa yuiri, aintauriku kuri siyapiri isui kua aintauxariwaa serera resewara, asui aintauriku kuri mundu nunkawaa upawa.

³⁰Asui siya kuaita uputariwaita aintarunde kitiwara ainta maa aintate aintarakakuerawara ainta, asui kuaita aintarakakuerawaraita aintate aintarunde kitiwaraita ainta.