Read Nhengatu Marku 5 Bible Online

Marku 5 - Nhengatu bible

Marku 5

¹Asui aintauyari lagu ruaxara kiti aintaretama upe kuaita gerazenuita.

²Aintausemu irumu igara sui uri aintaruaxara yepe apigawa semiteriu sui uriku demuniu ikiawaa ipia upe.

³Yawewarawate uiku semiteriu upe, tiawa upuderi upukuari ae kurenti irumu.

⁴Nyãse siya viaji aintaumprezu ae feru irumu ipi rese asui kurenti irumu yuiri, maa umpena kua feru asui umusaka kua kurenti. Tiawa upuderi umpiaiwaima ae.

⁵Uwata pituna rame ara rame yuiri usasasemu semiteriu kiti iwitera rese yuiri, uyumperewa ita irumu.

⁶Umaa irumu Jesus apekatu suire uyana upurandu irumu.

⁷Usasemu tiapu, unyee: —Maitaa ixe neirumu inde Jesus taira kua Deus puranga piriwaa panye sui? Hapurandu inde Deus rese tiarama rempurarakari ixe.

⁸Nyãse Jesus umbeuwana ixupe: —Inde demuniu ikiawaa resemu isui kua apigawa.

⁹Asui upurandu ae: —Maataa nerera? Usuaxara ae: —Serera siyawaa nyãse siyawaita yande.

¹⁰Asui upurandu sasisawa rupite tiarama Jesus umundu aintausu aintaretama sui.

¹¹Ape siya tayasu aintaumbau iwitera rese.

¹²Asui kuaita demuniu ikiawaita aintaupurandu Jesus, aintaunyee: —Remundu yande yawike arama tayasu ipia upe.

¹³Asui Jesus uxari yawe, ape aintausemu kuaita demuniu ikiawaita aintauwike arama tayasu ipia upe asui kuaita tayasu duis mili aintasiyasawa aintauyana tiipiwaa kiti lagu upe aintaumanu arama parana kiti.

¹⁴Asui kuaita usaruwaita tayasu aintauyawawa tetama kiti aintaumbeu panye miraita supe kampu kiti yuiri. Asui aintauri kuaita miraita aintaumaa arama mayetaa.

¹⁵Asui aintauri aintaumaa Jesus ipiri kua urikuwaa kuera siya demuniu uwapikana umundeuwana irupa ukuawana ara, asui aintausikie.

¹⁶Asui kuaita umaawaita kuera maye kua urikuwaa kuera demuniu aintaumbeu panye miraita supe arama, aintaumbeu yuiri maitaa kuaita tayasu.

¹⁷Asui kuaita miraita aintaupurandu Jesus uyuiri arama aintaretama sui.

¹⁸Asui Jesus uwiye igara kiti, upurandu ae kua urikuwaa kuera demuniu uxari arama usu irumu.

¹⁹Maa Jesus usaisu usu irumu, unyee ixupe arama: —Resu neruka kiti nerumuaraita ipiri rembeu ainta supe arama maitaa neruixawa umunya inde arama maitaa yuiri pirasua umaa inde arama.

²⁰Asui usu uyupiru umbeu Dekapuli kiti panye Jesus umunyawaa, asui panye kuaita miraita aintaupita aintaumanduari.

²¹Asui Jesus uyuiri rire igara upe lagu ruaxara sui, aintauyumuatiri ipiri siya miraita lagu rimbiwa upe.

²²Asui uri ipiri yepe usaruwaa sinaguga sera Jairu, asui umaa irumu Jesus uyawika ipi ruaki.

²³Sasisawa rupite upurandu Jesus unyee: —Serayera tiana maa arama uiku, reyuiriana rexari neipu sese remukaturu ae sikue arama ae.

²⁴Asui Jesus usu irumu, asui siya miraita usu irumu suaki.

²⁵Asui yepe kunya upurarawaa duzi akayu tuwi usu isui.

²⁶Turusu upurara umpusangasaraita rese, umburi panye imaaita maa tiaintawajudari ae, arampiri uikuaiwa ae.

²⁷Usenduana Jesus resewara ape uri sakakuera siyawaita aintapiterupi uxari ipu irupa rese.

²⁸Nyãse umbeuwana: —Haxari rame kuri seipu irupa rese puranga kuri ixe.

²⁹Asui anyunte upitu tuwi isui asui purangana ae uyusaã ipira mãsi sui.

³⁰Asui Jesus ukuawa ukuawasawa usemu isui asui uyereu upurandu kuaita siyawaita: —Awataa upisika serupa rese?

³¹Asui umbuewaita unyee ixupe: —Remaa kua siyawaa miraita aintauyari nerese marantaa rembeu? Awataa upisika ixe?

³²Asui uyereu umaa suaki umaa arama awataa kua upisikawaa ae.

³³Ape kua kunya usikie uriri nyãse ukuawana umukaturuana ae, asui uri suaki uyawika senunde umbeu ixupe supiwa panye usasawawaa.

³⁴Asui unyee ixupe: —Serayera, purangana inde rexari resewara nepia serese, resuana puranga, reikuana puranga mãsi sui.

³⁵Jesus upurungita rame uiku aintauri ipiri yepeyepe suka sui kua usaruwaa sinaguga aintaunyee ixupe: —Umanuana nerayera, marantaa remuapatuka kua umbuewaa yande.

³⁶Maa Jesus tiusendu ainta supe, unyee ixupe kua usaruwaa sinaguga: —Teresikie rexari nepia puranga.

³⁷Maa timaa uxari amuita usu irumu, anyunte uxari usu irumu kua Pedru asui Tiagu imute yuiri Juão.

³⁸Aintausika rame suka kiti kua usaruwaa sinaguga Jesus umaa siya tiapu ainta, yepeyepe uyaxiu yepeyepe usasemu.

³⁹Uwike rame unyee ainta supe: —Maitaa peiku tiapu penye, marantaa peyaxiu? Kua kunyatai tiumanu ae anyunte ukiri.

⁴⁰Asui aintaupuká sese asui umundu aintausemu ukara kiti panye asui urasu irumu kua kunyatai ipaya imaya yuiri asui kuaita yuiri uriwaita irumu, asui uwike mame uyenuwaa upe.

⁴¹Asui upisika ipu unyee: —Talita kumi, yawesawa umbeuwaa kunyatai kuiri hamundu repuamu.

⁴²Aramete upuamu kua kunyatai uwata nyãse urikuana duzi akayu, asui aintausikie aintaumaa rame yawewaa.

⁴³Asui Jesus umundu tiarama aintaumbeu amuita ukuawa yawewaa rese. Asui umundu aintaumee arama umbau kua kunyatai.