Read Nhengatu Mateu 26 Bible Online

Mateu 26 - Nhengatu bible

Mateu 26

¹Asui umbue rire ainta kua Jesus umbeuwaa ainta supe kuaita umbuewaita:

²—Pekuawate mukuĩ ara rire aintaumunya kuri kua festa paskua, ape aintauxari kuri suanyanaita supe kua unaseriwaa umaa kua ara aintaunupa arama kuri uyari kurusa rese.

³Asui kuaita saserdutita aintaruixawaita, umpinimawaita yuiri tuyuweita yuiri aintauyumuatiri suka upe kua saserdutita ruixawa sera Kaifa.

⁴Asui aintauyupurungita aintapawa aintaumprezu arama ae aintaugananisawa irumu aintauyuká arama ae.

⁵Maa aintauyumbeu aintapawa: —Tiyapuderi yapisika ae festa ara upe yawaite aintaumaramunya kuaita miraita.

⁶Asui Jesus uikure Betania upe suka upe kua Simão leprusu.

⁷Uri ipiri yepe kunya, ururi kua siru aintaumunyawaa alabastru suiwara teresemu ipupe sakuenawaa. Asui uyusena ae Jesus akanga rese uwapikawaa upe meza ruaki.

⁸Asui puxi aintaumaa ixupe kuaita umbuewaita aintaunyee: —Marantaa uyusenapawa kua sipiwasuwaa?

⁹Maa yapuderi maa yavenderi kua sakuenawaa yayuka arama dinyeru turusu sikuyara yamee arama pirasuawaita supe.

¹⁰Jesus ukuawa mayetaa aintauyupurungita aintapawa, ape umbeu ainta supe: —Marantaa peputari pemuapatuka kua kunya? Purangawaa kua umunyawaa ixe arama.

¹¹Kuaita pirasuawaita aintauiku kuri peirumu yawewarawate maa ixe tikuri haiku peirumu yawewarawate kua ara upe.

¹²Uri uyusena serese kua sakuenawaa umukaturu arama sepira aintaumburi arama ae iwi kuara kiti.

¹³Supiwa hambeuwaa penye: —Maa kiti kuri aintaumbue kua nyenga purangawaa panye ara kiti aintaumbeu kuri sesewara kua kunya umunyawaa ixe arama kuayewaa aintaumanduari arama sese.

¹⁴Asui yepe aintasuiwara kuaita duziwaita sera Juda Iskariute usu aintapiri kuaita saserdutita ruixawaita.

¹⁵Umbeu ainta supe: —Muiritaa pemee ixe arama dinyeru haentregari arama penye arama kua Jesus? Asui aintaupagari ae trinta dinyeru prata.

¹⁶Asui arire usaru sangawa sertuwaa uentregari arama ainta supe Jesus.

¹⁷Asui festa uyupirungawa upe aintaumbau seẽwaa umbuewaita uri Jesus piri aintaupurandu ae? —Maa kititaa reputari yamukaturu rembau arama paskua rame.

¹⁸Asui umbeu ainta supe: —Pesu tetama kiti ipiri kua yepe apigawa pembeu ixupe, yawe umbeu yaneruixawa, serangawa usikana, kuiri hambau neruka upe paskua rame hambuewaita irumu.

¹⁹Asui aintaumunya kuaye Jesus umunduwaa yawe, aintaumukaturu aintaumbau arama paskua rupiara.

²⁰Asui pituna irumu Jesus uwapika meza ruaki aintairumu kuaita duziwaita umbuewaita.

²¹Asui aintaumbau irumu umbeu ainta supe: —Supiwa hambeu penye yepe kuri pesuiwara uentregari ixe seruanyanaita supe.

²²Asui sasiyara aintapia asui aintaupurandu ae aintayaweyawe: —Seruixawa maitaa ixe será?

²³Asui Jesus umbeu ainta supe: —Uxari kuri ixe seruanyanaita supe kua umundeuwaa ipu seirumu yepe pratu upe.

²⁴Maa kua unaseriwaa umaa kua ara usu kuri kuaye aintaumpinimawaa yawe sese, maa pirasuawaa kua uxariwaa suanyanaita supe kua unaseriwaa umaa kua ara, purangate maa tikuera maa unaseri umaa kua ara.

²⁵Asui kua Juda uentregariwaa ae upurandu ae: —Inde umbuewaa, maitaa ixe será? Asui Jesus umbeu ixupe: —Ẽẽ indete kua rembeuwaa.

²⁶Asui aintaumbau irumu Jesus upisika yepe pão uabensuari ae, asui upartiri ae uxari arama ainta supe ae kuaita umbuewaita, umbeu ainta supe: —Pepisika pembau aete sepira.

²⁷Asui upisika kupu umee grasa Deus supe sese Asui umee umbuewaita supe ae umbeu ainta supe: —Peu ae muiri penye.

