Read Nhengatu Mateu 9 Bible Online

Mateu 9 - Nhengatu bible

Mateu 9

¹Asui uwiye igara upe usu arama lagu ruaxara kiti setama kiti.

²Asui aintaurasu Jesus ipiri yepe apigawa imembekawaa ipira uyenu uiku kama upe, asui Jesus umaa irumu mayetaa aintauxari aintapia sese umbeu ixupe kua imembekawaa ipira: —Seraira suuri reiku hamburi nesui nepekadu.

³Asui yepeyepe umpinimawaita aintauyupurungita aintapawa aintaumbeu: —Tenyuntu umbeuwaa kua apigawa.

⁴Asui Jesus ukuawa aintaumanduariwaa, ape umbeu ainta supe: —Marantaa puxuwera pemanduari pepia upe?

⁵Maitaa iwasuima xinga hambeu hamburi nesui nepekadu u iwasuima xinga hambeu repuamu rewata?

⁶Kuiri haxari pekuawa arama upuderi umburi aintapekadu kuaita mundu puraita kua unaseriwaa umaa kua ara, asui umbeu ixupe kua imembekawaa: —Repuamu repisika nekama resuana neruka kiti.

⁷Asui upuamu usuana suka kiti.

⁸Aintaumaa irumu Jesus umunya kua milagri aintausikie isui kua miraita siyawaita, asui aintaumee purangawaa Deus supe uxari resewara ukuawasawa kirimbawawaa apigawaita supe.

⁹Asui Jesus usu irumu aintasui umaa yepe apigawa sera Mateu uwapika uiku kuleturia upe. Asui Jesus umbeu ixupe: —Reyuiriana serakakuera, asui upuamu sakakuera.

¹⁰Asui Jesus uwapikare uiku umbau uka upe aintauri ipiri siya publikanuita pekaduruita yuiri aintauwapika Jesus irumu umbuewaita yuiri.

¹¹Kuaita farizewita umaa irumu aintaumbau Jesus irumu aintaumbeu umbuewaita supe: —Marantaa umbau aintairumu kuaita publikanuita pekaduruita yuiri kua umbuewaa penye?

¹²Maa Jesus usendu irumu aintaupurungita, umbeu ainta supe: —Timaa ikatuwaita usikari umpusangasara maa mãsiweraita aintausikari ae.

¹³Ape pemanduari sese mayesawataa kua inyenga: —Haputari pirasua peyumaa, timaa haputari peirumu uvelya pesapi aramawaita, maa timaa hayuiri hasenui purangawaita maa hayuiri hasenui pekaduruita.

¹⁴Asui aintauri ipiri kuaita Juão umbuewaita aintaumbeu ixupe: —Marantaa yayukuaku yande siya viaji kuaita yuiri farizewita maa timaa aintauyukuaku kuaita rembuewaita?

¹⁵Asui Jesus umbeu ainta supe: —Maitaa aintaupuderi aintauiku sasiyara kuaita umaawaita kazamentu uiku ramere aintairumu kua nuivu? Maa yepe ara kuri aintaurasu aintasui kua nuivu, nyã ara upe kuri aintauyukuaku.

¹⁶Tiawa uremendari panu pisasuwaa irumu irupa kuximawara rese yawaite pisasua umusuruka kuximawara yawaite uxari turusu piri ikuara upita puxuwera.

¹⁷Tiyuiri yaxari vinyu pisasuwaa siru kuximawara upe uvelya pirera suiwarawaa yawaite usuruka siru yawaite vinyu uyuyusena yawaite siru uyumuaiwa, maa yaxari vinyu pisasua siru pisasuwaa upe puranga arama vinyu siru yuiri.

¹⁸Jesus upurungitare uiku ainta supe uri yepe serakuenawaa ipiri umunya benditu umbeu ixupe: —Kuirintu umanu serayera reyuiriana rexari neipu sese upaka arama kuri ae.

¹⁹Asui Jesus upuamu usu arama sakakuera kuaita yuiri umbuewaita.

²⁰Asui yepe Kunya uri Jesus rakakuera duzi akayu upurara umaa tuwi, asui upisika Jesus irupa rakapira rese.

²¹Nyãse umbeuwana ipia upe hapisika rame irupa rese ape kuri purangana ixe.

²²Asui Jesus uyereu umaa ixupe umbeu: —Inde serayera, timaarese inde, rexariana nepia serese ape purangana inde. Aramete ikatuana kua kunya.

²³Asui Jesus uwike irumu serakuenawaa ruka upe umaa kuaita upeyuwaita membi kuaita yuiri uyaxiuwaita kirimbawa panye miraita irumu.

²⁴Jesus umbeu ainta supe: —Petirika timaa umanu kua taina anyunte ukiri uiku, asui aintaupuká sese.

²⁵Asui umusemu rire kua miraita ukara kiti uwike uka upe upisika ipu rese, asui usupiri kua kunyatai.

²⁶Asui aintausendu sesewara kua umunyawaa panye aintaretama kiti.

²⁷Asui Jesus usuwaa upe aintasui, asui mukuĩ apigawaita sesaimawaita aintauri sakakuera aintausenui ae aintaumbeu ixupe: —Inde Davi rimiariru pirasua remaa yande.

²⁸Asui Jesus uwike rire uka upe aintauri ipiri kuaita apigawaita sesaimawaita, asui Jesus umbeu ainta supe: —Maitaa pemanduari hapuderi hamunya penye arama kua peputariwaa seirumu? Asui aintausuaxara ae: —Ẽẽ yaneruixawa, yaruyari.

²⁹Ape uxari ipu aintaresa rese umbeu: —Hamunya penye arama kuaye peruyariwaa yawe pepia upe.

³⁰Asui aintaumaawana, asui Jesus umbeu ainta supe satambika: —Kuiri pemaa pesui tiarama pexari amuita ukuawa kuayewaa perese.

³¹Maa aintauyuiri isui aintaumbeu sesewara panye tetama kiti.

³²Miraita usu irumu isui aintaururi ipiri yepe apigawa muduwaa uriku demuniu.

³³Asui Jesus umburi rire isui kua demuniu upurungitana puranga kua muduwaa kuera, asui aintaakayemu aintaumaa Jesus kuaita miraita siyawaita, aintauyupurungita aintapawa: —Tire awa umaa kuayewaa Israel upe.

³⁴Maa kuaita farizewita aintaumbeu: —Umburite demuniwita ukuawasawa irumu kua demuniu ruixawa.

³⁵Jesus uwata umaa panye aintaretama turusuwaita kuairawaita yuiri umbue ainta sinaguga upe umbue ainta kua inyenga purangawaa maye aintaruixawa arama kuri kua Deus. Asui Jesus umburi aintasui panye mãsi.

³⁶Umaa irumu kuaita miraita siyawaita sasiyara ipia aintarese nyãse tiaintaupuderi aintauiku timaarese ainta aintauyusupariwaita ainta kuaye uvelya iyaraimawaa yawe.

³⁷Asui umbeu ainta supe kuaita umbuewaita: —Turusuwaa kua Deus upuuwaa rendawa maa muiriira kuaita upurakiwaita ixupe.

³⁸Ape kuri pepurandu irumu kua upuuwaa ruixawa umundu arama upurakiwaita aintaupuu arama ixupe iyaraita.