Read Nhengatu Marku 15 Bible Online

Marku 15 - Nhengatu bible

Marku 15

¹Asui kuemaite aintauyumuatiri kuaita saserdutita ruixawaita aintairumu kuaita serakuenawaita aintayuiri kuaita umpinimawaita, aintauputari aintaukuawa maye aintaumunya Jesus supe, asui aintaupukuari Jesus aintaurasu ae Pilatu ipiri.

²Asui Pilatu upurandu ae: —Maitaa indete judewita ruixawa? Asui usuaxara ae umbeu ixupe: —Ixete rembeuwaa.

³Asui kuaita saserdutita ruixawaita aintaumbeu umunya turusu puxuwera.

⁴Asui Pilatu upurandu ae mukuĩsawa: —Maitaa timaa repuderi resuaxara ainta? Remaa maye aintaumbeu puxuwera nerese.

⁵Asui nẽ maye Jesus usuaxara ainta inyenga irumu, asui Pilatu upita iakayemu umaa ixupe.

⁶Asui akayu yaweyawe aintauyumuatiri rame festa upe uyurawa ainta supe yepe prezu mayewaa aintaupurandu irumu.

⁷Ape yepe, prezu umuruanyanawaa guvernu sera Baraba, uyuka yepe apigawa aintaumaramunyawaa upe.

⁸Asui kuaita miraita siyawaita aintauri Pilatu ipiri aintauyupiru aintaupurandu ae umunya arama ainta supe kuaye umunyawaa yawe ainta supe akayu yaweyawe.

⁹Asui Pilatu usuaxara ainta, umbeu ainta supe: —Maitaa peputari hayurawa penye arama kua judewita ruixawa?

¹⁰Nyãse Pilatu ukuawa puxuwera kuaita saserdutita ruixawaita umaa Jesus, puranga resewara panye miraita umaa ae aintasui, ape aintauxari ae ixupe.

¹¹Maa aintaumpiaiwa kuaita siyawaita aintauputari arama uyurawa ainta supe Baraba Jesus sui.

¹²Asui Pilatu umbeu mukuĩsawa unyee ainta supe: —Maataa peputari hamunya ixupe kua peserukawaa judewita ruixawa?

¹³Asui aintausasemu ixupe: —Rexari aintaupregari uyari kurusa rese.

¹⁴Asui Pilatu umbeu ainta supe: —Maa aramataa, maataa puxuwerawa umunya? Maa aintausasemu mukuĩsawa: —Rexari aintaupregari uyari kurusa rese.

¹⁵Asui Pilatu uputari umusuuri kuaita siyawaita ape uyurawa ainta supe kua Baraba, asui uxari rire aintausurari Jesus uxari aintaurasu ae aintaupregari arama ae kurusa rese.

¹⁶Asui kuaita suraraita aintaurasu ae aintaruixawa ruka kiti sera preturiu, asui aintauyumuatiri muiri ainta amu suraraita.

¹⁷Asui aintaumundeu ixupe ipupekawa pirangawaa, asui aintauyupe ixupe ikurua yuu suiwara, asui aintaumundeu uyari iakanga rese.

¹⁸Asui aintaumukuema ae aintaumbeu ixupe: —Purangawaa inde judewita ruixawa.

¹⁹Asui aintaunupa ae iakanga rese mirai irumu, asui aintautumuna sese asui aintauwapika aintarinipia irumu ixupe aintaumee arama ixupe arama purangawaa.

²⁰Asui aintaukasuari rire ae aintauyuka isui kua ipupekawa pirangawaa, asui aintauxari sese iyara. Asui aintaurasu ae uka kiti aintaupregari arama uyari kurusa rese.

²¹Asui kua Simão Sireni suiwara usasawa ape uyuiri upe kupixawa sui aintapaya ae kuaita Alexandre Rufu yuiri, asui kuaita suraraita aintawafursari usupiri Jesus ikurusa.

²²Asui aintaurasu ae amu kiti sera Gulguta, yawesawa sera mira akanga kãwera rendawa.

²³Asui aintauputari aintaumee uu kua vinyu uyumunaniwaa pusanga serawaa mirra, maa timaa uputari uu ae.

