Read Nhengatu Mateu 24 Bible Online

Mateu 24 - Nhengatu bible

Mateu 24

¹Asui Jesus usu templu sui usu arama aintasui, asui umbuewaita uri ipiri aintaumukame umaa panye kuaita uka turusuwaita templu rupiara.

²Maa Jesus umbeu ainta supe: —Maitaa pemaa puranga panye kua ukaita? Supiwa hambeu penye arama tikuri yepe ita uiku sendawa upe tiwa aintaumburi.

³Asui Jesus uwapika irumu iwitera rese sera Ulivera aintauri kuaita umbuewaita aintapawantu aintaupurandu ae aintaunyee ixupe: —Rembeu yande arama mairametaa kuri usasawa kua rembeuwaa? Maataa kuri rexari yamaa nerangawa reyuiri arama yuiri sangawa yuiri kua anyu aramawaa ara?

⁴Asui Jesus usuaxara ainta: —Pemaa pesui yawaite amu uganani penye.

⁵Aintauri kuri siya serera resete yepe, aintaumbeu kuri, Kristute ixe. Ape aintauganani kuri siya miraita.

⁶Pesendu kuri aintaupurungita kera rese pesendu yuiri aintaumanduari kera, pemaa pesui yawaite maa pesikie nyãse yawe aintaurikute aintaumunya kua mundu upe maa timaare anyu aramawaa ae.

⁷Asui aintaupuamu kuri aintaruaxara aintauyumuruanyana amu miraita ruaxara, yepe guvernu kuri umuruanyana amu guvernu, aintarimbiu upawa kuri, uriri kuri iwi yepeyepe tetama upe.

⁸Yawe kuri aintauyupiru aintaupurara.

⁹Asui aintauxari kuri pepurara, aintauyuká kuri penye, puxi kuri aintaumaa penye serera resewara kuaita mundu puraita panye.

¹⁰Asuiwana aintauwari kuri siya, ape kuri aintaumbeu aintarumuaraita resewara, puxi kuri aintauyumaa.

¹¹Aintaupuamu kuri siya utitikawaita ugananiwaita aintauganani kuri siya.

¹²Aintaumunya kuri aintapuxuwerasawa turusu piri, ape kuri aintakuere aintauyugustari kuaita siyawaita miraita.

¹³Maa kua santawaa uiku ate anyu aramawaa upe uyumukaturu kuri.

¹⁴Aintaurikute aintaumbue kua nyenga purangawaa maye aintaruixawa arama kua Deus panye mundu kiti aintaukuawa arama kuaita miraita panye. Asuiwana kuri upawa kua ara.

¹⁵Pemaa irumu kuri kua umuaiwawaa puxuwerawa uwapika kuri Deus ruka upe kuaye Daniel utitikawaa yawe, pexari aintaukuawa kuaita uleriwaita.

¹⁶Pexari aintauyawawa isui iwitera rese kuaita Judeya upewaita.

¹⁷Asui kua uikuwaa uka ipewaa rese tepexari uwiye uwike suka upe urasu arama imaa.

¹⁸Kua yuiri uikuwaa kupixawa upe tepexari uyuiri uyuka ikapa.

¹⁹Puxuwera kuri usika aintarese kuaita ipuruãwaita kuaita yuiri uxariwaitare aintamembira uu aintakambi nyã ara upe.

²⁰Pepurandu Deus irumu tiarama peyawawaa paranawasu rame tiyuiri sauru rame.

²¹Nyãse nyã ara upe aintaupurara kuri turusu, mundu uyupirungawa upe tikuera aintaupurara iyawe ate kuiri, asui tiana kuri aintaupurara arirewara iyawe.

²²Tirame maa Deus umuatuka kua ara timaa awa uyumukaturu, maa umuatuka kua ara aintaresewara kuaita uparawakawaita.

²³Asui amu umbeu rame penye arama: —Aete Kristu kua u Kristute nyã, teperuyari inyenga.

²⁴Nyãse aintauri kuri siya ugananiwaita umbeuwaita Kristute ainta, siya yuiri utitikawaita ugananiwaita aintaumunya kuri siya milagri siya yuiri purangawaita tirewaita yamaa sã aintaupuderi rame aintauganani kuaita uparawakawaita.

