Read Nhengatu Marku 12 Bible Online

Marku 12 - Nhengatu bible

Marku 12

¹Asui Jesus uyupiru umbue ainta inyenga irumu umbue aramawaa ipupe: —Yepe apigawa uyutima ikupixawa, asui umukurara ae, asui umunya mirawaka, asui umunya iture, asui uxari amuita usaru ikupixawa, asui usu apekatu kiti amu kiti.

²Asui sangawa upe aintaupuu arama iya umundu yepe upurakiwaa ixupe aintapiri kuaita usaruwaita ikupixawa ururi arama aintasuiwara kuaita aintaupuwaita.

³Asui aintaupisika aintaunupa ae asui aintaumundu uyuiri yawentu.

⁴Asui umundu yuiri yepe upurakiwaa ixupe aintapiri, asui aintaunupa ae iakanga rese aintaukasuari ae.

⁵Umundu yuiri aintapiri amu, asui aintauyuká ae, asui umundu aintapiri siya xingana, yepeyepe aintaunupa ainta yepeyepe aintauyuká ainta.

⁶Aikuere yepe irumu aete taira uputariwaa, asui anyu arama umundu aintapiri ae unyee: —Aintaurespetari kuri seraira.

⁷Asui kuaita usaruwaita kupixawa aintaupurungita aintapawa: —Aete kua upita arama ixupe iyara, yasu yayuká ae yaneyara arama kuri kua iyara.

⁸Asui aintaupisika aintauyuká ae, asui aintaumburi ipira ikupixawa sui.

⁹Maataa kuri umunya kua kupixawa iyara? Uri kuri uyuká arama usaruwaita ikupixawa uxari arama amuita usaru ikupixawa.

¹⁰Maitaa timaa peleri kua aintaumpinimawaa? Kua ita aintaumburiwaa aintasui kuaita umunyawaita uka, sesete aintaumunya arama uka santawaa kuiri.

¹¹Aete Deus umunyawaa ape purangawaa yamaa ixupe.

¹²Ape aintauputari aintaupisika ae nyãse aintaukuawa umbeu aintarese irumu kua inyenga umbuewaa arama ipupe, maa aintausikie aintasui kuaita siyawaita asui aintauxari ae aintausuana isui.

¹³Asui aintaumundu ipiri yepeyepe aintasuiwara kuaita farizewita erudianuita yuiri aintaupisika arama ae inyenga resewara.

¹⁴Asui aintauri ipiri aintaunyee ixupe: —Inde umbuewaa yakuawate supiwa inde timaa reparawaka remaa kuaita miraita, yepewasute remaa ainta, supiwa rembue Deus rapee rese, maitaa puranga yapagari impustu Sezar supe u timaa puranga? Maitaa yarikute yapagari ae u tiyapagari?

¹⁵Maa ukuawate retentuwaa aintanyenga, ape umbeu ainta supe: —Marantaa peputari pesaã ixe? Peruri ixe arama yepe prata hamaa arama ae.

¹⁶Asui aintaururi ixupe ae. Asui upurandu ainta: —Maa rangawataa kua uyariwaa sese? Maataa sera kua aintaumpinimawaa sese? Aintaumbeu ixupe: —Sezar.

¹⁷Asui Jesus unyee ainta supe: —Pemee Sezar supe Sezar iyara pemee Deus supe Deus iyara. Asui turusu aintausikie aintausendu ixupe.

¹⁸Asui aintauri ipiri kuaita sadusewita umbeuwaita tikuri yapaka manusawa sui aintaupurandu ae, aintaumbeu ixupe:

¹⁹—Inde umbuewaa, kuxima Muize umpinima yande arama, umanu rame yepe apigawa tirewaa uriku taira asui imu uyuka yuiri ximiriku sakakuera umukiriari arama taira irumu imu ambira rakakuera.

²⁰Asui seti kuera kuaita imuita aintapawa, asui umendariana kua aintaimu tuyuwewaa asui tire uriku taira umanuana ae.

²¹Asui mukuĩsawa imu umendari irumu kua viuva, asui umanu isui tiuriku taira, asui yawete yuiri musapirisawa aintaimu.

²²Asui yawepawa aintaumanu kuaita setiwaita tiaintauriku aintaraira. Asui anyu arama umanu kua kunya aintarakakuera.

²³Asui aintausemu rame manusawa sui awa rimirikutaa kuri ae? Nyãse kuaita setiwaita kuera rimiriku ae.

