Read Nhengatu Marku 2 Bible Online

Marku 2 - Nhengatu bible

Marku 2

¹Asui amu ara rundere Jesus uyuiri Kafarnaum kiti, asui kuaita miraita aintausendu sesewara usika suka kiti.

²Asui aintauyumuatiri ipiri kuaita miraita siyawaita, aintaumuteresemu panye ukena panye ukara kiti yuiri.

³Asui umbue ainta kua inyenga. Asui aintauri ipiri aintaururi yepe imãsiwaa membekawaa ipira, kuatru apigawaita ururi ae.

⁴Tiaintaupuderi aintaumusuaki Jesus miraita siyawaita resewara, asui aintaumukuara uka Jesus iarupi, asui aintaumukuara rire uka aintaumuye ipiri kua imãsiwaa membekawaa ipira.

⁵Jesus umaa irumu maitaa aintauxari aintapia sese unyee ixupe arama kua imãsiwaa: —Inde seraira hamburi nesui nepekadu.

⁶Yepeyepe umpinimawaita aintauwapika ape, aintaunyee aintapia upe:

⁷—Marantaa umbeu kuaye kua apigawa. Upurungita puxi Deus rese. Awataa upuderi umburi yanesui yanepekadu isui kua Deus?

⁸Asui Jesus ukuawa aintaumanduari puxi sese aintapia upe asui unyee ainta supe arama: —Marantaa pemanduari puxi pepia upe?

⁹Maataa iwasupiri? Hambeu ixupe kua imãsiwaa: —Hamburi nepekadu nesui u hamundu repuamu repisika nekama rewata arama?

¹⁰Kuiri pekuawa arama kuri upuderi umburi aintasui aintapekadu kua unaseriwaa umaa kua mundu umbeu ixupe kua imãsiwaa:

¹¹—Repuamu repisika nekama resu neruka kiti.

¹²Asui upuamu upisika ikama usemu ukara kiti aintaumaa ixupe panye, asui aintaupita aintaumanduari, asui aintaumee purangawaa Deus supe arama, aintaunyee: —Tire yamaa yawewaa.

¹³Asui Jesus usu yuiri mukuĩsa lagu rimbiwa kiti, asui aintauyumuatiri ipiri kuaita miraita siyawaita, asui umbue ainta.

¹⁴Asui usasawa irumu umaa kua Alfeu raira sera Levi uwapika impustu meza ruaki, unyee ixupe: —Reyuiri serakakuera. Asui upuamu usu sakakuera.

¹⁵Asui Jesus uwapika umbau Levi ruka upe umbuewaita irumu aintauri ipiri siya publikanuita pekaduruita yuiri, nyãse siya aintauri sakakuera.

¹⁶Asui kuaita umpinimawaita farizewita yuiri aintaumaa Jesus umbau aintairumu kuaita publikanuita pekaduruita yuiri, aintaunyee umbuewaita supe: —Marantaa umbau aintairumu kuaita publikanuita pekaduruita yuiri?

¹⁷Jesus usendu irumu aintanyenga unyee ainta supe arama: —Tiaintauputari umpusangasara kuaita tiwaita imãsi, maa kuaita imãsiwaita aintauputari ae, timaa hayuiri hasenui purangawaita maa hayuiri hasenui kuaita pekaduruita.

¹⁸Kuaita Juão umbuewaita aintauyukuaku kuaita farizewita umbuewaita yuiri, asui aintauri ipiri aintaupurandu ae: —Marantaa aintauyukuaku Juão umbuewaita farizewita umbuewaita yuiri maa kuaita rembuewaita tiaintauyukuaku?

¹⁹Jesus unyee ainta supe: —Maitaa aintaupuderi aintauyukuaku kuaita aintausenuiwaita kazamentu festa upe uiku pukusaware aintairumu kua nuivu? Tiaintaupuderi aintauyukuaku aikue rame aintairumu kua nuivu.

²⁰Maa amu ara kuri aintaurasu aintasui kua nuivu asui kuri aintauyukuaku.

²¹Tiyapuderi yaremendari kuximawara fazenda pisasuwaa irumu yawaite usuruka kua kuximawara asui puxuwera panye yanemaa.

²²Tiyaxari vinyu pisasuwaa siru kuximawara uvelya pirera suiwara upe yawaite vinyu riru usuruka kuximawarawaa, yawaite ukanyemu kua vinyu siru yuiri. Maa yaxari vinyu pisasuwaa siru pisasuwaa upe.

²³Asui yepe sauru rame Jesus usasawa kupixawa rupi asui umbuewaita aintaumpena awati.

²⁴Asui kuaita farizewita aintaunyee ixupe: —Remaa, marantaa aintaumunya kua tiwa puranga yamunya sauru ara upe?

²⁵Asui Jesus unyee ainta supe: —Maitaa tire peleri Davi resewara upurara irumu yumãsi?

²⁶Ae uwike Deus ruka kiti saserduti ruixawa pukusawa kua Abiataru, umbau meyu aintauxariwaa Deus supe, anyunte saserdutita upuderi umbau ae, asui uxari aintaumbau arama kuaita sumuaraita yuiri.

²⁷Asui Jesus unyee ainta supe: —Deus umunya sauru aintaresewara kuaita miraita, timaa umunya miraita sauru resewara.

²⁸Ape sauru ruixawa yuiri kua unaseriwaa umaa kua mundu.