Read Nhengatu Mateu 5 Bible Online

Mateu 5 - Nhengatu bible

Mateu 5

¹Umaa irumu kuaita miraita siyawaita Jesus uyupiri iwitera rese, asui uwapika asui umbuewaita uri ipiri.

²Asui uyupiru umbue ainta, umbeu ainta supe:

³—Suuri kuri kuaita umanduariwaita pirasua ainta aintapia upe nyãse aintaruixawa kua iwaka ruixawa.

⁴—Suuri kuri kuaita uyaxiuwaita nyãse Deus kuri umusuuri ainta.

⁵—Suuri kuri kuaita tiwaita ipiaiwa nyãse aintayara kuri kua ara.

⁶—Suuri kuri kuaita usikariwaita kua purangawaa nyãse teresemu kuri aintapia.

⁷—Suuri kuri kuaita uajudariwaita pirasuawaita nyãse pirasua aintaumaa ainta supe.

⁸—Suuri kuri kuaita urikuwaita aintaumanduarisawa ikiaimawaa nyãse aintaumaa kuri Deus.

⁹—Suuri kuri kuaita uxariwaita amuita aintauyumaa puranga nyãse Deus rairaita kuri yaseruka ainta.

¹⁰—Suuri kuri kuaita aintaumuruanyanawaita purangawaa resewara nyãse aintaruixawa kua iwaka ruixawa.

¹¹—Suuri kuri penye aintauyakawa rame penye seresewara suuri kuri penye aintaumuruanyana rame penye aintauganani rame perese panye puxuwerawa.

¹²—Suuri kuri peyumaa peyumusuuri kuri nyãse periku kuri turusu purangawaa iwaka kiti nyãse yawe aintaumuruanyana kuaita utitikawaita perundere.

¹³—Penyete kua mundu yukira usasawa rame yukira sui sembikasawa, mayetaa maa yapuderi yaxari umusembika yuiri ae? Maa timaa arama ae anyunte maa yamburi ae yaneipi iwira kiti yapiru sese.

¹⁴—Penyete kua mundu turi timaa yapuderi yayumimi kua tetama uikuwaa iwitera rese.

¹⁵Timaa yamundeka lamparina yaxari arama ae kaxa upe maa yaxari ae uwapika sendawa upe umuturi arama panye uka upe.

¹⁶Ape pexari peturi umuturi aintarese kuaita miraita irumu kua purangawaa pemunyawaa aintaumaa aintaumee arama purangawaa yanepaya supe iwaka kiti.

¹⁷—Tepemanduari hayuiri hamukanyemu arama Muize inyenga aintanyenga yuiri kuaita utitikawaita. Timaa hayuiri hamukanyemu aintanyenga, hayuiri hamunya arama kuaye aintautitikawaa yawe kuxima.

¹⁸Supiwa hambeu penye timaa kuri yepe letra ukanyemu isui kua aintautitikawaa sese senundere hamunya panye. Aintaupawa kuri kuaita estrela kua ara yuiri senundere usasawa kua aintautitikawaa sese.

¹⁹Ape kuri kua tiwa uruyari panye Deus umunduwaa aintauruyari umbue yuiri amuita tiarama aintauruyari panye kuaira miriwaa aintauseruka ae aintasui kuaita iwaka ruixawa imiraita. Maa kua uruyariwaa Deus nyenga puranga umbue yuiri kuri amuita aintauruyari arama purangawaa kuri aintauseruka ae kua iwaka ruixawa imiraita.

²⁰Hambeu penye tirame puranga pemanduarisawa aintasui kuaita umpinimawaita kuaita yuiri farizewita timaa kuri iwaka ruixawa imiraita penye.

²¹Pesenduana maye aintaumbeu kuxima: —Tereyuká mira Deus kuri umbeu sesewara kua uyukáwaa mira.

²²Kuiri hambeu penye arama, Deus kuri umbeu sesewara kua umaawaa puxi imu kua yuiri kua umpuxuwerawaa imu, asui kua yuiri umbeuwaa imu supe tenyuntuwara inde, urikute umaa isui yawaite usu tata kiti.

²³Ape kuri remanduari rame puxi nemu umaa inde arama remee irumu prezenti Deus supe.

²⁴Resu remukaturu neirumu ae kua nemu umaawaa inde arama puxi senundere remee prezenti Deus supe.

²⁵Remukaturu neirumu ae kua umbeuwaa puxi nerese resuwaa upe reiku irumu delegadu ipiri yawaite uxari inde serakuenawaa supe yawaite serakuenawaa uxari inde suraraita supe aintaumprezu arama inde.