²⁴Jesus umbeu ainta supe: —Maitaa apekatu será pembue tiresewara pekuawate aintaumpinimawaa tiyuiri pekuawa Deus kirimbawasawa?

²⁵Aintausemu rire manusawa sui timaa kuri aintaumendari kuaita apigawaita kunyaita yuiri, maa aintauiku kuri anjuita yawe iwaka kiti.

²⁶Peputari rame pekuawa aintausemu manusawa sui peleri pemaa kua Muize umpinimawaa upe umbeuwaa upe maye Deus upurungita mirá sui unyee: —Ixete Abraão Deus, ixete Izaki Deus, ixete Jaku Deus yuiri.

²⁷Timaa umanuwaita Deus ae maa upakawaita Deus ae. Turusu peyawi.

²⁸Asui yepe umpinimawaa uri aintapiri usenduanate maye aintaupurungita asui umaa puranga Jesus usuaxara ainta, upurandu ae: —Maataa kua Deus umunduwaa yamunya puranga piri panye sui?

²⁹Jesus usuaxara ae: —Pesendu penye Israelitaita yaneruixawa kua Deus, yepenyute yaneruixawa.

³⁰Rerikute regustari neruixawa Deus panye nepia upe panye neanga irumu panye remanduarisawa irumu panye nekirimbawasawa irumu yuiri.

³¹Asui mukuĩsawa umundu, rerikute regustari nerumuaraita kuaye reyugustariwaa yawe indepawa. Tiyamaa puranga piriwaa Deus umunduwaa yamunya aintasui kua hambeuwaa.

³²Asui kua umpinimawaa umbeu ixupe: —Puranga, inde umbuewaa, supiwa rembeu yepenyute yaneDeus, tiyamaa amu isui.

³³Asui puranga piri yagustari Deus panye yanepia sui panye yamanduarisawa irumu panye yanekirimbawasawa irumu, yagustari yuiri yanerumuaraita kuaye yayugustariwa yawe yandepawa isui kua yameewaa Deus supe arama yanerimbawa yasapi arama ae Deus supe prezenti yuiri.

³⁴Asui Jesus umaa irumu sese ukuawawaa yawe usuaxara ae umbeu ixupe kua umpinimawaa: —Kuairantuana nerunde neruixawa arama kua Deus yawe rire aintausikie aintaupurandu ae.

³⁵Asui Jesus umbuewaa upe uiku templu upe umbeu ainta supe: —Maitaa aintaumbeu kuaita umpinimawaita Davi rimiariru kua Kristu?

³⁶Davite umbeu Espiritu Santu irumu, yawe unyee: —Yaneruixawa umbeu seruixawa supe, rewapikare reiku sekatusawa upe ate mairame kuri hamburi neruanyanaita neipi wira kiti.

³⁷Davite useruka suixawa ae, ape maitaa maa ximiarirute ae? Asui kuaita miraita siyawaita suuri aintausendu ixupe.

³⁸Asui Jesus umbue ainta, umbeu ainta supe: —Pemaa katu pesui kuaita umpinimawaita ugustariwaita uwata aintasaya ipukuwaa upe aintaugustari miraita umukuema ainta ukara kiti.

³⁹Aintaugustari aintauwapika serakuenawaita banku rese sinaguga upe aintaugustari aintauwapika purangawaita ibanku rese aintafesta upe.

⁴⁰Asui aintauganani aintauyuka aintamaa aintasui kuaita viuvaita. Aintaupurara kuri turusu piri sikuyara kua aintaumunyawaa.

⁴¹Asui Jesus uwapika uferta riru ruaki umaa kuaita miraita siyawaita aintauxari aintadinyeru kua uferta riru upe. Asui kuaita rikuwaita aintauxari turusu aintadinyeru.

⁴²Asui uri yepe viuva pirasuawaa uxari mukuĩ dinyeru kubri uferta riru upe.

⁴³Asui Jesus usenui ipiri kuaita umbuewaita umbeu ainta supe: —Supiwa hambeu penye arama, kua viuva pirasuawaa uxariana turusu aintasui panye kuaita amuita uxariwaita dinyeru.

⁴⁴Nyãse muiri kuaita amuita aintauxari kua tiwa uwatari ainta supe, maa kua viuva pirasuawaa uxari panye kua uwatariwaa ixupe upiripana aramawaa ipupe umbau arama.