Read Nhengatu Mateu 28 Bible Online

Mateu 28 - Nhengatu bible

Mateu 28

¹Asui sauru rire kuemaite mitu rame uri umaa ita kuara kua Maria Madalena kua amu Maria yuiri.

²Asui kirimbawa uriri kua iwi nyãse yaneDeus anju uwiye iwaka sui uri umutirika ita kuara rukena sui kua ita turusuwaa, asui uwapika sese.

³Kirimbawa suwa umuturi kuaye truvão werawaa yawe, murutingawaa irupa kuaye ii tiesawa murutingawaa yawe.

⁴Asui aintauriri kuaita usaruwaita kua ita kuara aintausikie resewara isui, asui aintauwari aintauyenu iwi upe kuaye umanuwaa yawe.

⁵Maa kua anju umbeu ainta supe kuaita kunyaita: —Tepesikie penye, nyãse hakuawate pesikari kua Jesus aintaunupawaa uyari kurusa rese.

⁶Tiana yamaa ike ae, uyuiriana upaka kuaye umbeuwaa yawe. Peyuiri pemaa kua uyenuwaa kuera upe.

⁷Pesuana kutara pembeu arama umbuewaita supe: —Uyuiriana upaka manusawa sui, asui kuiri usu arama perunde Galileya kiti, akiti kuri pemaa ae, anyunte hambeu penye arama.

⁸Asui kutara aintauyuiri ita kuara sui aintausikie maa suuri aintapia turusu, aintauyana aintaumbeu arama umbuewaita supe ae.

⁹Asui Jesus uri aintaruaxara umbeu ainta supe: —Suuri penye, asui aintausu suaki aintaupisika ipi rese, aintaumee ixupe purangawaa.

¹⁰Ape Jesus umbeu ainta supe: —Tepesikie, pesu pembeu semuita supe aintausu arama Galileya kiti, akiti kuri aintaumaa ixe.

¹¹Asui aintausuwaa upe anyunte yepeyepe usaruwaita ita kuara aintausu tetama kiti aintaumbeu saserdutita ruixawaita supe kua usasawawaa ita kuara upe.

¹²Asui aintauyumuatiri aintauyupurungita arama kuaita serakuenawaita tuyuweita irumu, asui aintauxari turusu dinyeru ainta supe kuaita suraraita.

¹³Aintaumbeu ainta supe: —Kuiri kuri pembeu ainta supe kuaita miraita, umbuewaita umunda ipira pituna rame yakiri pukusawa.

¹⁴Usendu rame peresewara pekiri kua peruixawa yambeu kuri peresewara puranga tiarama kuri uxari pepurara.

¹⁵Asui aintaupisika kua dinyeru kuaita suraraita, asui aintaumunya kuaye aintaumbeuwaa yawe ainta supe, ape kuaita judewita aintaumbeu kua nyenga aintausenduwaa ate kuiri yuiri.

¹⁶Asui kua unzi umbuewaita aintausu Galileya kiti, aintausu aintausaru Jesus yepe iwitera rese umbeuwaa kiti.

¹⁷Asui aintaumaa irumu Jesus aintaumee ixupe purangawaa, maa yepeyepe mukuĩ aintaumanduariwaa.

¹⁸Asui Jesus uri aintapiri umbeu ainta supe: —Umeewana ixe arama panye ikirimbawasawa panye iwaka kiti panye kua ara upe yuiri.

¹⁹Ape pesu arama pembue panye kua mundu upe pebatizari ainta sera rese kua sepaya taira Espiritu Santu yuiri.

²⁰Pembue ainta aintauruyari arama panye kua nyenga hamunduwaa peruyari, ape peirumute kuri ixe yawewarawate, ate mairame upawa kua mundu.