Read Nhengatu Mateu 23 Bible Online

Mateu 23 - Nhengatu bible

Mateu 23

¹Asui Jesus umbue kuaita siyawaita miraita kuaita yuiri umbuewaita.

²Umbeu ainta supe: —Kuaita umpinimawaita farizewita yuiri aintauwapika Muize uwapikawerawaa upe.

³Ape kuri peruyari kua nyenga aintaumunduwaa peruyari, maa tepemunya kuaye aintayawe nyãse timaa aintauruyari kua nyenga aintaumbuewaa.

⁴Aintaupukuari ipusewaa aintauxari apigawaita aintausupiri aintaapa rese maa tiaintawajudari ainta nẽ aintadedu irumu.

⁵Anyunte aintauputari apigawaita aintaumaa ainta supe, ape aintaumunya largu kuaita versikulu uyari aramawaa aintaupukuari ae aintarupa rese, asui aintaumupuku aintasaya.

⁶Aintaugustari aintauwapika purangawaita ibanku rese aintaumbauwaa upe sinaguga upe yuiri.

⁷Aintaugustari aintausendu miraita umukuema ainta ukara kiti, aintaugustari aintausendu aintauseruka umbuewaita ainta.

⁸Maa penye tepembeu umbuesarawaita penye nyãse yepenyute umbuewaa penye, asui peimuita muiri penye.

⁹Tepeseruka pepaya yepe kua mundu pura supe nyãse yepenyute pepaya iwaka kitiwara.

¹⁰Tepexari aintauseruka pekuawawaita perasu penye nyãse yepenyute kua Kristu urasuwaa penye.

¹¹Maa kua kirimbawawaa pesuiwara urikute uajudari muiri penye.

¹²Kua uputariwaa ukuawapiri aintasui aintawira kitiwara kuri ae, maa kua uyuxariwaa aintawira kiti simutara aintauxari kuri ae aintaara kiti.

¹³—Puxuwerawa usika kuri perese penye umpinimawaita farizewita yuiri, penye retentuwaita, penye pesaisuwaa aintaruixawa arama kua iwaka ruixawa kuaita apigawaita, tikuri peruixawa ae penye yuiri, nyãse tipexari aintaruixawa ae kuaita uputariwaita aintaruixawa arama ae.

¹⁴—Puxuwerawa usika kuri perese penye umpinimawaita farizewita yuiri, penye retentuwaita, nyãse peyuka aintasui aintamaa kuaita viuvaita asui pembeu Deus aintarese uikupuku aintaumanduari arama aintauxari aintamaa Deus rese, asui kuri kirimbawa piri pepurara pepekadu resewara.

¹⁵—Puxuwerawa usika kuri perese penye umpinimawaita farizewita yuiri, penye retentuwaita, pesu panye parana rupi panye iwi kiti yuiri peruri arama yepe pepiri uruyari arama peyawe, pewasemu rire ae pexari infernu raira ae puxuwera piri pesui.

¹⁶—Puxuwerawa usika kuri perese penye perasuwaita sesaimawaita, penye pembeuwaita timaa arama kua yambeuwaa Deus ruka rese, maa urikute umunya kua umbeuwaa uru rese Deus ruka upewaa.

¹⁷Penye tiwaita pekuawa sesaimawaita, maitaa puranga piri kua uru isui kua Deus ruka uxariwaa purangawaa kua uru?

¹⁸Asui pembeu: —Timaa arama kua yepe umbeuwaa prezenti uikuwaa rendawa rese, maa urikute umunya kua umbeuwaa prezenti rese uikuwaa ape.

¹⁹Penye sesaimawaita, maitaa puranga piri kua prezenti isui kua uikuwaa rendawa uxariwaa purangawaa kua prezenti?

²⁰Kua umbeuwaa prezenti uikuwaa rendawa rese umbeu yuiri sese panye kua uikuwaa ape.

²¹Asui kua umbeuwaa Deus ruka rese umbeu yuiri sese panye kua uikuwaa ape.

