Read Nhengatu Mateu 22 Bible Online

Mateu 22 - Nhengatu bible

Mateu 22

¹Asui Jesus umbeu yuiri inyenga irumu umbue aramawaa ipupe ainta, yawe umbeu ainta supe:

²—Iwaka ruixawa imiraita iyawe kua yepe tuixawa umumendariwaa taira umunya festa ixupe.

³Asui umundu upurakisaraita aintausu arama aintausenui kuaita uputariwaita aintauri arama aintaumaa kua kazamentu festa yuiri; maa tiaintauputari aintauri.

⁴Asui umundu yuiri aintapiri amuita upurakisaraita umbeu ainta supe: —Hambauwana hamukaturu panye pembau arama, hayukána setapira serimbawaita ikirawaita yuiri pembau arama, pruntuana panye kazamentu rupiara ape peyuiri pemaa festa.

⁵Asui timaa arama aintauputari ae, asui aintausuana, amu usu upuraki ikupixawa upe, amu usu upiripana.

⁶Asui kuaita amuita aintaupisika aintaipu irumu ainta kuaita umunduwaita aintaukasuari ainta aintauyuká ainta.

⁷Asui ipiaiwa kua aintaruixawa ape umundu suraraita aintaumburi arama muiri kuaita uyukáwaita upurakiwaita ixupe, asui aintausapi aintarendawa.

⁸Asui umbeu ainta supe kuaita upurakiwaita ixupe: —Pruntuana kua kazamentu festa yuiri maa kuaita hasenuiwaita timaa puranga ainta.

⁹Ape pesu panye pee uyusasawawaita ipiterupi pesenui muiri pewasemu aintauri arama aintaumaa kua yayumuatiriwaa upe.

¹⁰Asui aintausuana panye pee rupi kuaita upurakiwaita aintaumuatiri panye muiri kua aintauwasemuwaa puxuwerawaita purangawaita yuiri, ape teresemuana kua sala aintaumbau aramawaa upe aintairumu aintausenuiwaita.

¹¹Asui uri kua aintaruixawa umaa arama kuaita aintauwasemuwaita meza ruaki, asui umaa ape yepe apigawa tiwa uriku sese rupa kazamentu rupiara.

¹²Asui aintaruixawa upurandu ae: —Inde seanama, mayetaa rewike ike tiwa reriku nerupa kazamentu rupiara? Asui ukiririntu.

¹³Asui aintaruixawa unyee sumuaraita supe: —Pepukuari ipu ipi yuiri perasu ae yanesui pitunawasuwaa kiti, akiti kuri aintauyaxiu aintausuu aintaranya.

¹⁴Siya kuaita usenuiwaita maa muiriira ainta kuaita uparawakawaita.

¹⁵Asui kuaita farizewita aintausu isui aintauyatiri aintaumbeu Jesus rese aintauputari aintaukuawa maye aintaupuderi aintaupisika ae inyenga resewara.

¹⁶Asui aintaumundu ipiri aintaumbuewaita aintairumu kuaita erudianuita aintaunyee ixupe: —Inde umbuewaa, yakuawate supiwa inde, yakuawate rembue Deus rapee rese supiwa, timaa arama inde arama awa supentu rembeu, tireparawaka miraita.

¹⁷Ape rembeu yande, maitaa remanduari, maitaa purangate yamee Sezar supe kua impustu uputariwaa yaneirumu u tiyamee?

¹⁸Jesus ukuawa aintaumanduariwaa puxuwerawa, ape umbeu ainta supe: —Penye retentuwaita, marantaa peputari pesaã ixe?

¹⁹Pemukame hamaa yepe dinyeru impustu rupiara, asui aintaururi ixupe yepe dinyeru.

²⁰Jesus upurandu ainta: —Maa rangawataa kua uyariwaa dinyeru rese, awa rerataa kua uyariwaa dinyeru rese?

²¹Aintaumbeu ixupe: —Sezar rangawa ae. Asui umbeu ainta supe: —Pemee Sezar supe Sezar iyara, asui pemee Deus supe Deus iyara.

