Read Nhengatu Mateu 21 Bible Online

Mateu 21 - Nhengatu bible

Mateu 21

¹Asui aintauri kuayentu Jeruzalẽ sui Betifaje kiti asui aintausika irumu iwitera rese sera Ulivera Jesus umundu mukuĩ umbuewaita.

²Umbeu ainta supe: —Kuiri pesu nyã tetama kiti uikuwaa perunde kiti, pewasemu kuri ape yepe jumentu aintaupukuariwaa upuamu imembira irumu, peyurawa ae asui peruri ainta ixe arama.

³Yepe upurandu rame kuri penye, marantaa peyurawa ae, pembeu kuri ixupe, yaneruixawa uputari ainta. Asui umundu kuri ixe arama ainta.

⁴Jesus umunya kuaye umbeuwaa yawe kua utitikawaa kuxima, yawe unyee:

⁵—Kuiri rembeu ixupe kua Sião rayera, remaa ike uri nepiri kua neruixawa pirasuawaa yawe uri uwapika jumentu rese jumentu upurakiwaa imembira rese yuiri.

⁶Asui umbuewaita usu aintaumunya kuaye Jesus umunduwaa yawe.

⁷Aintaururi ixupe kua jumentu imembira irumu, asui aintauxari aintapupekawa uyenu sese asui Jesus uwapika iarupi.

⁸Asui siya miraita aintaupirari aintapupekawa pee rupi amuita umunuka kaa aintaumburi uyenu pee rupi.

⁹Asui kuaita siyawaita miraita usuwaita Jesus runde kiti uriwaita sakakuera yuiri kirimbawa aintaunyengari aintaumbeu: —Uzana ixupe kua Davi rimiariru, purangawaa kua uriwaa yaneDeus rera rese, aintaunyengari ixupe uzana iwaka kiti.

¹⁰Asui uwike irumu Jeruzalẽ kiti aintauyana aintaumaa ixupe panye kuaita Jeruzalẽwaraita aintaunyee: —Awataa nyã?

¹¹Asui aintaumbeu kuaita siyawaita: —Aete Jesus nyã utitikawaa Nazare Galileya suiwara.

¹²Asui Jesus uwike irumu templu upe ape umusemu panye kuaita uvenderiwaita templu sui, kuaita yuiri upiripanawaita, umuyereu aintameza kuaita utrukariwaita dinyeru, umuyereu yuiri aintabanku kuaita uvenderiwaita pumba.

¹³Umbeu ainta supe: —Yawe aintaumpinima: “Aintaumuseruka urasão ruka kua seruka, maa penye pexari mundawasuita ruka ae.”

¹⁴Asui aintauri Jesus piri templu kiti kuaita sesaimawaita alejaduita yuiri, asui umukaturu ainta.

¹⁵Asui aintaipiaiwa aintaumaa Jesus kuaita saserdutita aintaruixawaita umpinimawaita yuiri aintaumaa irumu umunya kuaita milagri, aintaipiaiwa aintausendu irumu tainaita unyengari templu upe: —Uzana ixupe kua Davi rimiariru.

¹⁶Asui aintaumbeu ixupe: —Maitaa resendu kua aintaunyengariwaa nerese? Asui Jesus umbeu ainta supe: Ẽẽ hasendute; penyetaa maitaa tire peleri aintaumpinimawaa kuxima: “Purangawaa kua aintaumbeuwaa nerese puranga, kuaita tainaita ipuiwaita yuiri.”

¹⁷Asui usu aintasui usu arama Betania kiti, akiti usasawa pituna.

¹⁸Asui kuemaite uyuiri irumu Jeruzalẽ sui sasi ixupe yumãsi.

¹⁹Asui umaa mirá figera senunde kiti pee arukanga upe, asui uri umaa tiyamaa iya anyunte umaa sawa. Asui umbeu ixupe: —Timairame kuri reriku neiya. Asui aramete utikanga kua figera.

²⁰Asui aintaumaa irumu kua mirá aintaakayemu kuaita umbuewaita aintaumbeu ixupe: —Kutara utikanga kua figera.

²¹Maa Jesus umbeu ainta supe: —Supiwa hambeuwaa penye arama, peruyari rame tirame mukuĩ pemanduariwaa umunya kuri penye arama turusu piri isui kua hamunyawaa figera supe, pembeu rame iwitera supe repuamu repuri parana kiti Asui kuri upuri.

²²Panye kua pepuranduwaa Deus irumu peruyari resewara uxari kuri penye arama ae.

²³Asui Jesus usika irumu templu upe aintauri ipiri kuaita saserdutita aintaruixawaita tuyuweita yuiri aintaupurandu ae umbuewaa upe uiku: —Awa ukuawasawa irumutaa remunya kua remunyawaa, awataa uxari inde arama kua rekuawasawa?

