Read Nhengatu Mateu 4 Bible Online

Mateu 4 - Nhengatu bible

Mateu 4

¹Asui Espiritu urasu Jesus kampu kiti, asui Yurupari uri uputari uganani ae.

²Asui Jesus kuarenta ara kuarenta pituna timaa nungara umbau, asui sasi ixupe yumãsi.

³Asui uri ipiri kua ugananiwera umbeu ixupe: —Deus raira rame inde remuyereu inde arama pão kua itaita rembau arama.

⁴Maa Jesus umbeu ixupe: —Yawe aintaumpinima timaa kuri aintauiku pão resepawa kuaita miraita, maa aintauiku kuri Deus inyenga rese kua usemuwaa Deus iyuru sui.

⁵Asui Yurupari urasu ae aintaretama Jeruzalẽ kiti templu rakapi rupi iwate kiti.

⁶Umbeu ixupe: —Deus raira rame inde repuri templu sui, nyãse yawe aintaumpinima kuxima uxari kuri ianjuita usaru inde aintausupiri kuri aintaipu irumu inde tiarama renupa neipi ita rese.

⁷Jesus usuaxara ae: —Kuxima aintaumpinima yuiri, teremuserana putari neruixawa Deus.

⁸Asui Yurupari urasu ae iwitera rese iwatewaa umukame umaa panye kua tetamaita uikuwaita kua mundu upe panye ipurangasawa yuiri.

⁹Umbeu ixupe: —Haxari kuri inde arama panye kua hamukamewaa remaa remunya rame ixe arama benditu.

¹⁰Asui Jesus usuaxara ae unyee ixupe: —Resu sesui inde Yurupari, nyãse yawe aintaumpinima kuxima rerikute remunya benditu neruixawa Deus supe, rerikute remunya kultu ixupe panye sui.

¹¹Asui Yurupari uxari ae, asui anjuita uri ipiri aintawajudari ae.

¹²Asui Jesus usendu irumu aintaumprezu Juão, uyuiri Galileya kiti.

¹³Asui usuana Nazare sui, uri uiku Kafarnaum upe kua uikuwaa lagu rimbiwa kiti Zebulum upewaa Naftali upewaa yuiri.

¹⁴Umunya kuaye umbeuwaa yawe kuximare kua utitikawaa Izaia, yawe umbeu,

¹⁵Kua iwi sera Zebulum kua yuiri iwi Naftali lagu turusuwaa ruakiwaa Jurdão ruaxara kiti, aete Galileya tiwaita judeu retama,

¹⁶kuaita miraita uikuwaita pitunawasu upe aintaumaa yepe turi kirimbawawaa, umuturiana aintarese kuaita miraita uikuwaita manusawa piterupi sasiyarawaa upe.

¹⁷Asui Jesus uyupiru umbue miraita umbeu ainta supe: —Petrukari pemanduarisawa pemanduari sasiyara pepekadu, nyãse kuayentuana perunde pesikari arama peruixawa arama kua iwaka ruixawa.

¹⁸Asui Jesus uwata lagu Galileya ruaki umaa mukuĩ apigawaita kua Simão Pedru kua yuiri imu Andre, aintaupisaitika aintauiku paraname nyãse upisaitikawaita ainta.

¹⁹Asui umbeu ainta supe: —Peyuiriana serakakuera haxari arama pepisaitika miraita Yurupari sui.

²⁰Asui kutara aintauxari aintapisa aintausu arama Jesus rakakuera.

²¹Asui Jesus usu xingare umaa yuiri mukuĩ apigawa kua Zebedeu raira Tiagu imute Juão yuiri aintauwapika aintaigara upe aintapaya Zebedeu irumu aintaumukaturu aintauiku aintapisa, asui Jesus usenui ainta.

²²Asui aramete aintauxari aintaigara aintapaya yuiri aintausu arama sakakuera.

²³Asui Jesus usu panye Galileya kiti umbue ainta aintasinaguga upe, umbeu ainta supe kua inyenga purangawaa aintaruixawa arama kuri kua Deus, umburi yuiri panye mãsi aintasui kuaita miraita.

²⁴Asui sesewara usika aintarese panye kuaita Siria upewaraita, ape aintaururi ipiri kuaita uikuaiwawaita, mãsiwerawaita yuiri, kuaita upurarawaita yuiri, demuniu upukuariwaita yuiri, kuaita urikuwaita mãsi puxuwerawa, pituawaita yuiri, asui umukaturu ainta.

²⁵Asui aintauri sakakuera siya miraita Galileya suiwaraita, Dekapuli suiwaraita yuiri, Jeruzalẽ suiwaraita yuiri, Judeya suiwaraita yuiri, kuaita yuiri Jurdão ruaxara suiwaraita yuiri.