Read Nhengatu Marku 4 Bible Online

Marku 4 - Nhengatu bible

Marku 4

¹Asui uyupiru umbue ainta lagu rimbiwa upe. Asui siya miraita uyumuatiri suaki, ape uwiye igara upe uyatiku, asui panye kuaita miraita siyawaita aintauiku parana rimbiwa iwi rese.

²Asui umbue ainta inyenga irumu umbue aramawaa ipupe ainta, unyee ainta supe:

³—Pesendu senyenga; yepe apigawa usu uyutima.

⁴Asui uyutima rame uiku yepeyepe mitima karusu uwari pee rimbiwa kiti, asui kuaita wirá miri umbau ae.

⁵Asui yepeyepe mitima karusu uwari itatiwa upe, kuaira iwi ape asui usini kutara maa tiipiima iwi ape.

⁶Asui kurasi usemu umuturi saku asui ukukui maniwa nyãse tiuriku sapu.

⁷Asui yepeyepe mitima karusu uwari puxuwerawa upe, asui sipu uyukiriari umamana ae, ape timaa uriku iya.

⁸Asui yepeyepe mitima karusu uwari purangawaa upe iwi, uyukiriari puranga asui uriku iya puranga, yepeyepe uxari trinta iya, yepeyepe sesenta asui yepeyepe uxari sem iya.

⁹Asui unyee: —Kua urikuwaa iapisa kuara urikute usendu.

¹⁰Asui Jesus uiku rame yepenyu aintasui kuaita miraita siyawaita asui kuaita uikuwaita suaki umbuewaita irumu aintaupurandu irumu sese kua inyenga umbuewaa.

¹¹Unyee ainta supe: —Haxari pekuawa arama kua nyenga aintauyumimiwaa kuxima maye Deus imiraita arama ainta, maa kuaita amuita hambue ainta inyenga irumu hambue aramawaa ipupe ainta.

¹²Aintaumaa arama maa timaa aintaukuawa maataa kua aintaumaawaa, aintausendu maa timaa aintaukuawa mayesawataa ae, yawaite maa aintautrukari aintaumanduarisawa hamburi arama aintasui aintapekadu.

¹³Asui unyee ainta supe: —Maitaa tiserá pekuawa mayesawataa kua inyenga hambeu aramawaa ipupe? Maitaa kuri pekuawa mayesawa panye hambeuwaa?

¹⁴Kua apigawa hambeuwaa sese yawesawa uyutima kua inyenga purangawaa.

¹⁵Kuaita uwariwaa pee rimbiwa kiti yawesawa kuaita usenduwaita kua inyenga asui Yurupari uri uyuka aintasui kua inyenga purangawaa.

¹⁶Yawesawa kuaita uwariwaita itatiwa upe aintausendu rame kua inyenga suuri aintausuanti ae.

¹⁷Maa tiaintauriku aintarapu aintapia upe, tisanta aintauiku, asui puxuwerawa usika aintarese, asui amuita umuruanyana ainta sesewara kua inyenga anyunte aintauxari ae.

¹⁸Kua uyutimawaita yuutiwa upe kuaye aintayawe kuaita usenduwaa kua inyenga purangawaa.

¹⁹Maa anyunte aintaumanduari kua mundu rese, seẽ aintaumanduari aintamaa rese, asui kua aintaumanduariwaa umamana kua inyenga aintapia upe asui timaa uriku iya.

²⁰Kua uyutimawaita iwi purangawaa upe aintate kuaita usenduwaita kua inyenga asui aintauriku aintaiya, yepeyepe uxari trinta iya, yepeyepe uxari sesenta iya asui yepeyepe uxari sem iya.

²¹Asui upurandu ainta: —Maitaa puranga yaxari yaneturi kaxa upe u yanemakira uirupi? Maitaa tipuranga yasupiri uwapika sendawa upe iwate?

²²Panye kua uyumimisawa upewaa yamaa kuri ae, asui muiri kua aintaumunyawaa uyumimisawa upe uyukuawa kuri.

²³Kua urikuwaa iapisa urikute usendu.

²⁴Asui unyee ainta supe: —Pesendu puranga kua pesenduwaa, kuaye pemediriwaa yawe amu supe yawete yuiri kuri aintaumediri penye arama, asui aintauxari kuri turusu piri penye arama.

²⁵Nyãse kua urikuwaa aintaumee kuri ixupe, asui kua tiwa uriku aintauyuka kuri isui kua urikuwaa kuaira.

²⁶Asui unyee: —Yaneruixawa Deus uikuwerawaa upe iyawe kua apigawa umusaĩwaa mitima karusu iwi upe.

²⁷Asui usu ukiri, asui upuamu pituna rame ara rame yuiri, asui kua mitima karusu usemu asui uyukiriari maa timaa ukuawa mayetaa.

²⁸Asui iwi uxari uyukiriari uyupiru asui usemu sawa asui iya asui ikarusu yakira.

²⁹Asui tiaru rameana iya anyunte uyutika ae nyãse usikana sangawa.

³⁰Asui unyee xingare: —Maa yawetaa kua yaneruixawa Deus uikuwaa upe? Maa inyenga upetaa yambue sese?

³¹Iyawe kua mustarda karusu yayutimawaa iwi upe, kuaira xinga ae panye mitima karusu sui kua mundu upe.

³²Yayutima rame ae uyukiriari ipukupiri panye mitima sui, uyukiriari sakanga ipuku asui wirá miri umunya suka arama sakanga rese.

³³Asui umbue ainta inyenga irumu umbue arama ipupe ainta kuaye aintaupuderiwaa yawe aintausendu.

³⁴Anyunte umbue ainta inyenga irumu umbue arama ipupe ainta, asui umbeu ainta supe umbuewaita puranga mayesawataa ainta anyuirawaa upe.

³⁵Nyã ara karuka rame Jesus umbeu umbuewaita supe: —Yasuana lagu ruaxara kiti.

³⁶Asui aintaumbeu aintaresewara ainta kuaita siyawaita asui aintaurasu ae uikure igara upe ae, yepeyepe igara usu sakakuera.

³⁷Asui usika iwitu aintarese, asui gapenu upeteka kirimbawa kua igara rese, asui parana uwike umuteresemu aintaigara.

³⁸Maa Jesus uyenu uiku igara yakumã (ganti) upe ukiri traveseru rese, asui aintaumbaka ae aintaunyee ixupe: —Inde rembuewaa yande, maitaa timaa arama reputari yasu tiipi kiti?

³⁹Asui Jesus upaka umundu kirimbawa kua iwitu asui unyee parana supe: —Repituwana. Asui iwitu upitu asui parana uikuntuana.

⁴⁰Asui unyee ainta supe: —Marantaa pesikie? Marantaa tiperuyari Deus?

⁴¹Asui aintausikie aintauyupurungita aintapawa: —Awataa kua apigawa aintauruyari arama inyenga kua iwitu parana yuiri?