²⁶Supiwa hambeu inde: —Timaa kuri uyurawa inde kadeya sui tirame repagari ixupe panye redeveriwaa.

²⁷Pesenduana maye aintaumbeu kuxima: —Teresikari amu kunya nerimiriku sui, teresikari amu apigawa nemena sui.

²⁸Asui kuiri hambeu penye arama, warixiwaa kua umaamaawaa kunya rese umunyate puxuwera kua kunya irumu ipia upe.

²⁹Neresa katusawa uxari rame remunya puxuwera purangate remusaka remburi nesui ae, maa purangate maa ukanyemu nesui yepe neresa tiarama aintaumburi inde panye nepira irumu infernu kiti.

³⁰Reputari rame remunya puxi neipu katusawa suiwara irumu purangate remunuka ae remburi arama nesui ae, puranga maa ukanyemu yepe neipu tiarama aintaumburi inde panye nepira irumu infernu kiti.

³¹Yawe aintaumbeu kuxima: —Awa uputari umuyuiri isui ximiriku urikute umpinima ixupe arama papera umuyuiriwaa rupiara ae.

³²Maa kuiri hambeu penye arama: —Awa umuyuiri isui ximiriku tirame umunya puxuwera warixiwaa yawe aintaumaa ae, awa rame uyuka ximiriku aramawaa ae kua amu umuyuiriwaa anyunte warixiwaa yawe aintaumaa ae.

³³Pesenduana maye aintaumbeu kuxima: —Terembeu tenyuntuwara rese Deus ukuawate supiwa senyenga, maa remunya Deus supe kuaye rembeuwaa yawe.

³⁴Asui kuiri hambeu penye arama: —Tepembeu Deus ukuawate supiwa hambeu, tiyuiri pembeu paraizu rese supiwa penyenga, nyãse Deus uwapikawaa rendawa ae.

³⁵Timaa yuiri pembeu kua mundu rese supiwa hambeu, nyãse Deus ipi ibanku ae kua mundu, timaa yuiri Jeruzalẽ rese nyãse setama ae kua yaneruixawa kirimbawawaa.

³⁶Timaa yuiri pembeu peakanga rese, supiwa senyenga, nyãse timaa pepuderi pemuyereu yepe peawa murutinga arama tiyuiri pixunawaa.

³⁷Pepurungita rame penye pembeu supiwa u ẽẽ u pembeu umbaa, puxuwera kua yambeuwaa senunde kiti piri.

³⁸Pesenduana maye aintaumbeu kuxima: —Amu unupa rame neresa upe rerikute renupa sesa upe yuiri, amu unupa rame neranya rerikute renupa yuiri sanya.

³⁹Maa hambeu penye: —Teremunya puxuwera neruanyana supe unupa rame inde neratipi rese remuyereu suaxara sui unupa arama sese.

⁴⁰Kua umbeuwaa puxi nerese serakuenawaa supe uyuka arama nesui nekamixa rexari ixupe ae nepupekawa yuiri.

⁴¹Kua uafursariwaa resu arama irumu yepe punta rerikute resu irumu mukuĩ punta.

⁴²Kua upuranduwaa neirumu rexari ixupe kua uputariwaa. Kua uputariwaa upuru neirumu teresaisu isui ae.

⁴³Pesenduana maye aintaumbeu kuxima: —Rerikute regustari nemu puxi remaa kua neruanyana.

⁴⁴Maa hambeu penye: —Pegustari kua peruanyanaita, pepurandu Deus irumu aintarese kuaita umuruanyanawaita penye.

⁴⁵Pemunya puranga ainta supe panye taira arama kuri penye kua yanepaya iwaka kiti, nyãse uxari kurasi umuturi aintarese kuaita purangawaita puxuwerawaita yuiri, uxari yuiri amana uwari aintarese kuaita purangawaita puxuwerawaita yuiri.

⁴⁶Pegustari rame ainta kuaita ugustariwaita penye, maataa kuri sikuyara penye arama? Maitaa tiaintaumunya yawete yuiri kuaita publikanu puxuwerawaita?

⁴⁷Pesuanti rame peanamaitantu amuita sui, maitaa pemunya puranga piri amuita sui? Maitaa timaa yuiri aintaumunya yawete kuaita tiwaita uruyari?

⁴⁸Ape kuri pesikari purangawaa pemanduarisawa umanduarisawa yawe kua pepaya iwaka kitiwara.