Read Nhengatu Mateu 27 Bible Online

Mateu 27 - Nhengatu bible

Mateu 27

¹Asui kuemaite aintauyupurungita Jesus rese aintauyuká arama ae panye kuaita saserdutita ruixawaita tuyuweita yuiri panye.

²Asui aintaupukuari rire Jesus aintaurasu ae aintauxari arama ixupe kua aintaruixawa sera Pilatu.

³Asui kua Juda uxariwaa Jesus suanyanaita supe sasiyara ipia umaa irumu aintaurasu aintauyuká arama ae, ape umuyuiri kua trinta dinyeru prata ainta supe kuaita serakuenawaita saserdutita ruixawaita tuyuweita yuiri.

⁴Umbeu ainta supe: —Hamunyana puxi haxari resewara penye arama kua tiwa umunya puxi. Asui aintaunyee ixupe: —Timaa arama yande arama kua remunyawaa puxi, inde aramapawate ae.

⁵Asui Juda umburi isui kua dinyeru prata templu kiti, asui uyuiri aintasui usu uyupiri arama mirá rese iwate upukuari iayura upe tupasama upuri arama uyatiku.

⁶Asui aintaupisika kua dinyeru prata kuaita saserdutita ruixawaita kua umburiwaa aintaumbeu: —Tipuranga yaxari uferta riru upe kua dinyeru nyãse sikuyara ae kua yepe apigawa ruwi.

⁷Ape aintaupurungita rire aintausu aintaupiripana ikampu kua umunyasara pratu aintaumburi arama ape aintapira kuaita umanuwaita apekatu suiwaraita.

⁸Ape tuwi kampu aintauseruka kua kampu aintaupiripanawaa ate kuiri.

⁹Aintaumunya kuaye utitikawaa yawe kuxima kua utitikawaa sera Jeremia yawe umbeu: —Aintaurasu kuri kua trinta dinyeru prata sikuyara kua aintauxariwaa sese isipiwasusawa kuaita yepeyepe Israel rimiariruita.

¹⁰Aintaupiripana ikampu kua umunyasara pratu kuaye seruixawa umunduwaa yawe hambeu.

¹¹Asui Jesus upuamu aintaruixawa umaa arama, asui kua tuixawa upurandu ae unyee ixupe: —Maitaa inde kua judewita ruixawa? Jesus usuaxara ae: —Ixete kua rembeuwaa.

¹²Asui aintaumbeu irumu puxuwera Jesus rese kuaita saserdutita ruixawaita tuyuweita yuiri nẽ maa nungara usuaxara.

¹³Asui Pilatu umbeu ixupe: —Maitaa timaa resendu muiritaa kua aintaumbeuwaa puxi nerese?

¹⁴Asui timaa nungara Jesus usuaxara nẽ yepe nyenga, ape kua aintaruixawa turusu iakayemu umaa ixupe.

¹⁵Asui akayu yaweyawe Pilatu uyurawa ainta supe yepe prezuwaa festa rame awantu miraita uputari irumu.

¹⁶Ape yepe aintaumprezuwaa sera Baraba panye ukunyeseriwaa.

¹⁷Asui aintauyumuatiriwaa upe kuaita miraita Pilatu upurandu ainta: —Mayewataa peputari hayurawa penye arama u Baraba u kua Jesus aintauserukawaa Kristu?

¹⁸Yawe umbeu kua Pilatu nyãse ukuawa aintauentregari ixupe kua Jesus aintaumuasi resewara ae.

¹⁹Asui uwapika serakuenawaa banku rese ximiriku umundu ixupe kuekatu yawe unyee ixupe: —Tereajudari aintaumunya puxi ixupe kua purangawaa nyãse uyi pituna sekerupi hapurara turusu sesewara.

²⁰Asui kuaita saserdutita ruixawaita tuyuweita yuiri aintaumukirimbawa miraita aintaupurandu arama uyurawa ainta supe Baraba uxari arama umanu kua Jesus.