²⁸Aete seruwi uxari aramawaa santa ipupe kua hambeuwaa penye arama, kua haxariwaa uyusena aintaresewara kuaita siyawaita hamburi arama aintasui aintapekadu.

²⁹Kuiri hambeu penye: —Tiana mukuĩsawa hau kuri kua mirá iya yukise senundere hau pisasuwaa peirumu peruixawa irumu kua sepaya.

³⁰Asui aintaunyengari rire yepe inu aintausu iwitera rese sera Ulivera.

³¹Asui Jesus umbeu ainta supe: —Kua pituna kuri puxi kuri pemaa ixe kuaye aintautitikawaa yawe aintapapera upe kuxima, yawe aintaunyee: —Hanupa kuri kua usaruwaa uvelya asui aintaumusaĩ kuri panye iuvelyaita usaruwaita.

³²Asui hasemu rire kuri iwi kuara sui hasu kuri perunde Galileya kiti.

³³Asui Pedru umbeu ixupe: —Aintaumaa rame puxi inde arama panye kuaita amuita ixe tikuri puxi hamaa inde.

³⁴Jesus umbeu ixupe: —Supiwa hambeu inde arama kua pitunate musapiri viaji kuri reyumimi seresewara senundere galu unyengari.

³⁵Pedru umbeu ixupe: —Aintauputari rame aintauyuká ixe neirumu tikuri hayumimi neresewara. Yawepawate aintaumbeu panye kuaita umbuewaita.

³⁶Asui Jesus usika amu kiti sera Getisemani unyee umbuewaita supe: —Pewapika ike hasu pukusawa hapurandu sepaya irumu mikiti.

³⁷Asui anyunte urasu sumuara kua Pedru kuaita yuiri Zebedeu rairaita mukuĩ, asui sasiyara ae upurara ipia upe.

³⁸Asui umbeu ainta supe: —Sasiyara sepia turusu yawaite maa hamanu sesewara, kuiri pewapikare ike pesaru seirumu.

³⁹Asui usu aintasui apekatu xinga uyawika uyenu iwi rese upurandu arama ipaya irumu umbeu: —Inde sepaya reputari rame rexari sekupu usasawa sesui maa teremunya kuaye haputariwaa yawe maa remunya kuaye reputariwaa yawe.

⁴⁰Asui uyuiri umbuewaita ipiri uwasemu aintaukiri uiku isui, ape umbeu Pedru supe: —Maitaa tipepuderi pesaru seirumu yepe ura?

⁴¹Pesaru pepurandu irumu yawaite Yurupari uganani penye pemunya arama puxi, supiwa pepia uputari maa pepira pituawaa ae.

⁴²Asui Jesus usu upurandu Deus irumu mukuĩsawa umbeu: —Inde sepaya tirame sekupu upuderi usasawa sesui senundere hau ae remunya kuri kuaye reputariwaa yawe.

⁴³Asui uyuiri uwasemu ainta aintaukiri aintauiku mukuĩsawa nyãse tipusi aintaresa.

⁴⁴Asui Jesus uyuiri yuiri aintasui upurandu arama musapirisawa kuaye upuranduwaa yawe primeru.

⁴⁵Asui uyuiri yuiri umaa aintapiri kuaita umbuewaita umbeu ainta supe: —Maitaa pekirire, maitaa pepiture peiku? Kuiri usikana sangawa aintauxari arama puxuwerawaita ipu upe kua unaseriwaa umaa kua ara.

⁴⁶Kuiri pepuamu yasuana aikuewana kua uxariwaa ixe seruanyana supe.

⁴⁷Jesus upurungita ramere uiku usika ipiri kua Juda kua yepe aintasuiwara kuaita duziwaita, ururi irumu siya apigawaita espada irumu kaseti irumu yuiri aintaumunduwaita kuaita saserdutita aintaruixawaita tuyuweita yuiri.

⁴⁸Kua uentregariwaa Jesus suanyanaita supe umbeuwana ainta aintaukuawa arama Jesus ae umbeu ainta supe: —Aete kuri Jesus kua habejariwaa satipi rese, pepisika kuri ae.

⁴⁹Ape usika irumu Jesus ipiri umusuaki ae umbeu ixupe: —Inde será, inde umbuewaa; asui ubejari ae satipi rese.

⁵⁰Maa Jesus unyee ixupe: —Inde seanama, maataa remunya? Asui aintauri aintaupisika aintaipu irumu Jesus aintaumprezu ae.

⁵¹Asui yepe aintasuiwara kuaita Jesus rumuaraita usiki iespada siru sui unupa yepe saserdutita ruixawa ikriadu umunuka isui inambi.

⁵²Asui Jesus umbeu ixupe: —Remuyuiri neespada siru kiti, aintaukanyemu kuri espada irumu panye kuaita umaramunyawaita espada irumu.

