Read Nhengatu Marku 3 Bible Online

Marku 3 - Nhengatu bible

Marku 3

¹Asui Jesus uwike sinaguga kiti ape uwasemu yepe apigawa iangaiwara yepe ruaxara ipu.

²Asui aintaumaa Jesus supe arama yawaite maa umukaturu ae sauru rame nyãse aintauputari aintaumbeu puxi sese.

³Asui Jesus unyee ixupe kua iangaiwara ipu: —Reyuiriana.

⁴Asui unyee ainta supe arama: —Maitaa yapuderi yamunya puranga sauru upe u puxuwera yuiri? Maitaa yapuderi yayuká u yamukaturu? Asui aintaukiririntu.

⁵Asui puxi Jesus umaa ainta supe, sasiyara ipia nyãse santa aintaumanduariwaa, unyee ixupe arama kua iangaiwarawaa ipu: —Resupiri neipu! Asui purangana ipu.

⁶Asui kuaita farizewita aintausemu ukara kiti aintauyumuatiri erudianuita irumu aintaupurungita arama Jesus rese mayetaa aintauyuká arama ae.

⁷Asui Jesus usu aintasui lagu rimbiwa kiti umbuewaita irumu, siyawaita Galileya suiwaraita aintausu sakakuera, siya Judeya suiwaraita yuiri.

⁸Aintauri ipiri yuiri siya Jeruzalẽ suiwaraita, Idumeia suiwaraita yuiri, Jurdão ruaxara suiwaraita yuiri, Tiru suiwaraita yuiri, siya Sidum suiwaraita yuiri, aintauri sakakuera aintausendu resewara umunyawaita resewara.

⁹Asui umundu umbuewaita umukaturu ixupe arama yepe igara uiku aramawaa ipupe yawaite aintaukamirika ae kuaita miraita siyawaita.

¹⁰Nyãse umukaturuana siya mãsi sui ainta, ape aintauyumuyana siya aintauputari aintauxari aintaipu sese kuaita urikuwaita mãsi.

¹¹Asui kuaita demuniu ikiawaita aintauwari iwi kiti Jesus runde sui aintaumaa irumu ae, aintaunyee ixupe: —Deus raira inde.

¹²Asui umbeu ainta kirimbawa tiarama aintaumbeu sesewara.

¹³Asui usu iwatewaa iwi rese, usenui aintauri arama sakakuera muiri kuaita uputariwaita, asui aintauri sakakuera.

¹⁴Asui uparawaka duzi aintasuiwara aintauiku arama irumu umundu arama aintausu aintaumbue inyenga.

¹⁵Uxari ainta supe arama ukuawasawa aintaumburi arama demuniwita.

¹⁶Asui uxari sera rakapira Pedru kua Simão.

¹⁷Asui Tiagu Zebedeu raira asui Juão itainasawa yuiri umuseruka ainta Buanerges, yawesawa truvão rairaita ainta.

¹⁸Asui uparawaka yuiri Andre, Filipe yuiri, Bartulumeu, Mateu, Tume, Tiagu Alfeu raira, Tadeu, Simão Zelute yuiri.

¹⁹Asui Juda Iskariute yuiri kua umuentregariwaa Jesus suanyanaita supe. Kuaita umpinimawaita aintaumbeu puxi sese

²⁰Asui uyuiri suka kiti, asui siya miraita aintauyumuatiri akiti, asui tiupuderi umbau umbuewaita irumu.

²¹Aintausendu irumu sesewara kuaita sumuaraita aintauri aintauyuka aintasui ae, nyãse aintaunyee sese, tiukuawa ara.

²²Asui kuaita umpinimawaita uriwaita Jeruzalẽ sui aintaunyee: —Yurupari uiku ipia upe demuniwita ruixawa ukuawasawa irumu umburi demuniwita.

²³Asui Jesus usenui ainta ipiri, unyee ainta supe arama yepe inyenga umbue aramawaa ipupe, unyee: —Maitaa maa Yurupari upuderi uyumburi aepawa?

²⁴Aintauyumburi rame maa kuaita miraita yepe tetama upe anyunte aintaupawa kuri.

²⁵Puxi rame aintauyumaa amu uka puraita anyunte aintaupawa kuri.

²⁶Yawete yuiri kua Yurupari, umuruanyana rame sumuaraita tikuri upuderi uiku yawewarawate maa ukanyemu kuri panye sumuaraita irumu.

²⁷Tiawa upuderi uwike kirimbawawaa ruka upe umunda arama iyaraita tirame upukuari kua kirimbawawaa asui upuderi umunda iyara uikuwaa kua uka upe.

²⁸Supiwa hambeu penye: —Deus kuri umburi aintasui panye aintapekadu, panye yuiri umbeuwaa puxuwera Deus rese umburi kuri sui ae.

²⁹Maa kua umbeuwaa inyenga puxuwerawa Espiritu Santu Deus umburi isui ipekadu, maa ipekadu uiku kuri sesewara yawewarawate.

³⁰Yawe unyee Jesus nyãse aintaumbeu uriku demuniu ikiawaa.

³¹Asui aintauri ipiri imaya imuita aintaupuamu ukara kiti, aintaumundu usenui ae.

³²Asui kuaita miraita siyawaita uikuwaita suaki aintaunyee ixupe: —Remaa nemaya nemuita nerendiraita aintauiku ukara kiti, aintausikari inde.

³³Asui usuaxara ainta: —Awataa kua semaya? Awataa kuaita semuita?

³⁴Umaa ainta supe kuaita uwapikawaita suaki unyee: —Kuaitate semaya semuita yuiri.

³⁵Muiri kuaita umunyawaita kuaye Deus uputariwaa yawe aintate semu serendira semaya yuiri.