²²Aintausendu irumu Jesus umbeuwaa aintaakayemu aintausendu ixupe, ape aintauxari ae aintausu isui.

²³Asui nyã ara aintauri ipiri kuaita sadusewita umbeuwaita tikuri yasemu manusawa sui, aintaupurandu Jesus:

²⁴—Inde umbuewaa, Muize umbeu umanu rame yepe apigawa tairaimarewaa asui imu uyereu uyuka kua viuva kuera umukiriari arama tairaita sakakuera.

²⁵Kuxima seti kuaita yepe apigawa rairaita yanepiterupi asui uyuka ximiriku kua aintatuyuwesawa maa tire uriku taira umanu ae asui kua kunya upita imu supe.

²⁶Yawe aintausasawa kua mukuĩsawa kua musapirisawa yuiri ate aintaupawa kuaita setiwaita.

²⁷Asui anyu arama umanu aintarakakuera kua kunya.

²⁸Asui aintausemu rameana kuri manusawa sui awataa kuri aintasuiwara kuaita setiwaita rimiriku ae? —Nyãse muiri ainta aintarimiriku ae.

²⁹Asui Jesus usuaxara ainta, umbeu ainta supe: —Pepurungita apekatu kiti nyãse tipekuawa mayesawataa aintaumpinimawaa kuxima tiyuiri pekuawa kua Deus kirimbawasawa.

³⁰Aintausemu irumu kuri manusawa sui tikuri aintauyuka aintarimiriku arama tiyuiri kuri aintauxari aintaumendari arama maa aintauiku kuri aintayawe kuaita anjuita iwaka kiti.

³¹Pepuderi pekuawa aintausemu kuri kuaita umanuwaita, maitaa tipeleri kua Deus umbeuwaa penye arama sese?

³²Yawe unyee: —Ixete Abraão Deus, Izaki Deus yuiri, Jaku Deus yuiri, ae timaa umanuwaita Deus maa upakawaita Deus ae.

³³Aintausendu irumu Jesus nyenga kuaita miraita siyawaita aintaakayemu aintaumaa ixupe sesewara kua inyenga umbuewaa.

³⁴Asui kuaita farizewita aintausendu irumu Jesus resewara umukiriri kuaita sadusewita, asui aintauyumuatiri aintausika ipiri.

³⁵Asui yepe ukuawawaa puranga kua Muize umpinimawaa upurandu Jesus usaã arama ae,

³⁶Yawe unyee: —Inde umbuewaa mayewataa turusu piri Deus uputari yamunya inyenga kuximawara upe?

³⁷Jesus umbeu ixupe: —Rerikute regustari neruixawa Deus panye nepia sui panye neanga irumu panye remanduarisawa irumu yuiri.

³⁸Aete kua primeru umunduwaa turusuwaa.

³⁹Yepewasu irumu kua mukuĩsawa umunduwaa, regustari neanamaita maye reyugustariwaa yawe indepawa.

⁴⁰Panye Muize umpinimawaa panye yuiri aintaumpinimawaa kuaita utitikawaita uwapika sese santa kua mukuĩ Deus umunduwaa yamunya.

⁴¹Aintauyumuatiri rame kuaita farizewita Jesus upurandu ainta.

⁴²Umbeu ainta supe: —Maitaa pemanduari kua Kristu, awa rimiarirutaa ae? Aintaunyee ixupe: —Davi rimiariru ae.

⁴³Asui Jesus umbeu ainta supe: —Ape marantaa Davi umbeu Espiritu irumu suixawa ae?

⁴⁴Davite umbeu Espiritu Santu irumu yawe unyee: —Yaneruixawa umbeu seruixawa supe rewapika sekatusawa upe ate mairame kuri hamburi neruanyanaita neipi wira kiti.

⁴⁵Davi umbeu rame maa suixawa ae, ape mayetaa maa ximiarirute ae?

⁴⁶Asui tiawa upuderi usuaxara ae kua Jesus upuranduwaa, ape yawewaa rire aintausikie aintaupurandu ae.