⁵³Maitaa tirekuawa, haputari rame maa hapurandu sepaya irumu umundu arama maa ixe arama kuiri siyapiri maa duzi mili sui anjuita?

⁵⁴Maa hasenui rame maa ainta, maitaa maa hapuderi hamunya kuaye aintautitikawaa yawe kuxima aintapapera upe?

⁵⁵Asui aramete Jesus umbeu ainta supe kuaita siyawaita: —Maitaa peyuiri pepisika ixe espada irumu kaseti irumu yuiri kuaye pepisikawaa yawe mundawasu? Kuxima haiku peirumu muiri ara hambue rame haiku templu upe, asui tikuera pemprezu ixe.

⁵⁶Maa yawe aintaumunya; aintaumunya arama kuaye aintaumpinimawaa yawe aintapapera upe kuaita utitikawaita. Asui kuaita umbuewaita aintauxari ae muiri ainta, aintauyawawa isui.

⁵⁷Asui kuaita upisikawaita Jesus aintaururi ae suka kiti kua saserdutita ruixawa sera Kaifa ape aintauyumuatiriana kuaita umpinimawaita tuyuweita yuiri.

⁵⁸Asui Pedru usu apekatu xinga Jesus rakakuera suka kiti kua saserdutita ruixawa asui uwike uwapika serakuenawaa ikriaduita irumu umaa arama mayetaa kuri usemu.

⁵⁹Asui kuaita saserdutita ruixawaita panye serakuenawaita yuiri aintauputari aintausendu gananisawa Jesus rese aintauyuká arama ae.

⁶⁰Maa timaa nungara aintauwasemu puxuwera sese kua aintaumbeuwaa kuaita ugananiwaita sese. Asui aintauri mukuĩ ugananiwaita aintauganani arama sesewara.

⁶¹Aintaunyee: —Kua apigawa umbeu kuera, hapuderi hamburi kua Deus ruka asui hapuderi yuiri hasupiri ae musapiri ara upe.

⁶²Asui upuamu kua saserdutita ruixawa unyee Jesus supe: —Maitaa tirepuderi resuaxara ainta sesewara kua aintaumbeuwaa puxi nerese?

⁶³Maa Jesus ukiririntu usendu ainta supe asui kua saserdutita ruixawa umbeu ixupe: —Kuiri haputari rembeu yande usendu arama kua Deus upakawaa, maitaa inde kua Kristu Deus raira?

⁶⁴Jesus umbeu ixupe: —Ixete. Maa hambeu penye: —Pemaa kuri kua unaseriwaa umaa kua ara uwapika kuri ikatusawa sui kua kirimbawawaa, pemaa kuri uri nuvẽ piterupi iwaka sui.

⁶⁵Asui ipiaiwa kua saserdutita ruixawa umusuruka ipupekawa umbeu: —Puxuwera umbeu Deus rese, marantaa yaputari amu umbeu sesewara? Penyete pesendu kuiri kua umbeuwaa puxuwera.

⁶⁶Mayetaa penye sese? Asui aintaumbeu: —Urikute umanu.

⁶⁷Asui aintautumuna Jesus ruwa upe, aintausuapeteka ae, asui aintaunupa ae aintaipu irumu.

⁶⁸Aintaunyee ixupe: —Inde Kristu readivinyari awataa unupa inde.

⁶⁹Asui Pedru uwapikare uka kuara piterupi kua uka turusuwaa, asui uri yepe kriada unyee ixupe: —Indete sumuara kua Jesus Galileya suiwara.

⁷⁰Asui Pedru uyumimi sesewara panye aintasui umbeu ixupe: —Tihakuawa nyã rembeuwaa.

⁷¹Asui Pedru usu kupiara kiti, asui kua amu kriada umaa ae asui umbeu ainta supe kuaita upuamuwaita ape: —Kua apigawa aete sumuara kua Jesus Nazare suiwara.

⁷²Asui Pedru uyumimi yuiri sesewara nyenga kirimbawawaa irumu; umbeu: —Tihakunyeseri kua apigawa rembeuwaa.

⁷³Asui uikupuku xinga aintauri aintaumusuaki Pedru kuaita uikuwaita ape aintaunyee ixupe: —Supiwa indete yepe aintasuiwara nyãse repurungita aintayawe.

⁷⁴Ape uyupiru umbeu: —Deus kuri umpurarakari ixe tirame supiwa kua hambeuwaa asui umbeu Deus rese, tihakunyeseri kua apigawa rembeuwaa. Asui aramete galu unyengari.

⁷⁵Asui Pedru umanduari Jesus umbeuwaa ixupe: —Musapiri viaji kuri reyumimi seresewara senundere galu unyengari. Asui Pedru usu ukara kiti uyaxiu kirimbawa.