Read Nhengatu Marku 10 Bible Online

Marku 10 - Nhengatu bible

Marku 10

¹Asui Jesus upuamu usu Judeya kiti Jurdão ruaxara kiti. Ape aintauyumuatiri yuiri kuaita miraita siyawaita, ape umbue yuiri ainta maye umbuewerawaa yawe ainta.

²Asui aintauri ipiri kuaita farizewita aintauputari aintausaã ae, aintaunyee ixupe: —Maitaa puranga apigawaita aintaumuyuiri aintarimiriku?

³Asui usuaxara ainta: —Maitaa Muize umundu?

⁴Aintaunyee ixupe: —Muize uxari apigawa umpinima papera aintaumuyuiriwaa rupiara aintarimiriku aintasui.

⁵Asui Jesus unyee ainta supe arama: —Umpinima penye arama kua inyenga yawewaa santa resewara pepia.

⁶Maa uyupirungawa upe Deus umunya panye maa umunya yepe apigawa yepe kunya.

⁷Yawewaa resewara apigawa uxariana ipaya imaya yuiri.

⁸Uiku arama ximiriku irumu yepenyu arama ainta kuaita mukuĩwaita, ape timaa mukuĩwaita ainta maa yepenyuana ainta.

⁹Maa kuaita Deus uxariwaita aintauiku aintapawa tiawa upuderi utiari ainta.

¹⁰Asui uka upe kuaita umbuewaita aintaupurandu ae sese kua umbuewaa.

¹¹Asui unyee ainta supe: —Awa umuyuiri isui ximiriku uyuka arama amu umunya kuri ixupe puxuwera kua uxariwaa kuera.

¹²Kunya uxari rame imena uiku arama amu apigawa irumu puxuwera kuri umunya ixupe kua uxariwaa kuera.

¹³Asui aintaururi ixupe tainaita uxari arama ipu aintarese maa kuaita umbuewaita aintausaisu aintauri.

¹⁴Maa Jesus umaa rame yawewaa ape tiupita ugustari, asui umbeu ainta supe: —Pexari aintauri sepiri kuaita tainaita tepesaisu aintauri nyãse iyaraita ainta kua yaneruixawa Deus,

¹⁵Supiwa hambeu penye arama: —Kua tiwa uputari suixawa arama kua Deus kuaye taina uputariwaa yawe ae timaa kuri suixawa kua Deus.

¹⁶Asui upisika kuaita tainaita iwá rese uxari ipu aintarese uabensuari ainta.

¹⁷Asui Jesus uyupiru uwata pee rupi yepe apigawa uyana suaxara umunya benditu ixupe upurandu ae: —Inde umbuesarawaa purangawaa, maataa kuri hamunya hariku arama mundu nunka upawa?

¹⁸Asui Jesus usuaxara ae: —Marantaa rembeu purangawaa ixe? Tiyamaa awa purangawaa anyunte yepenyu Deus.

¹⁹Rekuawate maye Deus umbeu kuxima: "Tereyuká mira, terexari nerimiriku nemena yuiri, teremunda, tereganani amuita rese, tereganani reyuka amu iyara, regustari nepaya nemaya yuiri."

²⁰Usuaxara ae: —Inde rembuewaa, haruyariana panye kua Deus umbeuwaa setaina suiwarate.

²¹Asui Jesus umaa ixupe ugustari ae asui umbeu ixupe: —Yepentuana nerunde, resuana revenderi panye rerikuwaa, remee sikuyara pirasuawaita supe ape kuri reriku neyara iwaka kiti asui reyuiri serakakuera.

²²Asui kua inyenga usenduwaa umusasiyara ae, asui sasiyara uyuiri nyãse rikuwaa ae.

²³Asui Jesus umaa suaki umbeu umbuewaita supe: —Iwasu aintauxari aintaruixawa arama kua Deus kuaita rikuwaita.

²⁴Asui kuaita umbuewaita aintaakayemu aintausendu kua inyenga umbeuwaa. Maa Jesus umbeu yuiri ainta supe: —Serairaita iwasu yaxari yaneruixawa arama kua Deus.

²⁵Maa iwasuima kamelu uwike awi resa kuara rupi isui kua rikuwaa uxari suixawa arama kua Deus.

²⁶Asui aintaakayemu aintausendu ixupe, asui aintauyupurungita aintapawa: —Awataa maa upuderi uyumukaturu?

²⁷Jesus umaa ainta supe asui unyee: —Kuaita miraita tiaintaupuderi, maa Deus upuderi, nyãse Deus upuderi umunya panye maa.

²⁸Asui Pedru uyupiru umbeu ixupe: —Remaa yande, yaxariana panye maa yasu arama nerakakuera.

