Read Nhengatu Marku 11 Bible Online

Marku 11 - Nhengatu bible

Marku 11

¹Asui kuayentuana aintausika arama Jeruzalẽ sui Betifaje Betania yuiri asui iwitera uyupirungawa upe sera Ulivera Jesus umundu mukuĩ umbuewaita.

²Unyee ainta supe: —Pesuana suaxara kiti tendawa kiti ape kuri pewike irumu kuri pewasemu jumentu miri aintaupukuariwaa upuamu, tire awa uwapika sese, peyurawa peruri ixe arama ae.

³Aintaupurandu rame penye: —Marantaa peyurawa ae? Pembeu kuri ainta supe arama, yaneruixawa uputari ae, asui kuri umundu peirumu kua kiti ae.

⁴Asui aintausu aintauwasemu jumentu miri aintaupukuariwaa upuamu ukara kiti pee rupi, asui aintauyurawa ae.

⁵Asui yepeyepe apewaraita aintaunyee ainta supe: —Marantaa peyurawa kua jumentu miri?

⁶Asui aintaumbeu ainta supe maye Jesus unyeewaa ainta supe, asui aintauxari aintausu.

⁷Asui aintaurasu Jesus ipiri kua jumentu miri, asui aintauxari aintaupupekawaa jumentu miri iarupi asui Jesus uwapika sese.

⁸Asui siya aintauxari aintaupupekawaa pee rupi amuita aintaumunuka kaa kampu kiti asui aintauxari aintauyenu pee rupi.

⁹Asui kuaita usuwaita sunde kuaita yuiri usuwaita sakakuera aintausasemu kirimbawa: —Uzana, purangawaa kua uriwaa yaneDeus rera rese.

¹⁰Purangawaa kuri kua Davi guvernu uriwaa, uzana aintaunyengari ixupe iwate kiti iwaka kiti.

¹¹Asui aintauwike Jeruzalẽ kiti usu umaa templu kiti, asui umaa rire panye usu Betania kiti aintairumu kuaita duzi nyãse karukana ainta.

¹²Asui wirande kiti aintausu irumu Betania sui sasi ixupe arama yumãsi.

¹³Asui apekatu sui umaa yepe figera urikuwaa sawa, asui usu umaa sã uriku iya, asui kuayentuana umaa tiuriku iya anyunte sawa nyãse tire usika sangawa uriku arama iya.

¹⁴Asui Jesus unyee ixupe: —Tikuri awa uu neiya. Asui umbeuwaita usendu umbeuwaa.

¹⁵Asui aintausu Jeruzalẽ kiti. Asui uwike irumu templu kiti uyupiru umusemu ainta kuaita uvenderiwaita kuaita yuiri upiripanawaita templu upe, asui umuyereu aintameza kuaita utrukariwaita dinyeru aintauwapika arama yuiri kuaita uvenderiwaita pumba.

¹⁶Asui usaisu aintaururi maantu templu kiti.

¹⁷Asui umbue ainta, umbeu: —Kuxima aintaumpinima, kua seruka yapuranduwaa arama Deus irumu panye kuaita mundu puraita, maa pexari ae mundawasu uikuwerawaa.

¹⁸Asui kuaita saserdutita ruixawaita kuaita yuiri umpinimawaita aintausendu umbeuwaa aintauputari aintaumaa maye aintauyuká arama ae, aintausikie isui, nyãse kuaita siyawaita aintaakayemu aintausendu kua umbuewaa.

¹⁹Asui pitunana aintausu tendawa sui.

²⁰Asui kuemaite aintausu irumu pee rupi aintaumaa kua mirá figera umanuana panye sapu yuiri.

²¹Asui Pedru umanduari sese asui unyee Jesus supe: —Inde rembuewaa remaa kua figera rembeuwaa ixupe arama puxuwera umanuana.

²²Asui Jesus unyee ixupe: —Perikute pexari pepia Deus rese.

²³Supiwa hambeu penye arama: —Kua umbeuwaa iwitera supe arama repuamu repuri parana kiti, umunya kuri ixupe arama kuaye umbeuwaa yawe tirame mukuĩ umanduariwaa.

²⁴Ape hambeu penye arama: —Maa kuri pepurandu Deus irumu perikute pekuawa pepia upe asui uxari kuri penye arama ae.

²⁵Asui pepurandu rame Deus irumu sã puxi rame pemanduari amu rese peperduari peirumu ae uperduari arama kuri penye kua yanepaya iwaka kiti pepuxuwerasawa sui.

²⁶Maa tirame peperduari peirumu ainta timaa kuri pepaya iwaka kitiwara uperduari penye pepuxuwerasawa sui.

²⁷Asui aintauyuiri Jeruzalẽ kiti. Asui uwata irumu templu upe aintauri ipiri kuaita saserduti ruixawaita umpinimawaita yuiri serakuenawaita yuiri.

²⁸Asui aintaupurandu ae: —Awa ukuawasawa irumutaa remunya kuaita remunyawaita? Awataa uxari inde arama rekuawasawa remunya aramawaa ainta?

²⁹Asui Jesus unyee ainta supe: —Ixere hapurandu penye, pesuaxara ixe ape kuri hambeu penye arama awa ukuawasawa irumu hamunya kuaita hamunyawaita.

³⁰Maa suiwarataa Juão batizmu u iwaka suiwara u apigawaita suiwara? Pesuaxara ixe.

³¹Asui aintauyupurungita aintapawa: —Yambeu rame ixupe iwaka suiwara ae, umbeu kuri yande arama: "Marantaa tiperuyari ae?"

³²Maitaa yambeu apigawa suiwara ae. Aintausikie miraita sui nyãse panye miraita aintaumanduari utitikawaa kua Juão.

³³Asui aintausuaxara Jesus: —Tiyakuawa. Asui Jesus unyee ainta supe: —Ape tihambeu penye arama awa ukuawasawa irumu hamunya kuaita hamunyawaita.