Read Nhengatu Marku 14 Bible Online

Marku 14 - Nhengatu bible

Marku 14

¹Asui mukuĩ ara paskua runde, kua ara yuiri senundere aintaumbau pão seẽwaa, asui kuaita saserdutita ruixawaita kuaita yuiri umpinimawaita aintauputari aintaukuawa maye aintaupuderi aintauganani aintaumprezu arama Jesus aintauyuká arama ae.

²Nyãse aintaumbeu: —Tiyapuderi nyã ara yayumuatiri pukusawa nyãse yawaite aintaumaramunya yaneirumu kuaita miraita.

³Asui uiku irumu Betania upe suka upe kua Simão lepruzu, uwapika meza ruaki umbau, asui uri yepe kunya ururi yepe siru alabastru suiwara ipupe sakuenawaa riru sipiwasuwaa sera nardu, asui umpena siru uyusena arama Jesus iakanga rese.

⁴Asui ipiaiwasawa irumu aintaupurungita yepeyepe aintaunyee: —Marantaa umburi kua sakuenawaa?

⁵Nyãse yapuderi maa yapagari kua sakuenawaa sipiwasuwaa trezentu dinyeru yaxari arama sikuyara pirasuawaita supe. Asui puxi aintaumaa ixupe kua kunya.

⁶Maa Jesus unyee: —Pexari ae, marantaa pemuapatuka ae, umunya ixe arama purangawaa?

⁷Kuaita pirasuawaita peirumute ainta yawewarawate mairamentu peputari pemunya ainta supe arama purangawaa, maa ixe tiana peirumu ixe yawewarawate.

⁸Umunya maa uputariwaa umunya umukaturuana sepira aintaumburi runde ae.

⁹Supiwa hambeu penye arama: —Maa kiti kuri aintaumbue kua nyenga purangawaa panye kua ara kiti aintaumbeu kuri sese kua umunyawaa aintaumanduari arama kuri ae.

¹⁰Asui Juda Iskariute yepe aintasuiwara kuaita duziwaita usu aintapiri kuaita saserdutita ruixawaita uxari arama ainta supe Jesus.

¹¹Asui aintausendu irumu umbeuwaa suuri aintapia asui aintauprumeteri ixupe dinyeru, asui usu usikari mayetaa upuderi uxari ainta supe ae.

¹²Asui primeru ara aintaumbau arama kua pão seẽwaa aintauyuká yuiri kua kurderu paskua rupiara, asui umbuewaita umbeu ixupe: —Maa kititaa reputari yamukaturu rembau arama paskua rame?

¹³Asui umundu mukuĩ aintasuiwara umbuewaita umbeu ainta supe: —Pesu tetama kiti akiti kuri pewasemu yepe apigawa urasu ii kamuti upe.

¹⁴Pesu sakakuera, asui maa kiti uwike uka kiti pembeu uka iyara supe, kua umbuewaa yande upurandu inde: —Mametaa nesala hambau arama paskua rame hambuewaita irumu?

¹⁵Asui umukame kuri pemaa yepe sala turusuwaa iwate kitiwaa pruntuwaa panye uka rupiara, ape kuri pemukaturu yanerunde.

¹⁶Asui aintausu kuaita umbuewaita tetama kiti, asui aintauwasemu kuaye Jesus umbeuwaa yawe ainta supe, asui aintaumukaturu aintaumbau arama paskua upe.

¹⁷Asui pituna irumu Jesus uri umbeuwaita irumu.

¹⁸Asui aintauwapika meza ruaki aintaumbau arama, Jesus umbeu ainta supe: —Supiwa hambeu penye arama, yepe pesuiwara umbauwaa seirumu uxari kuri ixe seruanyanaita supe.

¹⁹Asui aintauyupiru sasiyara ainta, asui aintaupurandu ae aintayaweyawe: —Maitaa ixe será?

²⁰Asui usuaxara ainta: —Pesuiwarate penye duziwaita aete kua umuyapumiwaa pão seirumu yepe pratu upe.

²¹Nyãse kua usemuwaa umaa kua ara urikute usu kuri senunde kiti kuaye aintaumpinimawaa yawe sese, maa pirasuawaa kua uxariwaa ae suanyanaita supe kua usemuwaa umaa ara. Purangate maa tikuera unaseri kua apigawa uentregariwaa ae.

²²Asui aintaumbau irumu Jesus upisika yepe pão uabensuari ae asui upartiri ae umee ainta supe asui umbeu ainta supe: —Pepisika ae aete sepira.