²¹Asui upurandu mukuĩsawa ainta kua aintaruixawa: —Awataa peputari hayurawa aintasuiwara kuaita mukuĩwaita? Aintaumbeu ixupe: —Baraba!

²²Pilatu umbeu ainta supe: —Maitaa hamunya ixupe kua Jesus aintauserukawaa Kristu? Asui aintausuaxara muiri ainta: —Rexari aintaunupa uyari kurusa rese.

²³Asui upurandu ainta kua aintaruixawa: —Maataa umunya puxuwera? Asui kirimbawa aintausasemu aintaunyee: —Rexari aintaunupa uyari kurusa rese.

²⁴Asui Pilatu umaa tiupuderi utrukari aintaumanduariwaa apete aintauyupiru aintaumaramunya ainta, ape upisika ii basia upe umuyasuka arama ipu aintaumaa arama kuaita siyawaita umbeu ainta supe: —Timaa hariku kulpa aintaumburi arama suwi maa penyete perikute kulpa.

²⁵Asui aintausuaxara ae panye kuaita miraita aintaumbeu: —Suwi uwari yanerese yanerairaita rese yuiri.

²⁶Asui Pilatu uyurawa ainta supe kua Baraba. Asui usurari rire Jesus uxari ainta supe ae aintaunupa arama uyari kurusa rese.

²⁷Asui aintaurasu Jesus aintauyumuatiriwerawaa upe sera preturiu kuaita aintaruixawa suraraita, asui aintauyumuatiri panye suraraita aintaumaa arama Jesus.

²⁸Asui aintauyuka isui kua irupa aintauxari arama sese ipupekawa pirangawaa.

²⁹Asui aintauyupe yuu suiwara aintaumunya ruda aintaumundeu arama uyari iakanga rese ikurua arama, asui aintauxari pindaiwa ipu upe, asui aintauyurinipia ixupe aintaukasuari ae, asui aintaumukuema ae aintaunyee ixupe: —Purangawaa inde judewita ruixawa.

³⁰Asui aintautumuna sese asui aintaupisika kua pindaiwa aintaunupa arama iakanga rese.

³¹Asui aintaukasuari rire ae aintauyuka isui ipupekawa aintauxari arama sese irupaita, asui aintaurasu ae aintaupregari arama uyari kurusa rese.

³²Asui aintausuwaa upe aintauiku aintauwasemu yepe apigawa Sireni suiwara sera Simão, asui aintaumundu usupiri Jesus kurusa.

³³Asui aintausika amu kiti sera Golguta, yawesawa sera mira akanga kãwera rendawa.

³⁴Aintauputari aintaumee uu mirá iya yukise saiwaa irawawaa irumu ape usaã ae asui tiuu ae.

³⁵Asui aintaunupa rire uyari kurusa rese aintaupisika aintayaweyawe imaa kua aintaumburiwaa surti sese.

³⁶Asui aintauwapika ape aintausaru ae.

³⁷Asui iakanga arupi aintauxari yepe nyenga aintaumbeuwaa arama ipupe sesewara yawe aintaumpinima sese: —Aete Jesus judewita ruixawa.

³⁸Aintaumuyari mukuĩ mundawasuita kurusa rese suaki, yepe ikatusawa sui yepe ikanyuntu sui

³⁹Asui kuaita usasawawaita ape aintaumbeu puxi sese aintaumukataka aintaakanga ixupe.

⁴⁰Aintaumbeu: —Inde reputariwaa remburi templu resupiri arama ae musapiri ara upe, kuiri reyumukaturu indepawate, Deus raira rame inde rewiye kurusa sui.

⁴¹Yawete yuiri aintaukasuari ae kuaita saserdutita ruixawaita umpinimawaita yuiri tuyuweita yuiri.

⁴²Yawe aintaunyee: —Umukaturuana amuita maa tiupuderi uyumukaturu simutara, aete Israelitaita ruixawa urikute uwiye kurusa sui yaxari arama yanepia sese.

⁴³Uxariana ipia Deus rese ape kuri Deus urikute umuye ae kuiri ugustari rame ae, nyãse yawe unyee: —Deus raira ixe.