²⁴Asui Jesus umbeu ainta supe: —Ixe yuiri hapurandu penye, pembeu rame ixe arama kua hapuranduwaa penye, asui hambeu kuri penye awa ukuawasawa irumu hamunya kua hamunyawaa.

²⁵Maa suiwarataa Juão batizmu iwaka suiwara u apigawa suiwara? Asui aintauyupurungita aintapawa, yambeu rame maa iwaka suiwara ae ape maa umbeu yande arama, marantaa tiperuyari ae?

²⁶Tiyapuderi yambeu apigawa ukuawasawa ae nyãse yasikie aintasui kuaita miraita nyãse aintaumanduari utitikawaa kua Juão.

²⁷Asui aintaumbeu Jesus supe: —Tiyakuawa. Asui Jesus umbeu ainta supe: —Ixe yuiri tihambeu penye awa ukuawasawa irumu hamunya kua hamunyawaa.

²⁸Asui maitaa pemanduari sese kua apigawa urikuwaa taira mukuĩ, umbeu ixupe kua taira tuyuwewaa: —Inde seraira kuiri resu repuraki sekupixawa kiti.

²⁹Asui umbeu ipaya supe: —Ere, asui tiusu.

³⁰Asui umbeu yuiri imu tainasawa supe yawete; asui usuaxara ipaya: —Umbaa hasu, asui arire umanduari usute.

³¹Awataa aintasuiwara kuaita mukuĩwaita umunya maye aintapaya uputariwaa yawe? Aintaunyee Jesus supe: —Kua tainasawa. Asui Jesus umbeu ainta supe: —Supiwa hambeu penye kuaita publikanuita kunyaita warixiwaita yuiri aintauwike kuri perunde kiti aintaruixawa arama kua Deus.

³²Kuxima Juão uri pepiri pee purangawaa upe maa timaa peruyari ae, maa aintauruyari inyenga kuaita publikanuita kunyaita warixiwaita yuiri, maa penye pemaa irumu yawewaa timaa petrukari pemanduariwaa peruyari arama ae.

³³Kuiri pesendu yepe nyenga hambue aramawaa ipupe penye: —Yepe apigawa uka iyara usu uyutima ikupixawa upe, asui umukurara ae, asui umunya mirawaka uwapika rendawa, asui umunya yepe ture, asui uxari upurakiwaita usaru arama ikupixawa upe, asui usuana apekatu kiti.

³⁴Asui usikana sangawa aintaupuu arama iya kua mitima umundu upurakisaraita aintapiri kuaita usaruwaita ikupixawa aintauxari arama ainta supe iya.

³⁵Asui kuaita usaruwaita ikupixawa aintaupisika aintaipu irumu kuaita umunduwaita, aintaunupa yepe, aintauyuká yepe, asui aintauyapi ita irumu yepe.

³⁶Asui umundu aintapiri siya xinga upurakisaraita, asui aintaumunya ainta supe yawete yuiri.

³⁷Asui anyu arama umundu aintapiri taira, uyumbeu aepawa: —Aintaurespetari kuri seraira.

³⁸Asui aintaumaa irumu taira kuaita usaruwaita aintauyupurungita aintapawa: —Aete kua upisika aramawaa panye imaa, yasu yayuká ae yapita arama kuri panye imaa irumu.

³⁹Asui aintaupisika aintaipu irumu ae, aintausiki kupixawa sui ae aintauyuká ae.

⁴⁰Asui Jesus upurandu ainta: —Mairame kuri uri kua kupixawa iyara maitaa kuri umunya ainta supe kuaita usaruwaita?

⁴¹Aintaumbeu ixupe: —Umburi kuri kirimbawa kuaita puxuwerawaita, asuiwana kuri uxari amuita usaru ikupixawa upe kuaita upuu aramawaita umee ixupe imitima iya usika rame sangawa.

⁴²Maitaa tiserá peleri kua aintaumpinimawaa? Kua ita aintaumburiwaa kuaita umunyawaita uka sesete aintaumunya santa kua uka. Aete Deus umunyawaa ape puranga yamaa ae.

⁴³Kuiri hambeu penye: —Sesewara kuri tiuxari peruixawa arama kua Deus uxari arama kuri amuita ruixawa arama ae kuaita umeewaita iya purangawaa ixupe.

⁴⁴Asui kua uwariwaa sese kua ita upepena kuri, maa kua ita uwariwaa sese umukurui kuri ae.

⁴⁵Asui kuaita saserdutita aintaruixawaita farizewita yuiri aintausendu irumu kua inyenga aintaukuawa umbeu aintarese irumu kua umbeuwaa.

⁴⁶Asui aintauputari aintaupisika Jesus aintaumprezu arama ae maa aintausikie aintasui kuaita miraita siyawaita nyãse aintaumanduari utitikawaa ae.