Read Nhengatu Mateu 2 Bible Online

Mateu 2 - Nhengatu bible

Mateu 2

¹Jesus umaa ara Belẽ Judeya kiti aintaruixawa ramere kua Erudi asui apigawaita ukuawawaita uri kurasi usemuwaa banda sui Jeruzalẽ kiti.

²Yawe aintaupurandu: —Mametaa kua pisasuwaa unaseriwaa judewita ruixawa? Yamaa iyara estrela yanerendawa Urienti sui, ape yayuiriana yamunya arama ixupe arama benditu.

³Usendu rame aintaumbeuwaa tiupuderi uiku timaarese kua aintaruixawa Erudi, nẽ kuaita yuiri Jeruzalẽwaraita panye.

⁴Asui Erudi usenui ainta muiri kuaita saserdutita ruixawa umpinimawaita yuiri upurandu arama usendu aintairumu mametaa unaseri umaa ara kua aintausaruwaa Kristu.

⁵Asui aintaumbeu ixupe: —Unaseri kuri umaa ara tetama upe sera Belẽ Judeya kitiwaa, kuaye umpinimawaa yawe papera upe kua utitikawaa,

⁶Yawe umbeu: "Inde Belẽ, inde tetama Judeya kitiwaa timaa kuaira xingawaa inde aintasui Judeya kitiwaita, nyãse uri kuri nesui kua usaruwaa usaru aramawaa semiraita Israelitaita".

⁷Asui Erudi usenui rire uyumimisawa upe kuaita ukuawawaita upurandu arama ainta mairametaa uyupiru umuturi kua estrela?

⁸Asui umundu aintausu Belẽ kiti umbeu ainta supe: —Pesu pesikari kua taina, asui pewasemu rire kuri ae peyuiri kuri pembeu ixe arama hasu arama kuri ipiri hamunya arama yuiri ixupe arama benditu.

⁹Aintausendu rire Erudi inyenga aintausu aintarapee rupi, asui kua estrela aintaumaa aintarendawa urienti sui usu aintarunde kiti aintauwasemu arama kua taina, asui kua estrela uyari iwate kuayentu taina iarupi.

¹⁰Asui aintaumaa irumu kua estrela suuri aintapia turusu.

¹¹Asui aintauwike uka upe aintaumaa kua taina imaya Maria irumu, asui aintauwapika aintarinipia irumu aintaumee ixupe purangawaa, asui aintaupirari aintamaleta aintaumee ixupe uru prezenti, insensu sakuenawaa yuiri, pumada yuiri serawaa mirra.

¹²Asui Deus umbeu ainta aintakerupiwaa upe tiarama aintauyuiri aintaumaa Erudi ipiri, ape aintauyuiri arama aintarendawa kiti amu pee rupi.

¹³Asui aintauyuiri rire kuaita ukuawawaita yaneruixawa anju upuamu Juze umaa ikerupiwaa upe umbeu ixupe: —Repuamu resuana rerasu kua taina imaya irumu reyawawa Egitu kiti reiku arama akiti ate mairame hasenui inde, nyãse kua Erudi uputari uyuká kua taina.

¹⁴Asui Juze upuamu urasu kua taina pituna rame imaya irumu Egitu kiti.

¹⁵Ape uiku ate mairame umanu kua Erudi kuaye yaneruixawa umbeuwaa yawe iyuru sui kua utitikawaa yawe umbeu, hasenui seraira Egitu sui.

¹⁶Asui ipiaiwa kua Erudi umaa rame aintauganani ae kuaita ukuawawaita ape umundu aintauyuká panye tainaita apigawaita Belẽ upe panye suakintuwaraita yuiri kuaita urikuanawaita mukuĩ akayu kuaita yuiri ipuiwaitare kuaye usenduwaa yawe estrela resewara aintauyupiru irumu aintaumaa ae kuaita ukuawawaita.

¹⁷Aintaumunya kuaye umbeuwaa yawe kua utitikawaa serawaa Jeremia,

¹⁸Yawe umbeu yapuderi yasendu aintausasemu Rama upe, aintauyaxiu kirimbawa Rakel uyaxiu imembiraita rese tiawa upuderi umusuuri ainta nyãse tiana aintaumaa aintamembiraita.

¹⁹Asui umanu rire kua Erudi yepe anju upuamu Juze ruaki ikerupiwaa upe Egitu upe.

²⁰Umbeu ixupe: —Repuamu rerasu kua taina Israel kiti imaya irumu kuxima umanu kua uputariwaa uyuká kua taina.

²¹Asui upuamu urasu kua taina imaya irumu aintausu arama Israelitaita retama kiti.

²²Asui usendu rame aintaruixawa kua Arkelau ipaya ambira Erudi rakakuera Juze usikie usu akiti, asui usu Galileya kiti kuaye Deus umbeuwaa yawe ixupe ikerupiwaa upe.

²³Asui usuana uiku arama tetama kiti sera Nazare kuaye aintautitikawaa yawe kuaita utitikawaita, yawe aintaumbeu, aintaumuseruka kuri ae Nazare suiwara.