Read Nhengatu Marku 13 Bible Online

Marku 13 - Nhengatu bible

Marku 13

¹Asui Jesus usemu rame templu sui yepe aintasuiwara kuaita umbuewaita umbeu ixupe: —Remaa inde rembuewaa yande, remaa kuaita ita purangawaita, kua ukaita itasuiwaraita yuiri.

²Asui Jesus usuaxara ae, umbeu ixupe: —Maitaa remaa kua ukaita turusuwaita? Aintauwari kuri panye kuaita itaita, tikuri yamaa yepe ita sendawa kuera upe tiwa aintaumburi.

³Asui Jesus uwapika uiku iwitera rese sera Ulivera templu ruaxara kiti, asui aintaupurandu ae anyuirawaa upe kuaita Pedru, Tiagu, Juão, Andre yuiri:

⁴—Rembeu yasendu, mairametaa kuri usasawa kua rembeuwaa? Maataa kuri yamaa yakuawa arama usika sangawa?

⁵Asui Jesus umbeu ainta supe: —Pemaa pesui yawaite amu uganani penye.

⁶Siya kuri uri serera rese aintaumbeu kuri: —Ixete Kristu, aintauganani kuri siya miraita.

⁷Maa pesendu rame kuri aintaumbeu kera rese aintaumunya kuri kera, tekuri pesikie nyãse yawe kuri aintaumunya maa umbaare upawasawa.

⁸Asui aintausu aintaumunya kera amu miraita irumu, yawete yuiri guvernuita aintarapixara amuita guvernu irumu. Asui uriri iwi siya tetama, yumãsi kuri yuiri, yawe kuri aintauyupiru aintaupurara.

⁹—Maa pemaa katu pesui, nyãse aintaurasu kuri penye serakuenawaita ipiri aintaumbeu arama perese, ape kuri aintaunupa penye sinaguga upe, asui kuri aintaurasu penye guvernuita ipiri tuixawaita ipiri yuiri seresewara pembeu arama petestemunyu supiwa perese.

¹⁰Maa aintaurikute aintaumbue primeru kua inyenga purangawaa ainta supe panye kuaita miraita mundu kiti.

¹¹Asui aintaurasu irumu kuri penye aintaumbeu arama peresewara tepemanduari mayetaa pepurungita ainta supe senundere pepurungita, nyãse pembeu kuri kua Deus uxariwaa penye arama nyãse timaa kuri penye pepurungita maa kua Espiritu Santu upurungita.

¹²Asui amu uentregari kuri aintauyuká arama imu, asui ipaya uxari aintauyuká taira, asui tairaita upuamu kuri aintapayaita ruaxara aintauyuká arama ainta.

¹³Asui kuaita miraita panye puxi kuri aintaumaa penye serera resewara. Maa kua uaguentariwaa ate umanu Deus umukaturu kuri ae.

¹⁴Maa pemaa irumu kuri kua puxuwerawa umuaiwawaa uiku mame kua tiwa upe upuderi uiku, pexari aintaukuawa kuaita uleriwaita, asui kuaita uikuwaita Judeya upe pexari aintauyawawa iwitera kiti.

¹⁵Kua uwapikawaa uka iarupi ipewaa upe tepexari uwiye uwike suka kiti urasu arama iyara.

¹⁶Asui kua uikuwaa ikupixawa upe tepexari uyuiri suka kiti uyuka arama ipupekawa.

¹⁷Pirasuawaa kuri kuaita ipuruãwaita kuaita yuiri uxarirewaita aintamembira uu kambi.

¹⁸Pepurandu Deus irumu tiarama kuri kua puxuwerawa usika perese paranawasu rame.

¹⁹Nyãse kirimbawa kuri aintaupurara nyã ara upe, nyãse tikuerare aintaupurara yawe Deus uyupiru irumu umunya kua ara ate kuiri, asui tiana kuri aintaupurara mukuĩsawa yawe.

²⁰Tirame maa Deus umuatuka kua ara puxuwerawa timaa awa uyumukaturu, maa aintaresewara kuaita uparawakawaita umuatuka kua ara puxuwerawa.

²¹Amu umbeu rame penye arama: —Aete Kristu kua, u aete Kristu nyã, tepesendu ixupe.

²²Ape kuri kuaita umbeuwaita Kristu ainta, amuita umbeu utitikawaita ainta aintaumunya kuri tiwaitare yamunya, aintaumunya kuri yuiri purangawaita yawe aintaumukame miraita umaa aintauganani arama ainta, sã maa aintaupuderi rame aintauganani Deus uparawakawaita.

²³Pemaa pesui hambeuwana panye penye arama senundere uri perese.

²⁴Asui kuri nyã ara aintaupurara rire pitunawasu kuri kua kurasi asui yasi tikuri umuturi.

²⁵Asui kua estrelaita aintauwari kuri iwaka sui asui kuaita kirimbawawaita uikuwaita iwaka rese aintauriri kuri.

²⁶Asuiwana kuri aintaumaa kua unaseriwaa umaa kua ara uri kuri nuvẽ piterupi panye ukuawasawa kirimbawa igluria irumu yuiri.

²⁷Asui umundu kuri anjuita aintaumuatiri arama kuaita uparawakawaita panye kua mundu sui panye kurasi usemuwaa asui kurasi uwikewaa asui yuiri.

²⁸Peyumbue sese kua figera, pemaa irumu kuri uyumpisasuwa sawa pekuawa kuri kuayentuana kurasi ara.

²⁹Yawete yuiri penye pemaa irumu kuri uri kua hambeuwaa pekuawa kuri kuayentuana ae.

³⁰Supiwa hambeu penye arama, tikuri aintaupawa kuaita miraita kuiriwaraita senundere kua hambeuwaa.

³¹Upawa kuri iwaka ara yuiri maa senyenga tikuri upawa.

³²Tikuri awa ukuawa mairame sangawa, nẽ anjuita iwaka kiti, nẽ Deus raira yuiri, anyunte yanepaya ukuawa.

³³Pemaa pesui, pesaru puranga, nyãse tipekuawa mairame kuri sangawa usika.

³⁴Maye yepe apigawa usuwaa yawe apekatu kiti uxari suka ainta supe arama kuaita imiraita, uxari ainta supe arama aintamuraki arama aintayaweyawe, kua usaruwaa ukena umundu usaru puranga ae.

³⁵Sesewara pesaru puranga nyãse tipekuawa mairame uyuiri kua uka iyara u karuka rame u pituna piterupi u galu unyengari rame u kuemaite.

³⁶Yawaite uri tipukusawa maa rese penye, yawaite uwasemu penye pekiri pukusawa.

³⁷Ape kua hambeuwaa penye arama hambeu ainta supe arama panye, pesaru arama puranga ae.