⁴⁴Yawete yuiri aintaukasuari ae kuaita mundawasuita aintaumuyariwaita kurusa rese suaki.

⁴⁵Asui pitunawasuana kurasi yandara rame panye kua mundu upe ate musapiri ura rame.

⁴⁶Asui musapiri ura rame Jesus usenui kirimbawa unyee: —Eli, eli, lema, sabakitani, yawesawa umbeu, seDeus, seDeus, marantaa rexari ixe?

⁴⁷Asui aintausendu irumu unyeewaa kuaita yepeyepe upuamuwaita suaki aintauyupurungita ainta supe, usenui uiku Elia.

⁴⁸Asui yepe aintasuiwara uyana kutara umuyapumi espunja vinagri upe uxari arama pindaiwa rakapi rupi usupiri arama uxari arama Jesus uu arama.

⁴⁹Asui aintaunyee kuaita amuita: —Rexarire, yamaa sã Elia uri umukaturu ae.

⁵⁰Asui kirimbawa Jesus usenui yuiri ape uxari ianga usemu ipira sui.

⁵¹Asui kua panu aintauxariwaa usikindawa templu rukena usuruka simutara iwate sui ate supita kiti, asui uriri panye kua iwi asui upupuka kuaita itaita.

⁵²Asui uyupirari kuaita iwi kuaraita aintausemu kuaita purangawaita ambira pira kuaita ukiriwaita.

⁵³Asui aintausemu iwi kuara sui usemu rire kua Jesus asui aintauwike aintaretama Jeruzalẽ kiti aintauyumuyukuawa siya.

⁵⁴Asui kua suraraita kapitão kuaita yuiri irumuwaita usaruwaita Jesus aintaumaa irumu uriri kua iwi panye yuiri kua usasawawaa aintaakayemu turusu ape aintaunyee: —Supiwa Deus raira ae.

⁵⁵Apete siya kunyaita upuamuwaita aintaumaa Jesus apekatu sui kuaita uriwaita Jesus rakakuera Galileya sui aintawajudari arama ae.

⁵⁶Yepe aintasuiwara kua Maria Madalena, amu yuiri Maria aintamaya kuaita Tiagu Juze yuiri, amu yuiri Zebedeu rimiriku.

⁵⁷Asui karuka rame uri yepe rikuwaa Arimateia suiwara sera Juze, Jesus umbuewate ae.

⁵⁸Usu Pilatu ipiri upurandu arama Jesus ipira asui Pilatu umundu aintauxari ixupe ae.

⁵⁹Asui Juze umuye rire ipira upupeka ae fazenda murutingawaa irumu.

⁶⁰Asui umburi ae ita kuara upe uxariwaa aintaupikuĩ pisasuwaa, asui usikindawaita turusuwaa irumu, asui uyuiri.

⁶¹Asui Maria Madalena uwapika umaa ita kuara ruaki sumuara kua amu Maria.

⁶²Asui nyã ara rakakuera aintaumukaturu festa rupiara aintausu Pilatu ipiri kuaita saserdutita ruixawaita farizewita yuiri.

⁶³Aintaumbeu ixupe: —Yaneruixawa, yakuawa upaka ramere kua ugananiwaa, yawe umbeu ainta supe: —Hayuiri kuri hapaka musapiri ara rire.

⁶⁴Ape kuri rexari aintausikindawa santa kuaita kuara rukena ate usasawa musapiri ara yawaite aintauri kuaita umbuewaita aintaumunda arama ipira, yawaite aintaumbeu miraita supe, uyuiri upakaita ikuara sui, yawaite maa uganani kirimbawa piri miraita maye uyupiruwaa yawe kuera uganani.

⁶⁵Pilatu umbeu ainta supe: —Perikute pesuraraita, kuiri pesu pesikindawa santa kua ita kuara rukena kuaye peputariwaa yawe.

⁶⁶Ape aintausu aintausikindawa kua ita kuara rukena asui aintauxari aintasuraraita usaru ita kuara rukena ruaki.