Read Nhengatu Marku 1 Bible Online

Marku 1 - Nhengatu bible

Marku 1

¹Yawe uyupiru kua inyenga purangawaa Jesus Kristu rese kua Deus raira.

²Yawe umpinima kuxima kua utitikawaa Izaia: "Aete kuri hamundu nerunde kiti yepe umbeu aramawaa umukaturu arama nerapee".

³Yawe usasemu kampu upe: "Pemukaturu yaneruixawa rapee, pemusatambika sapee".

⁴Juão Batista usika kampu upe, umbue miraita ubatizari ainta sasiyara resewara aintaumaa aintapuxuwerasawa Deus umburi arama aintasui ae.

⁵Asui siya miraita aintausu ipiri panye Judeya suiwaraita panye Jeruzalẽ suiwaraita yuiri aintauxari ubatizari ainta aintaumbeu irumu aintapekadu.

⁶Juão kamixa kamelu rawa suiwara, isinturão kamelu pirera suiwara, umbau tukura ira yukise yuiri mirá kuara pura.

⁷Yawe unyee Juão umbuewaa upe ainta: —Kuiri kuri amu uri serakakuera kirimbawa piri sesui uri kuri pepiri serakakuera, tikuri hapuderi hayawika hayurawa arama ipi sui isapatu, nyãse puranga piri sesui ae.

⁸Habatizari penye ii irumu, maa ae kuri ubatizari penye Espiritu Santu irumu.

⁹Asui Jesus uri Nazare sui Galileya upewara, uxari Juão ubatizari ae parana Jurdão upe.

¹⁰Asui usemu irumu parana sui umaa iwaka uyupirari umaa Espiritu Santu uwiye sese kuaye pumba uwiyewaa yawe.

¹¹Asui usendu yepe inyenga iwaka sui, umbewaa: —Indete seraira haputariwaa, suuri hamaa inde.

¹²Asui anyunte Espiritu uxari usu kampu kiti.

¹³Kuarenta ara uiku kampu upe suu uikuwaa upe, asui Yurupari uputari uganani Jesus umunya arama puxuwerawa, asui kuaita anjuita aintawajudari ae.

¹⁴Asui aintaumprezu rire Juão Jesus usu Galileya kiti umbue kua inyenga purangawaa Deus rese.

¹⁵Unyee ainta supe: —Usikana sangawa peruixawa arama kua Deus, ape sasiyara pemanduari pepekadu, peruyari inyenga purangawaa.

¹⁶Asui Jesus uwata lagu rimbiwa rupi sera Galileya umaa Simão imu Andre yuiri aintaumburi aintapisa paraname nyãse upisaitikawaita ainta.

¹⁷Jesus unyee ainta supe: —Peyuiriana serakakuera haxari arama pepisaitika apigawaita Yurupari sui.

¹⁸Asui aintauxari aintapisa aintausu arama Jesus rakakuera.

¹⁹Asui uwata xingare umaa Zebedeu raira Tiagu imu Juão yuiri, aintauwapika aintaigara upe aintaumukaturu aintapisa.

²⁰Asui Jesus usenui ainta, asui aintauxari aintapaya Zebedeu aintairumu kuaita upurakiwaita ixupe, asui aintausu sakakuera.

²¹Asui aintausu Kafarnaum kiti, asui sauru rame uwike sinaguga upe umbue arama ainta.

²²Asui aintausikie aintausendu ixupe nyãse umbue puranga maye ukuawawaa yawe tiainta yawe kuaita umpinimawaita.

²³Asui yepe apigawa urikuwaa yepe demuniu ikiawaa uwike sinaguga upe.

²⁴Usasemu kirimbawa: —Maataa resikari yaneirumu, inde Jesus Nazare suiwara? Maitaa reyuiri remukanyemu arama yande? Hakuawate awa inde, indete kua purangawaa Deus suiwara.

²⁵Asui Jesus umukiriri ae, unyee ixupe: —Rekiririntu inde, resemu isui kua apigawa.

²⁶Asui kua demuniu ikiawaa uxari uriri kirimbawa kua apigawa, asui usasemu rame uiku usemu isui.

²⁷Asui kuaita miraita aintausikie aintaumaa Jesus supe, aintaupurungita aintapawa: —Maataa kua? Maitaa yepe inyenga pisasuwaa ae? Nyãse kirimbawa umundu kua demuniu ikiawaita asui aintaumunya kuaye umbeuwaa yawe ainta supe arama.

²⁸Asui kutara aintausendu sesewara muiri kuaita Galileyawaraita.

²⁹Asui usemu sinaguga sui, asui uwike aintaruka upe kua Simão Andre yuiri, aintairumu Tiagu Juão yuiri.

³⁰Kua Simão sugra imãsi uiku saku ipira, asui aintaumbeu sesewara Jesus supe.

³¹Asui Jesus uri upisika ipu usupiri ae, asui takua uxariana ae, asui umunya aintaumbau arama.

³²Asui kurasi uwike irumu aintaururi Jesus ipiri panye mãsiweraita kuaita yuiri urikuwaita demuniu.

³³Asui panye kua tetama puraita aintauyumuatiri ukara kiti.

³⁴Asui Jesus umukaturu siya mãsiweraita, umburi aintasui panye mãsi, umburi siya demuniwita, asui tiuxari aintaupurungita kuaita demuniwita nyãse aintaukuawana ae.

³⁵Asui ara uri irumu pituna xingare Jesus upuamu usu amu kiti anyuira umbeu arama Deus ape.

³⁶Asui Simão usu sakakuera, kuaita yuiri sumuaraita panye.

³⁷Asui aintauwasemu ae, aintaunyee ixupe: —Aintauputari inde panye kuaita miraita.

³⁸Asui unyee ainta supe: —Yasuana amu kiti tetama suakintuwaita hambue arama ape yuiri nyãse sesewara hayuiri.

³⁹Asui umbue ainta sinaguga upe panye Galileya kiti, umburi yuiri aintasui demuniwita.

⁴⁰Asui yepe leprusu uri Jesus ipiri upurandu irumu kirimbawa, uwapika sinipia irumu ixupe, unyee: —Reputari rame repuderi rexari ikiaima ixe.

⁴¹Pirasua Jesus umaa ixupe, uxari ipu sese unyee ixupe: —Haputariana, reiku ikiaimawaa inde.

⁴²Asui aramete iperewa ukai, asui purangana ae.

⁴³Asui umundu rame usu umundu ae inyenga kirimbawa irumu.

⁴⁴Unyee ixupe: —Terembeu seresewara ainta supe kuaita miraita, maa resuana remukame saserduti umaa inde, asui remee uferta Deus supe uxari resewara ikiaimawaa inde kuaye Muize umbeuwaa yawe miraita ukuawa arama nerese.

⁴⁵Asui usu umbeu Jesus resewara panye miraita supe, ape Jesus tiupuderi uwike aintarendawa kiti uyukuawasawa upe, maa usu uiku mame tiwa yamaa miraita, asui miraita uri ipiri panye sui.