Read Nhengatu Mateu 7 Bible Online

Mateu 7 - Nhengatu bible

Mateu 7

¹Tepembeu amu rese yawaite aintaumbeu perese.

²Maa yawe pembeuwaa yawe aintarese yawete yuiri aintaumbeu perese. Kuaye pemeewaa ainta supe amuita yawete yuiri kuri aintaumee penye arama.

³Marantaa remaa mirá kuairawaa nerumuara resa upe tipukusawa remaa kua mirá turusuwaa neresa upe?

⁴Marantaa rembeu nemu supe rexari hayuka nesui kua mirá kuairawaa neresa sui reriku pukusawa turusuwaa mirá neresa upe?

⁵Inde retentuwaa, primeru reyuka mirá turusuwaa neresa sui asuiwana kuri remaa puranga reyuka arama mirá kuairawaa nemu resa sui.

⁶Tepexari yawara supe Deus iyara santuwaa, tepexari perula tayasu supe yawaite upiru ae ipi irumu yawaite uyereu usuu inde.

⁷Pepurandu rame uxari kuri penye arama kua pepuranduwaa irumu, pesikari rame asui pewasemu kuri pesenui rame uyupirari kuri penye arama.

⁸Nyãse muiri kuaita upuranduwaita aintauriku kuri kua aintaupuranduwaa, asui kuaita uputariwaita aintauwasemu kuri kua aintauputariwaa, asui kua upuranduwaita uwike arama uxari kuri aintauwike.

⁹Awataa pesuiwara apigawa umeewaa ita taira supe upurandu rame irumu pão?

¹⁰Asui upurandu rame irumu pirá, maitaa umee ixupe arama buya?

¹¹Penye puxuwerawaita pekuawate pemee purangawaa perairaita supe, asui maitaa pemanduari pepaya iwaka kitiwara tiumee purangawaa ainta supe kuaita upuranduwaita irumu?

¹²Ape kuri pemunya amuita supe kuaye peputariwaa yawe aintaumunya arama penye arama. Maa kuaye Muize umpinimawaa yawe kuaita yuiri utitikawaita kuxima.

¹³Pewike kua ukena kuairawaa rupi, nyãse larguwaa kua ukena larguwaa yuiri kua pee urasuwaa yande yakanyemuwaa kiti, siya kuaita uwikewaita arupi.

¹⁴Kuaira kua ukena kuairawaa kua pee urasuwaa yande yawike arama mundu tiwa upawa kiti, yepeyepe uwasemu kua pee.

¹⁵Pemaa pesui kuaita utitikawaita ugananiwaita aintauri pepiri kuaye uvelya tiwa inyãruwaa yawe maa yawarate inyãruwaa yawe ainta aintapia upe.

¹⁶Aintaiya irumu pekuawa kuri aintarese. Maitaa yapuderi yapuu uva iya purangawaa isui kua mirá urikuwaa yuu, Maitaa yapuderi yapuu figu iya purangawaa kukuna sui?

¹⁷Kua mirá purangawaita aintauxari aintaiya purangawaa, maa kua mirá tenyuntuwaraita aintauxari aintaiya puxuwerawa.

¹⁸Kua mirá purangawaa tiupuderi uxari iya puxuwerawaita, kua mirá tenyuntuwara tiupuderi uxari iya purangawaita.

¹⁹Kuaita mirá tiwaita uxari aintaiya purangawaita anyunte aintaumunuka ainta aintaumburi arama ainta tata kiti.

²⁰Ape kuri aintaiya irumu pekuawa aintarese.

²¹Timaa kuri imiraita ainta kua iwaka ruixawa muiri kuaita umbeuwaita ixe arama, inde seruixawa, inde seruixawa, maa aintauwike kuri kuaita umunyawaita maye uputariwaa yawe kua sepaya iwaka kitiwara.

²²Nyã ara upe kuri siya aintaumbeu ixe arama, inde seruixawa, inde seruixawa, maitaa tiyambue nerera rese, yamburi yuiri demuniu nerera rese? Siya yamunya milagri nerera rese.

²³Asuiwana kuri hambeu uyukuawawaa ainta supe: —Timaa hakunyeseriwaita penye; pesuana sesui penye pemunyawaita pepuxuwerasawa.

²⁴Muiri kuaita usenduwaita senyenga uruyari arama ae umunya kuaye apigawa ukuawawaa yawe umunyawaa suka ita rese.

²⁵Asui amana uwari, asui parana uwike, asui iwitu upeyu kirimbawa uka rese, asui timaa uwari nyãse santa upuamu ita rese.

²⁶Asui muiri kuaita usenduwaita senyenga tiwa uruyari ae umunya kuaye kua apigawa tiwa ukuawawaa yawe umunyawaa suka arama praya rese.

²⁷Asui amana uri, asui parana uwike, asui iwitu upeyu kirimbawa uka rese, asui uwari asui puxuwerana ae panye.

²⁸Asui upurungita rire Jesus aintaakayemu aintaumaa ixupe kuaita miraita siyawaita umbuewaa resewara.

²⁹Umbue ainta kirimbawa kuaye serakuenawaa ukuawawaa yawe timaa aintayawe kuaita umpinimawaita.