Read Nhengatu Mateu 25 Bible Online

Mateu 25 - Nhengatu bible

Mateu 25

¹Asui Jesus unyee: —Kuaita iwaka ruixawa imiraita aintayawe kuaita dezi kunyamukuita aintaupisika aintalamparina aintausu arama aintausuanti kua nuivu.

²Sinku tiwaita ukuawa ara, sinkute ukuawawaita.

³Kuaita tiwaita ukuawa ara aintaurasu aintalamparina maa tiaintaurasu keruzeni aintairumu.

⁴Maa kuaita ukuawawaita aintaurasu aintalamparina keruzeni yuiri siru upe.

⁵Asui uikupuku xinga uri kua nuivu asui tipusi usika aintarese asui aintaukiri panye.

⁶Asui pituna piterupi aintausasemu, aintaunyee: —Aikue uri kua nuivu pesuana pesuanti ae.

⁷Asui aintaupuamu kuaita kunyamukuita aintaumukaturu aintalamparina.

⁸Asui kuaita tiwaita ukuawa aintaunyee ukuawawaita supe: —Pemee yande arama keruzeni nyãse upawana yanesui.

⁹Maa kuaita ukuawawaita aintaumbeu ainta supe: —Umbaa, yawaite tiusika yande arama penye arama yuiri, maa pesu aintapiri kuaita uvenderiwaita pepiripana arama penye arama.

¹⁰Asui aintausu irumure aintaupiripana aintayara arama usikana kua nuivu asui aintauwike irumu aintauyumuatiriwaa upe kazamentu rupiara kuaita usaruwaita ae, asui aintausikindawa ukena.

¹¹Asui aintarakakuera aintauri kuaita amuita kunyamukuita tiwaita ukuawa aintaumbeu: —Yaneruixawa, yaneruixawa repirari yande arama ukena yawike arama.

¹²Maa umbeu ainta supe: —Supiwa hambeu penye tihakunyeseri penye.

¹³Ape pesaru puranga ae nyãse tipekuawa maa ara upetaa uri nẽ pekuawa maa ura upetaa uri.

¹⁴Umunya kuri iyawe kua apigawa usuwaa apekatu kiti, usu rundere usenui upurakisaraita ipiri uxari arama aintausaru imaa.

¹⁵Asui umee sinku dinyeru amu supe, asui umee mukuĩ dinyeru amu supe, asui umee yepe dinyeru amu supe kuaye aintaupuderiwaa yawe, asui usuana aintasui apekatu kiti.

¹⁶Aramete kua upisikawaa sinku dinyeru usu unegusiari ipupe asui uganyari sinku dinyeru ipupe.

¹⁷Asui yawete umunya kua upisikawaa mukuĩ dinyeru ape uganyari mukuĩ dinyeru ipupe.

¹⁸Asui kua upisikawaa yepe dinyeru usu upikuĩ iwi uyumimi arama suixawa dinyeru iwi upe.

¹⁹Asui uikupuku xinga uri kua aintaruixawa kuaita upurakiwaita umunya arama aintakunta.

²⁰Ape uri kua upisikawaa sinku dinyeru uxari ixupe sinku umbeu ixupe: —Seruixawa rexariana ixe arama kua sinku dinyeru kuiri remaa kuaita haganyariwaa irumu sinkute yuiri.

²¹Asui suixawa umbeu ixupe: —Inde upurakiwaa ixe arama purangawaa, puranga remunya ixe arama resarute puranga kua kuairawaa haxariwaa resaru ape kuri haxari resaru seyaraita siyawaita. Kuiri rewike rewapika suuri neruixawa irumu.

²²Asui uri yuiri suixawa ipiri kua upisikawaa mukuĩ dinyeru umbeu ixupe: —Seruixawa rexariana ixe arama mukuĩ dinyeru asui remaa kuaita mukuĩ haganyariwaa.

²³Asui suixawa umbeu ixupe: —Inde upurakiwaa ixe arama purangawaa, puranga remunya ixe arama, resaruana puranga kua kuairawaa haxariwaa resaru, ape kuri haxari resaru seyaraita siyawaita. Kuiri rewike rewapika suuri neruixawa irumu.

²⁴Asui uri kua upisikawaa yepe dinyeru umbeu ixupe: —Seruixawa, hakuawate apigawa kirimbawawaa inde, hakuawate repuu kuaita tiwaita reyutima, hakuawate remuatiri kuaita tiwaita remunuka.