²³Asui Jesus upisika yepe kupu asui umee grasa sese asui umee ainta supe ae, asui aintauu ae muiri ainta.

²⁴Asui umbeu ainta supe: —Aete seruwi kua uxari aramawaa uiku santa kua Deus umbeuwaa, kua seruwi haxariwaa aintaresewara kuaita siyawaita.

²⁵Supiwa hambeu penye arama: —Timaa kuri yuiri hau kua mirá iya yukise ate nyã ara kuri hau pisasua ae aintaruixawa irumu kua Deus.

²⁶Asui aintaunyengari rire yepe kansão aintausu iwitera kiti sera Ulivera.

²⁷Asui Jesus umbeu ainta supe: —Muiri penye puxi kuri pemaa ixe nyãse yawe aintaumpinima kuxima hayuká kuri kua usaruwaa uvelya asui kuaita uvelyaita aintauyusãi kuri.

²⁸Maa hayuiri rire hapaka hasu kuri perunde Galileya kiti.

²⁹Pedru unyee ixupe: —Puxi rame aintaumaa inde panye maa ixe timaa kuri.

³⁰Asui Jesus usuaxara ae: —Supiwa hambeu inde arama, kua pituna musapiri viaji kuri reyumimi seresewara senundere galu unyengari mukuĩ viaji.

³¹Maa umbeu kirimbawa xinga: —Aintauyuká rame ixe neresewara tikuri hayumimi nerese, yawe aintaumbeu panye kuaita umbuewaita.

³²Asui aintausu amu kiti sera Getisemani asui umbeu umbuewaita supe: —Pewapika ike hasu pukusawa hapurandu Deus.

³³Urasu irumu Pedru Tiagu Juão yuiri, asui uyupiruana sasiyara turusu ae upurara ipia upe.

³⁴Asui umbeu ainta supe: —Turusu sasiyara ixe, yawaite uyuká ixe, pewapikare ike pesaru puranga.

³⁵Asui usu aintarunde kiti xinga, uyenu iwi rese upurandu Deus irumu upuderi rame uxari usasawa isui kua usikawaa sese.

³⁶Umbeu: —Inde sepaya repuderi remunya panye maa rexari usasawa sesui kua sekupu irawawaa, maa teremunya maye haputariwaa yawe maa remunya kuaye reputariwaa yawe.

³⁷Asui uyuiri aintapiri uwasemu aintaukiri uiku asui upurandu Pedru: —Maitaa rekiri reiku? Maitaa tirepuderi resaru yepe ura?

³⁸Pesaru puranga, pepurandu Deus irumu tiarama Yurupari uganani penye pemunya arama puxuwera, nyãse supiwa pepia upe peputari maa pepira pituawaa ae.

³⁹Asui usu yuiri mukuĩsawa umbeu arama Deus kuaye uyupiruwaa yawe upurandu.

⁴⁰Uyuiri aintapiri uwasemu aintaukiri uiku yuiri nyãse tipusi aintaresa, asui tiaintaukuawa maye aintausuaxara ae.

⁴¹Asui uri aintapiri musapirisawana umbeu ainta supe: —Maitaa pekirire peiku? Maitaa pepiture peiku? Usikana, nyãse usikana sangawa aintauxari arama puxuwerawaita ipu upe kua usemuwaa umaa kua ara.

⁴²Pepuamu, yasuana, pemaa kuayentuana kua uxariwaa ixe seruanyanaita supe.

⁴³Asui upurungita upere uiku Jesus uri ipiri kua Juda amu aintasuiwara kuaita duziwaita irumute kua miraita siyawaita uriwaita aintasui kuaita saserdutita ruixawaita umpinimawaita yuiri serakuenawaita yuiri aintaururi aintaespada kaseti yuiri.

⁴⁴Asui kua uentregariwaa Jesus ainta supe umbeuwana ainta supe, aete kuri kua habejariwaa, pepisika ae perasu ae peirumu pesaru ae puranga.

⁴⁵Asui usika ipiri umusuaki ae unyee ixupe: —Inde seruixawa. Asui ubejari ae.

⁴⁶Asui aintaupisika aintaipu irumu ae aintaumprezu ae.

⁴⁷Asui yepe upuamuwaa umaa ainta supe usiki iespada umunuka saserduti ruixawa impregadu inambi.

⁴⁸Asui Jesus umbeu ainta supe: —Marantaa peyuiri pepisika ixe espada irumu kaseti irumu yuiri kuaye pepisikawaa yawe mundawasu?