²⁹Jesus umbeu: —Supiwa hambeu penye arama, kua uxariwaa sendawa, imuita, sendiraita, imaya yuiri, ipaya yuiri, tairaita yuiri, ikupixawa yuiri seresewara senyenga resewara,

³⁰Uriku kuri sem viaji suka, imuita, sendiraita, imayaita, tairaita, ikupixawa, asui aintaumuruanyana kuri ae asui uriku kuri kua mundu nunka upawa.

³¹Maa siya kuaita uputariwaita aintarunde piri ainta maa aintarakakuerawaraita kuri ainta, maa kuaita aintarakakuerawaraita aintarundewaraita kuri ainta.

³²Asui aintausuwaa upe pee rupi Jeruzalẽ kiti Jesus usu aintarunde kuaita umbuewaita, asui aintaakayemu aintausendu ixupe, kuaita yuiri usuwaita sakakuera aintausikie isui, asui uyumuyukuawa ainta supe panye uriwaa kuri sese.

³³Umbeu ainta supe: —Pemaa, kuiri yasu Jeruzalẽ kiti, asui kua usemuwaa umaa kua ara uyuxari kuri saserdutita ruixawa supe ainta supe yuiri kuaita umpinimawaita aintaukundenari arama ae asui aintauxari kuri ae tiwaita judeu supe.

³⁴Ape kuri aintaukasuari sese, aintautumuna sese, aintausurari ae asui aintauyuká ae, maa musapiri ara rire uyuiri upaka.

³⁵Asui aintausu Jesus ipiri kuaita Tiagu Juão Zebedeu rairaita aintaumbeu ixupe: —Inde umbuewaa yaputari rexari yande arama maa yapuranduwaa neirumu.

³⁶Asui unyee ainta supe: —Maataa peputari hamunya penye arama?

³⁷Asui aintaunyee ixupe: —Rexari yawapika neirumu purangawaa upe yepe uwapika nekatusawa sui yepe uwapika nekanyuntu sui.

³⁸Maa Jesus umbeu ainta supe: —Timaa pekuawa maa pepurandu, maitaa pepuderi peu kua hauwaa kuri? Maitaa pepuderi pexari aintaubatizari penye kuaye ainta batizariwaa yawe kuri ixe?

³⁹Asui aintaunyee ixupe: —Yapuderite. Asui Jesus unyee: —Peu kuri kua hauwaa, aintaubatizari kuri penye kuaye seyawe.

⁴⁰Tihapuderi haxari pewapika sekatusawa sui kanyutu sui yuiri maa aintauwapika kuri ape sepaya uxariwaita.

⁴¹Asui kuaita dezi umbuewaita aintausendu irumu kua yawewaa aintaipiaiwa aintaumaa Tiagu Juão yuiri.

⁴²Asui Jesus usenui ipiri ainta, umbeu ainta supe: —Pekuawate maye kuaita mira ruixawaita kirimbawa aintaumundu aintamiraita kuaita yuiri kua aintakirimbawawaita aintaumundu yuiri ainta.

⁴³Maa pepiterupi tipuranga yawewaa, nyãse kua uputariwaa umundu ainta, urikute uajudari ainta panye.

⁴⁴Kua uputariwaa umundu amuita urikute upuraki ainta supe panye.

⁴⁵Nyãse yawete yuiri kua usemuwaa umaa kua ara timaa uri uxari aintaupuraki ixupe, maa upuraki ainta supe, umanu arama aintaresewara kuaita siyawaita uyurawa arama ainta.

⁴⁶Asui aintausika Jeriku upe. Asui uyuiri irumu Jeriku sui umbuewaita irumu kuaita siyawaita yuiri, uwapika pee rimbiwa upe kua upuranduwaa dinyeru sesaimawaa sera Bartimeu Timeu raira.

⁴⁷Usendu irumu Jesus Nazare suiwara ae uyupiru usenui, unyee: —Inde Jesus Davi rimiariru pirasua remaa ixe arama.

⁴⁸Asui siya miraita uyakawa ae ukiriri arama, maa kirimbawa piri usenui, unyee: —Inde Davi rimiariru pirasua remaa ixe arama.

⁴⁹Asui Jesus usika upuamu unyee: —Pesenui ae, asui aintausenui kua sesaimawaa, aintaunyee ixupe: —Repita suuri, repuamu nyãse usenui inde.

⁵⁰Asui umburi isui ipupekawa upuri upuamu asui uri Jesus ipiri.

⁵¹Asui Jesus upurandu ae: —Maataa reputari hamunya inde arama? Asui kua sesaimawaa usuaxara ae: —Seruixawa rexari hamaa.

⁵²Asui Jesus unyee ixupe: —Resuana, purangana inde reruyari resewara ixe. Asui purangana umaa asui usu Jesus rakakuera pee rupi.