²⁴Asui aintaupregari uyari ae kurusa rese, asui aintaumburi surti irupa rese aintaukuawa arama mayetaa aintauyuka aintaupisika ae aintayaweyawe.

²⁵Asui nuvi ura aintaupregari uyari kurusa rese.

²⁶Asui iarupi aintaumuyari aintaumpinimawaa maa resewarataa aintauyuká ae, yawe aintaumpinima: "Aete judewita ruixawa."

²⁷Asui suakite aintaumuyari kurusa rese mukuĩ mundawasuita, yepe ikatusawa sui yepe ikanyuntu sui.

²⁸Asui aintaumunyana kuaye aintaumpinimawaa yawe kuxima, yawe aintaumpinimawaa, aintaumaa ae kuaye yamaawaa yawe kuaita puxuwerawaita.

²⁹Asui kuaita usasawawaita ape aintaukasuari ae aintaumukataka aintaakanga ixupe, aintaumbeu ixupe: —Remaa inde rembeuwaa remburi templu asui musapiri ara rire resupiri yuiri ae.

³⁰Kuiri reyumukaturu indepawate, rewiye kurusa sui.

³¹Yawete yuiri kuaita saserdutita ruixawaita umpinimawaita yuiri aintaukasuari sese aintapawa, aintaunyee: —Umukaturuana amuita maa timaa upuderi uyumukaturu aepawa.

³²Pexari uwiye kurusa sui simutara kua Kristu Israelitaita ruixawa yamaa arama yaxari arama yuiri yanepia sese, yawete yuiri kuaita aintaumuyariwaita kurusa rese suaki aintaukasuari sese.

³³Asui yandara kurasi pitunawasuana panye kua ara ate musapiri ura.

³⁴Asui musapiri ura karuka rame Jesus usenui kirimbawa inyenga rupi: —Elui elui lema sabakitani, yawesawa umbeuwaa, seDeus, seDeus, marantaa rexari ixe?

³⁵Asui yepeyepe upuamu umaa aintausendu ixupe, aintaunyee: —Pemaa usenui Elia.

³⁶Asui yepe aintasuiwara uyana umuyapumi espunja vinagri upe uxari arama mirai rakapi rupi umuyari arama iyuru upe uu arama, asui unyee: —Yasaru yamaa sã Elia uri umuye ae.

³⁷Asui Jesus usasemu kirimbawa uxari irumu ianga,

³⁸Asui kua panu aintauxariwaa usikindawa templu rukena usuruka simutara iwate sui ate supita kiti.

³⁹Asui kua suraraita kapitão upuamu umaa ixupe umaa irumu Jesus umanu umbeu: —Supiwa Deus raira kua apigawa.

⁴⁰Apete yepeyepe kunyaita upuamuwaita umaa apekatu sui, aintapitera rupite kua Maria Madalena, kua yuiri Maria aintamaya kua Tiagu itainasawa Juze yuiri, asui kuawaa yuiri kua Salume.

⁴¹Aintate kuaita usuwaita Jesus irumu Galileya upere ae aintawajudari ae, apete yuiri siya amuita kunyaita uriwaita Jesus irumu Jeruzalẽ kiti.

⁴²Asui karuka irumu nyã ara aintaumukaturu festa rupiara sauru rundere.

⁴³Asui usika kua Juze Arimateia suiwara yepe serakuenawaa purangawaa usikariwaa aintaruixawa arama kua Deus, asui umuturusu ipia usu Pilatu ipiri upurandu irumu Jesus ipira.

⁴⁴Asui Pilatu upita iakayemu usendu rame umanuana Jesus, asui usenui suraraita kapitão upurandu usendu sã umanuana Jesus.

⁴⁵Asui aintakapitão umbeu rire Pilatu supe umanuana Jesus uentregari Juze supe ipira.

⁴⁶Asui usu upiripana yepe fazenda murutingawaa larguwaa, asui umuye ipira kuera upupeka arama irumu, asui uxari ae iwi kuara kiti kua aintaupikuĩwaita piterupi, asui umuyereu urasu yepe ita turusuwaa umusikindawaa arama ita kuara rukena.

⁴⁷Asui kua Maria Madalena kuawaa yuiri kua Maria Juze imaya aintaumaa maa kiti uxari ipira kuera.