²²Asui kua umbeuwaa iwaka rese umbeute Deus uikuwaa rese sese yuiri kua uikuwaa ape.

²³—Puxuwerawa usika kuri perese penye umpinimawaita farizewita yuiri, penye retentuwaita, pemee dizimu urtelã suiwara endru suiwara kuminyu suiwara yuiri, maa timaa pemunya kua Deus umunduwaa pemunya kirimbawa. Kirimbawa umundu pemunya purangawaa uputari pirasuawaa pemaa amuita, kirimbawa uputari pexari pepia sese supiwa, asui arirewara pepuderi pemee ixupe prezenti.

²⁴Penye perasuwaita sesaimawaita, kirimbawa pemuatiri bati irumu pesui meru mirita maa pemukuna kua kamelu turusuwaa.

²⁵—Puxuwerawa usika kuri perese penye umpinimawaita farizewita yuiri, penye retentuwaita, kirimbawa pemuyasuka pekupu pepratu yuiri aintakupe rupi maa pexari ikiawaa aintakuara upe gananisawa irumu pepuxuwerasawa irumu yuiri.

²⁶Inde farizeu sesaimawaa, reyupiru remuyasuka nekupu kuara upe ikiaima arama ae ikupe rupi yuiri.

²⁷—Puxuwerawa usika kuri perese penye umpinimawaita farizewita yuiri, penye retentuwaita, penyete aintayawe kuaita umanuwaa ambiraita uikuwaa upe murutinga aintaarupi, purangawaa yamaa ainta maa teresemu ainta umanuwaita ambira kãwera irumu, panye ikiawaa irumu yuiri.

²⁸Yawete yuiri penye, purangawaita yawe penye apigawaita umaa maa teresemu penye retentuwaa irumu pepuxuwerasawa irumu yuiri.

²⁹—Puxuwerawa usika kuri perese penye umpinimawaita farizewita yuiri retentuwaita, nyãse pemunyate umanu ambiraita ruka arama kuaita utitikawaita ambira, asui pemputira aintaarupi kuaita purangawaita ambira.

³⁰Pembeute, yaiku rame maa yaneramunyaita irumu timaa yawajudari ainta aintaumburi irumu aintaruwi kuaita utitikawaita kuera.

³¹Yawe pembeu peresewara penyete aintarairaita kuera kuaita uyukawaita kuaita utitikawaita ambira.

³²Ape kuri peyumuteresemu pepuxuwerasawa irumu aintayawe kuaita peramunyaita ambira.

³³Penye buyaita, penye yararaka rairaita, maitaa kuri pepuderi peyumukaturu isui kua pepurarawaa kuri infernu kiti?

³⁴Sesewara hamundu kuri pepiri umbuewaita ukuawawaita yuiri umpinimawaita yuiri, asui kuri peyuká yepeyepe, penupa kuri aintauyari kurusa rese yepeyepe aintasuiwara, penupa kuri yepeyepe sinaguga upe, pesu kuri aintarakakuera pemuruanyana arama ainta panye tendawa yaweyawe.

³⁵Uwari kuri perese aintaruwi kuera panye kuaita aintauyukáwaita kuera purangawaita kua mundu upe, uwari kuri perese suwi yuiri kua purangawaa Abel panye yuiri amuita ate Zakaria Barakia raira kua aintauyukáwaa Deus ruka upe aintausapiwaa nimbawa ruaki.

³⁶Supiwa hambeu penye: —Panye kua hambeuwaa uri kuri aintarese kuaita miraita kuiriwaraita.

³⁷Inde Jeruzalẽ, inde Jeruzalẽ, inde reyukáwaa kuaita utitikawaita, inde reyukáwaa ita upe kuaita hamunduwaita nepiri, tiyakuawa muiri viaji haputari hamuatiri nerairaita maye sapukaya umuatiriwaa yawe imembiraita ipepu wirupi maa tipeputari.

³⁸Ape kuri iyaraimawaa panye peruka.

³⁹Hambeu penye arama: —Timaa kuri pemaa ixe ate pembeu irumu kuri suuriwaa kua uriwaa yaneDeus rera rese.