²⁵Ape hasikie resewara nesui hayumimi nedinyeru iwi upe. Xukui hamuyuiri inde arama neyara.

²⁶Asui suixawa umbeu ixupe: —Inde upurakiwaa puxuwerawa, inde yatima mayawaa. Rekuawate hapuu kua tiwa hayutima, rekuawate hamuatiri kua tiwa hamunuka.

²⁷Ape purangate reruri ae ainta supe kuaita usaruwaita dinyeru, asui hayuiri rame maa hayuka uganyariwaa irumu kua seyara.

²⁸Ape peyuka isui kua yepe dinyeru pexari arama ixupe ae kua urikuwaa dezi dinyeru.

²⁹Nyãse panye kua urikuwaa uriku kuri turusu piri, uriku kuri turusu piri isui kua uputariwaa. Asui kua tiwa uriku aintauyuka kuri isui kua urikuwaa yepe.

³⁰Asui pemburi yanesui kua upurakiwaa tiwa maa arama pitunawasu kiti, ape kuri aintauyaxiu aintausuu aintaranya.

³¹Asui Jesus unyee: —Uri rame kuri umuturi kuri yanerese purangawaa irumu kua unaseriwaa umaa kua ara aintauri yuiri kuri irumu kuaita anjuita purangawaita asui uwapika kuri itrunu upe igluria irumu.

³²Asui aintauyumuatiri kuri umaa arama muiri kuaita mundu puraita asui umutirika kuri yepeyepe amuita sui kuaye usaruwaa uvelya umutirikawaa yawe kuaita kabritu uvelya sui.

³³Yawete yuiri kuri uxari iuvelyaita upuamu ikatusawa sui asui uxari kuri yuiri kabrituita upuamu ikanyuntu sui.

³⁴Asui kua yaneruixawa umbeu ainta supe kuaita upuamuwaita ikatusawa upe: —Peyuiriana penye sepaya uabensuariwaita pewike perendawa kiti hamunyawaa penye arama ara rundere.

³⁵Kuxima hapurara yumãsi asui pexari hambau arama, kuxima seisi asui pexari hau arama ii, kuxima hayuiri pepiri apekatu sui asui pesuanti ixe puranga.

³⁶Kuxima rupaima ixe asui pexari ixe arama serupa arama, kuxima mãsi upisika ixe asui peajudari ixe, kuxima aintaumprezu ixe asui peyuiri pemaa sepiri.

³⁷Asui kuri aintaunyee ixupe kuaita purangawaita: —Inde yaneruixawa mairame kuerataa yaxari rembauwaa arama repurara rame yumãsi? Mairame kuerataa yamee reu arama ii neisi rame reiku?

³⁸Mairame kuerataa yasuanti inde reyuiri irumu apekatu sui? Mairame kuerataa yaxari inde arama nerupa rupaima rame inde?

³⁹Mairame kuerataa yasu yamaa inde nemãsi rame reiku, aintaumprezu rame yuiri inde?

⁴⁰Asuiwana kuri kua yaneruixawa umbeu ainta supe: —Supiwa hambeu penye arama, kua pemunyawaa ainta supe kuaita semu ipuiwaita pemunya yuiri ixe arama.

⁴¹Asuiwana kuri umbeu ainta supe, kuaita upuamuwaita ikanyuntu sui: —Penye hambeuwaita perese puxuwera, pesuana sesui tata kiti nunkawaa uweu kiti hamunyawaa ixupe kua Yurupari idemuniwita supe yuiri.

⁴²Maa hapurara rame kuera yumãsi tipemee hambau arama, seisi rame haiku kuera tipemee hau arama ii.

⁴³Hayuiri pepiri apekatu sui maa timaa pesuanti ixe, rupaima rame kuera ixe tipemee ixe arama serupa arama, semãsi rame kuera ixe aintaumprezu rame kuera ixe maa tipeyuiri pemaa sepiri.

⁴⁴Asuiwana kuri aintaumbeu ixupe: —Yaneruixawa mairame kuerataa tiyawajudari inde repurara rame reiku yumãsi, neisi rame yuiri, apekatu suiwara inde, nerupaima rame inde, nemãsi rame inde aintaumprezu rame inde?

⁴⁵Asuiwana kuri umbeu ainta supe: —Supiwa hambeu penye, kua tiwa pemunya ainta supe kuaita ipuiwaita tiyuiri pemunya ixe arama.

⁴⁶Asuiwana kuri aintaupurara yawewarawate, maa kuaita purangawaita aintauwike kuri ara nunkawaa upawa kiti.