²⁵Hambeuwana penye yawewaa runde.

²⁶Ape aintaumbeu rame kuri: —Aete Kristu nyã uikuwaa kampu upe tekuri pesu akiti. Aintaumbeu rame: —Uiku ukapi upe teperuyari aintanyenga.

²⁷Kuaye truvão werawaa yawe umuturi kurasi usemuwaa asui ate kurasi uwikewaa akiti yawete kuri uri rame kua unaseriwaa umaa kua ara.

²⁸Urubuita aintauyumuatiri umanuwaita inemawaita rese.

²⁹Asuiwana kuri aintaupurara rire anyunte kuri pitunawasu kua kurasi asui tikuri umuturi kua yasi, asui aintauwari iwaka sui kuaita estrela, asui aintaukataka kuri kuaita kirimbawawaita kuaita uikuwaita iwaka rese.

³⁰Asuiwana aintaumaa iwaka upe sangawa kua unaseriwaa umaa kua ara asui sasiyara kuri ainta, asui aintaumaa kua unaseriwaa umaa kua ara uri kuri nuvẽ irumu iwaka suiwara, ikirimbawasawa irumu igluria irumu yuiri.

³¹Asuiwana kuri umundu kuaita anjuita aintaupeyu trumbeta kirimbawa aintaumuatiri arama uparawakawaita panye mundu kiti panye mundu arukanga rupiwaita.

³²Peyumbue sese kua figera pemaa irumu kuri usemu pisasusawa pekuawa kuri kuayentuana kurasi ara.

³³Yawete penye, pemaa irumu kuri uri kua hambeuwaa pekuawa kuri kuayentuana ae.

³⁴Supiwa hambeu penye arama: —Tikuri aintaupawa kuaita miraita kuiriwaraita senundere kua hambeuwaa.

³⁵Aintaupawa kuri panye iwaka panye ara yuiri maa senyenga tikuri upawa.

³⁶Maa tiawa ukuawa mairame sangawa nẽ anjuita iwaka upewaita nẽ Deus raira, maa anyunte sepaya ukuawa.

³⁷Kuaye Nue tempu rame yawete yuiri kuri uri rame kuri kua unaseriwaa umaa kua ara.

³⁸Kuxima senundere parana uwike aintarese anyunte aintaumanduari aintaumbau arama aintauu arama yuiri, aintauyuka aintarimiriku aintauxari aintarayeraita umendari ate Nue uwike batelão upe.

³⁹Timaa aintaumanduari sese ate parana uwike aintarese urasu ainta panye, yawete yuiri kuri uri rame kua unaseriwaa umaa kua ara.

⁴⁰Mukuĩ kuri upuraki kupixawa upe uyuka kuri yepe uxari kuri yepe.

⁴¹Mukuĩ kunya ukitika maniaka uyuka kuri yepe uxari kuri yepe.

⁴²Ape pesaru puranga nyãse tipekuawa mairame uri kua peruixawa.

⁴³Kuiri pesendu kua hambeuwaa sese kua uka iyara ukuawa rame maa sangawa kua mundawasu usaru maa ae tiarama uwike suka kiti.

⁴⁴Yawete penye pesaru kua unaseriwaa umaa kua ara yawewarawate nyãse uri kuri yepe ara tiwa upe pemanduari.

⁴⁵Awataa kua upurakiwaa purangawaa ukuawawaa yawe, suixawa uxari usaru suka puraita uxari arama aintaumbau usika rame sangawa?

⁴⁶Ape suuri kuri ae suixawa usika rame umaa umunya kuaye umbeuwaa yawe.

⁴⁷Supiwa hambeu penye: —Suixawa uxari kuri usaru panye kuaita iyaraita.

⁴⁸Maa puxuwerawa rame kua upurakiwaa uyupurungita aepawa: —Seruixawa uikure uikupuku sesui.

⁴⁹Ape unupa sumuaraita umbau uu yuiri ukauwaita irumu.

⁵⁰Uri kuri kua suixawa kua upurakiwaa yepe ara upe tiirumu usaru ae, uri kuri yepe ura tiwa upe umanduari ae.

⁵¹Asuiwana kuri suixawa uxari upurara umburi kuri ae isui aintairumu kuaita retentuwaita aintauyaxiu akiti aintausuu kuri aintaranya.