Read Nhengatu Mateu 6 Bible Online

Mateu 6 - Nhengatu bible

Mateu 6

¹Pemaa pesui yawaite pemunya puranga Deus supe uyukuawasawa upe panye miraita umaa arama, yawaite maa peputari aintaumbeu peresewara puranga, peputari rame aintaumbeu perese puranga timaa kuri pepaya iwaka kitiwara upagari penye.

²Ape remee rame kuri prezenti pirasuawaita supe terexari yepe upeyu trumbeta nerunde kiti miraita umaa arama kuaye aintaumunyawaa yawe sinaguga upe ukara kiti yuiri kuaita retentuwaita. Supiwa hambeu penye arama: —Aintaurikuana sikuyara kua aintaumunyawaa.

³Maa inde remunya rame puranga pirasuawaita supe terexari nekanyuntu ukuawa maa umunyawaa kua nekatusawa.

⁴Remunya uyumimisawa upe puranga ainta supe kuaita pirasuawaita asuiwana kuri nepaya Deus umaawaa inde arama uyumimisawa upe upagari kuri inde.

⁵Repurandu rame Deus irumu teremunya aintayawe kuaita retentuwaita nyãse suuri aintaupuamu aintaumbeu Deus sinaguga upe ukara kiti yuiri miraita umaa arama ainta. Hambeu penye arama supiwa aintaurikuana sikuyara kua aintaumunyawaa.

⁶Maa inde repurandu rame Deus irumu rewike nerukapi kiti resikindawa asui repurandu nepaya irumu uyumimisawa upe, asuiwana kuri nepaya umaawaa inde uyumimisawa upe uxari kuri inde arama kua repuranduwaa irumu.

⁷Asui pepurandu rame Deus irumu tepemuyumuyuiri penyenga aintayawe kuaita tiwaita ukuawa Deus inyenga, aintaumaite Deus usendu ainta supe aintaumbeu resewara siya viaji aintanyenga.

⁸Ape kuri tepemunya aintayawe, nyãse pepaya Deus ukuawate kua watariwaa penye arama senundere pepurandu irumu.

⁹Ape kuri pepurandu Deus irumu kuaye hambeuwaa yawe: —Inde yanepaya iwaka kiti, purangawaa nerera,

¹⁰Reyuiriana yanepiri yaneruixawa arama inde, rexari yamunya kuaye reputariwaa yawe ike kua mundu upe aintayawe kuaita iwaka kitiwaraita.

¹¹Remee yande arama yambau arama muiri ara.

¹²Reperduari yande neirumu isui kua yamunyawaa inde arama puxuwera kuaye yaperduariwaa yawe yaneirumu kuaita umunyawaita yande arama puxuwera.

¹³Terexari amu uganani yande yamunya arama puxuwera maa reyuka yande isui kua puxuwerawa. Nyãse indete yaneruixawa kirimbawawaa purangawaa yawewarawate, amem.

¹⁴Peperduari rame peirumu kuaita umunyawaita puxi penye arama ape kuri pepaya iwaka kiti uperduari kuri penye.

¹⁵Tirame peperduari peirumu kuaita umunyawaita penye arama puxi, yawete yuiri kuri pepaya tiuperduari penye pemunyawaa puxi.

¹⁶Asui peyukuaku rame peiku Deus rese penye tepemunya aintayawe kuaita retentuwaita, sasiyara aintauyumaa miraita ukuawa arama aintauyukuaku Deus rese. Supiwa hambeu penye, aintaurikuana sikuyara kua aintaumunyawaa.

¹⁷Maa inde reyukuaku rame reiku remukaturu neawa uleu irumu remuyasuka neruwa.

¹⁸Tiarama miraita ukuawa reyukuaku reiku inde maa nepaya umaa inde yumimisawa upe asui kua nepaya umaawaa inde yumimisawa upe uxari kuri inde arama kua repuranduwaa irumu.

¹⁹Tepesikari pemuatiri peyara arama turusu ike mundu upe yawaite kupiĩ umbau ae, yawaite feruju ae, yawaite mundawasuita upirari siru aintaumunda arama pesui ae.

²⁰Maa pesikari pemuatiri peyara arama iwaka kiti akiti kuri timaa kupiĩ umbau ae, tiyuiri feruju ae, timaa yuiri mundawasuita umunda pesui ae.

²¹Mame remuatiriwaa neyara arama apete yuiri rexari nepia.

²²Yaneresa aete yanepira turi, purangawaa rame neresa umuturi kuri puranga panye nepira upe.

²³Maa puxuwerawa rame uiku kuri pitunawasu upe. Yawete yuiri pitunawasu rame kua neturi pitunawasu kuri ae turusu.

²⁴Tiawa upuderi upuraki mukuĩ patrão supe, ugustari rame yepe amu sui puxi kuri umaa ixupe, uruyari rame amu inyenga timaa kuri usendu amu supe. Tipepuderi pepuraki Deus supe pesikari rame peganyari mundu iyara.

²⁵Ape hambeu penye: —Tepeyuka pepia kua mundu rese, tepembeu penye arama, maataa kuri yambau yau yuiri? Tepembeu, maataa kuri yanerupa arama? Maitaa pemanduari timaa arama kua yanerikuesawa timbiu sui? Maitaa pemanduari timaa arama kua yanepira yanerupa sui?

²⁶Pemaa kuaita wiraita timaa nungara aintauyutima, timaa yuiri aintaupuu, tiaintaumukaturu aintaumbau arama aintaruka upe, maa yanepaya iwaka kitiwara uxari aintaumbau arama. Maitaa pemanduari tipuranga penye wiraita sui?

²⁷Awataa pesuiwara upuderi uyukiriari ipuku xinga uyuka resewara ipia sese?

²⁸Asui marantaa peyuka pepia perupa rese? Pemaa maye aintauyukiriari kuaita putira kampu upe timaa aintaupuraki tiyuiri aintaumunya fazenda.

²⁹Maa hambeu penye, puranga piri putira purangasawa irupa sui kua Salumão rikuwaa kuera.

³⁰Deus uxari putiraita supe aintapurangasawa kampu upe, kuaita aintausapi aramawaa, uxari yuiri puranga piri perupa aramawaa, yawe hambeu penye arama penye kuairawaita uruyari.

³¹Ape kuri tepeyuka pepia tepembeu: —Maataa kuri yambau? Maataa kuri yau arama? Maataa kuri yamundeu?

³²Nyãse kuaita tiwaita ukuawa Deus inyenga aintausikari panye maa, maa kua pepaya iwaka kitiwara ukuawate panye maa peputariwaa.

³³Perikute pesikari panye sui peruixawa arama kua Deus pesikari yuiri kirimbawa umanduarisawa pepia upe, asui uxari kuri penye arama panye maa ae.

³⁴Ape kuri tepeyuka pepia wirande rese, nẽ pemanduari sese kua pesikariwaa wirande nyãse usikana pemanduari uyi ara rese.