⁴⁹Muiri ara hambue penye templu upe asui timaa pepisika ixe. Nyãse yawe pemunya ixe arama pemunya arama maye aintaumpinimawaa yawe serese kuxima.

⁵⁰Asui aintauxari ae kuaita umbuewaita asui aintauyawawa isui.

⁵¹Asui yepe kurumiwasu usu irumu uyupupeka panu murutingawaa irumu, asui aintaupisika ae.

⁵²Asui umburi isui ipupekawa uyawawa aintasui irupaima.

⁵³Asui aintaurasu Jesus saserdutita ruixawaita ipiri, asui aintauyumuatiri panye kuaita saserdutita ruixawa, serakuenawaita yuiri, umpinimawaita yuiri.

⁵⁴Asui Pedru usu sakakuera apekatu xinga uwike satambika saserdutita ruixawa ruka kiti uwapika aintapiterupi kuaita saserdutita imiraita uyumuaku tata.

⁵⁵Asui kuaita saserdutita ruixawa panye serakuenawaita yuiri aintauputari miraita umbeu puxuwera Jesus rese aintauyuká arama ae, maa timaa nungara aintauwasemu sese.

⁵⁶Maa siya miraita uganani Jesus resewara maa timaa yepewasu aintaumbeu.

⁵⁷Asui yepeyepe upuamu aintauganani sese, aintaunyee:

⁵⁸—Yasendu umbeu, hamburi kuri kua templu aintaumunyawaa aintaipu irumu asui musapiri ara rire kuri hasupiri yuiri yepe templu tiwa aintaumunya aintaipu irumu.

⁵⁹Maa ainta tiyepewasu aintaumbeu.

⁶⁰Asui kua saserdutita ruixawa upuamu aintapiterupi upurandu Jesus: —Maitaa timaa nungara rembeu neresewara sese kua aintaumbeuwaa puxuwera nerese?

⁶¹Asui ukiririntu ae timaa nungara usuaxara, asui kua saserdutita ruixawa upurandu mukuĩsawa ae: —Maitaa Kristu inde? Maitaa taira inde kua Deus purangawaa?

⁶²Asui Jesus usuaxara ae: —Ixete, asuiwana kuri pemaa kua unaseriwaa umaa kua ara uwapika ikatusawa upe kua Kirimbawawaa uri rame kuri iwaka sui nuvẽ piterupi.

⁶³Asui kua saserdutita ruixawa umusuruka irupa, asui umbeu: —Marantaa yasikarire amuita umbeu sesewara?

⁶⁴Pesenduana umbeuwaa puxuwera Deus rese, maitaa yamunya ixupe? Asui kua miraita aintausuaxara: —Purangate yayuká ae.

⁶⁵Asui yepeyepe aintauyupiru aintautumuna sese, asui aintaumusikindawa suwa asui aintapeteka ae aintaunyee ixupe: —Rembeu yasendu, awataa unupa inde? Asui kuaita suraraita aintaunupa ae, aintaupisika irumu ae.

⁶⁶Asui Pedru uwapikare uiku saserdutita ruixawa ruka upe uri ipiri yepe saserdutita ruixawa ikriada.

⁶⁷Asui umaa Pedru uyumuaku tata umaa ixupe umbeu: —Indete sumuara kua Jesus Nazare suiwara.

⁶⁸Asui uyumimi sesewara asui unyee ixupe: —Tihakunyeseri ae tiyuiri hakuawa mayesawataa rembeuwaa. Asui usemu usu kupiara kiti.

⁶⁹Asui kua ikriada umaa, ae umbeu ainta supe kuaita upuamuwaita umaa: —Kua apigawa aete aintasuiwara Jesus umbuewaita.

⁷⁰Asui Pedru mukuĩsawa uyumimi sesewara, asui uikupuku xinga kuaita upuamuwaita umaa aintaumbeu Pedru supe: —Supiwa indete yepe aintasuiwara nyãse Galileya suiwara inde.

⁷¹Asui Pedru uyupiru umbeu: —Deus uxari kuri hapurara tirame supiwa kua hambeuwaa, asui kirimbawa umbeu Deus rese, timaa hakunyeseri kua apigawa pembeuwaa sese.

⁷²Asui aramete galu unyengari mukuĩsawa asui umanduari Jesus umbeuwaa ixupe: —Senundere mukuĩsawa galu unyengari musapiri viaji reyumimi seresewara. Asui uyaxiu turusu.